ଭୁବନେଶ୍ୱର, ୨୯ା୧୧(ବିଜୟ ରଣା): ଓଡ଼ିଶାର ଯୁବକମାନଙ୍କୁ ସଂଗଠିତ କରିବା ଏବଂ ସେମାନଙ୍କ ସଶକ୍ତିକରଣ ଦିଗରେ ସରକାର ଆଉ ଏକ ନୂଆ ଉଲ୍ଲେଖନୀୟ ପଦକ୍ଷେପ ନେଇଛନ୍ତି। ଏହି ପରିପ୍ରେକ୍ଷୀରେ ସରକାର ନିକଟରେ ‘ନୂଆ ଓ’ କାର୍ଯ୍ୟକ୍ରମର ଘୋଷଣା କରିଥିଲେ। ଏଥିରେ କ୍ରୀଡ଼ା ପ୍ରତିଯୋଗିତା ଓ ସାଂସ୍କୃତିକ କାର୍ଯ୍ୟକଳାପ ଅନ୍ତର୍ଭୁକ୍ତ। ସମଗ୍ର ରାଜ୍ୟରେ ଏହା କାର୍ଯ୍ୟକାରୀ ହେବ। ୧୩ରୁ ୩୫ ବର୍ଷ ବୟସ ବର୍ଗରେ ୬ଟି ବିଭାଗରେ ଖେଳ ଯଥା ଖୋ-ଖୋ, କ୍ରିକେଟ, ହକି, ଫୁଟ୍ବଲ, ଭଲିବଲ୍ ଅନୁଷ୍ଠିତ ହେବ। ପୁରୁଷ ଓ ମହିଳା କ୍ରୀଡ଼ା ପ୍ରତିଯୋଗିତାରେ ଭାଗ ନେବା ଲାଗି ବର୍ତ୍ତମାନ ୪୭,୦୦୦ରୁ ଊର୍ଦ୍ଧ୍ୱ ଟିମ୍ ପଞ୍ଜୀକୃତ କରିଛନ୍ତି। ତନ୍ମଧ୍ୟରୁ ୧୯,୭୦୧ ଦଳ କ୍ରିକେଟ, ୮,୩୮୫ ଦଳ ଫୁଟ୍ବଲ, ୭,୫୬୭ ଦଳ ଭଲିବଲ ଏବଂ ୬୨୦୨ ଦଳ କବାଡ଼ିରେ ଭାଗ ନେବାକୁ ଥିବାବେଳେ ଖୋ ଖୋ ଓ ହକିରେ ଯଥାକ୍ରମେ ୪,୨୦୯ ଏବଂ ୧,୬୮୩ ଦଳ ରହିଛନ୍ତି। ଉଲ୍ଲେଖଯୋଗ୍ୟ, ମହିଳା କାଟେଗୋରିରେ ୫,୦୦୦ ଟିମ୍ ପଞ୍ଜୀକୃତ କରିଛନ୍ତି। ଏହି କାର୍ଯ୍ୟକ୍ରମ ଯଥା ବ୍ଲକ ଲେଭଲ/ୟୁବି ଲେଭଲ, ଇନଷ୍ଟିଚ୍ୟୁଶନାଲ ଲେଭଲ, ଡିଷ୍ଟ୍ରିକ୍ଟ ଲେଭଲ ୪ଟି ସ୍ତରରେ ହେବ। ବ୍ଲକ/ୟୁବି ଲେଭଲରେ କ୍ରୀଡ଼ା ଓ ସାଂସ୍କୃତିକ ପ୍ରତିଯୋଗିତା ହେବ। ଇନଷ୍ଟିଚ୍ୟୁଶନାଲ ସ୍ତରରେ ସମାଜସେବା ଓ କାର୍ଯ୍ୟକଳାପ ବ୍ୟବସ୍ଥା ରହିଛି। ଜିଲା ଓ ରାଜ୍ୟସ୍ତରରେ କ୍ରୀଡ଼ା ଓ ସାଂସ୍କୃତିକ ପ୍ରତିଯୋଗିତା ହେବ। ଏଥିରେ ସାମାଜିକ ସଚେତନତା ପାଇଁ ୟୁଥ ଫେଷ୍ଟିଭାଲ, ଡିଜିଟାଲ ଏନଗେଜମେଣ୍ଟ ଏବଂ ସୋସିଆଲ ମିଡିଆ ପ୍ରତିଯୋଗିତା ରହିବ। ଏହି ପ୍ରୋଗ୍ରାମରେ ମାଗଣା ସ୍ପୋଟର୍ସ କିଟ୍ ସହ ଆର୍ଥତ୍କ ପୁରସ୍କାର ବ୍ୟବସ୍ଥା ରହିଛି। ‘ନୂଆ ଓ’ କାର୍ଯ୍ୟକ୍ରମକୁ ସଫଳତାର ସହ ଆଗେଇନେବା କ୍ଷେତ୍ରରେ ରାଜ୍ୟ ସରକାରଙ୍କ ହାୟର ଏଜୁକେଶନ, ସ୍କୁଲ ଆଣ୍ଡ ମାସ୍ ଏଜୁକେଶନ, ସ୍କିଲ ଡେଭଲପମେଣ୍ଟ ଆଣ୍ଡ ଟେକ୍ନିକାଲ ଏଜୁକେଶନ, ସ୍କିଲ ଡେଭଲପମେଣ୍ଟ ଆଣ୍ଡ ଟେକ୍ନିକାଲ ଏଜୁକେଶନ, ଏସ୍ଟି ଆଣ୍ଡ୍ ଏସ୍ସି ଡେଭଲପମେଣ୍ଟ, ହେଲ୍ଥ ଆଣ୍ଡ୍ ଫ୍ୟାମିଲି ଓ୍ବେଲଫେୟାର, ଏଗ୍ରିକଲଚର ଆଣ୍ଡ ଫାର୍ମର୍ସ ଏମ୍ପାଓ୍ବାରମେଣ୍ଟ ବିଭାଗ ବ୍ୟତୀତ କ୍ରୀଡ଼ା ଯୁବସେବା ବିଭାଗ, ଜିଲା ପ୍ରଶାସନ ଓ ରାଜ୍ୟ କ୍ରୀଡ଼ା ଆସୋସିଏଶନ ମିଳିତ ଭାବେ କାର୍ଯ୍ୟକରିବେ।