ଝାରସୁଗୁଡ଼ା ଅଫିସ,୨୯ା୧୧: ଝାରସୁଗୁଡ଼ା ଜିଲାର ଆଦିବାସୀ ଅଧ୍ୟୁଷିତ କିର୍ମିରା ଓ ଲଇକେରା ବ୍ଲକକୁ ଆଦିବାସୀ ଉପଯୋଜନା (ଟିଏସ୍ପି)ରେ ସାମିଲ କରାଯାଇଛି। ଗତ ୨୪ ତାରିଖରେ କେନ୍ଦ୍ର ଆଦିବାସୀ ମନ୍ତ୍ରଣାଳୟ ପକ୍ଷରୁ ବିଜ୍ଞପ୍ତିରେ ଏହା ଘୋଷଣା କରାଯାଇଛି। ଏହା ସହିତ ଝାରସୁଗୁଡ଼ାଠାରେ ସମନ୍ବିତ ଆଦିବାସୀ ଉନ୍ନୟନ ସଂସ୍ଥା (ଆଇଟିଡିଏ) ମୁଖ୍ୟାଳୟ ରହିବ ବୋଲି କୁହାଯାଇଛି। ଝାରସୁଗୁଡ଼ା ଜିଲାର ଉପରୋକ୍ତ ୨ ବ୍ଲକ ସମେତ ସମ୍ବଲପୁର ଜିଲାର ଯୁଯୁମୁରା ବ୍ଲକକୁ ଆଦିବାସୀ ଉପଯୋଜନାରେ ସାମିଲ କରିବା ସକାଶେ ଓଡ଼ିଶା ସରକାର ୨୦୧୭ ନଭେମ୍ବର ୬ରେ କେନ୍ଦ୍ର ଆଦିବାସୀ ମନ୍ତ୍ରଣାଳୟକୁ ପ୍ରସ୍ତାବ ପ୍ରେରଣ କରିଥିଲେ। ୨୦୧୮ରେ କେନ୍ଦ୍ର ଆଦିବାସୀ ପରାମର୍ଶଦାତା ସମିତି (ଟିଏସି) ଏହି ପ୍ରସ୍ତାବର ଅନୁଧ୍ୟାନ କରିଥିବା ବେଳେ ୨୦୨୧ ଅକ୍ଟୋବର ୧୧ରେ ଆଦିବାସୀ ମନ୍ତ୍ରଣାଳୟ ଓଡ଼ିଶା ସରକାରଙ୍କୁ ଏହି ପ୍ରସ୍ତାବର ପର୍ଯ୍ୟବେକ୍ଷଣ କରିବାକୁ ଚିଠି ଲେଖିଥିଲେ। ତଦନୁଯାୟୀ ଗତ ୨୪ ତାରିଖରେ ଏ ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। ଏହା ଜଣାପଡ଼ିବା ପରେ ଝାରସୁଗୁଡ଼ା ଜିଲାର ବିଭିନ୍ନ ସଂଗଠନ ପକ୍ଷରୁ ସ୍ବାଗତ କରାଯାଇଛି। ସମ୍ମିଳିତ ଆଦିବାସୀ ସମାଜ ଦୀର୍ଘ ୬ବର୍ଷରୁ ଅଧିକ ହେଲାଣି ଏଥି ସକାଶେ ଦାବି କରିଆସୁଥିଲା।