![](https://www.dharitri.com/wp-content/uploads/2024/02/Nua_O_1708621875.jpg)
ଭୁବନେଶ୍ୱର,୨୩।୨(ଅନିଲ ଦାସ): ଯୁବ ସଶକ୍ତୀକରଣ ପାଇଁ ରାଜ୍ୟ ସରକାର ‘ନୂଆ-ଓ’ ଯୁବ ସଶକ୍ତୀକରଣ କାର୍ଯ୍ୟକ୍ରମ ଆରମ୍ଭ କରିଛନ୍ତି। ‘ନୂଆ-ଓ’ ଜିଲା ଉତ୍ସବରେ ଛାତ୍ରୀଛାତ୍ରଙ୍କ ଅଂଶଗ୍ରହଣ ବଢ଼ାଇବା ଏବଂ ସେମାନଙ୍କ ପାଇଁ ‘ନୂଆ-ଓ’ ଛାତ୍ରବୃତ୍ତି ପ୍ରଦାନ ଲାଗି ବଜେଟ ପରିମାଣକୁ ୩୧୫ କୋଟି ଟଙ୍କାକୁ ବୃଦ୍ଧି କରାଯାଇଛି। ଏହି କାର୍ଯ୍ୟକ୍ରମ ଜରିଆରେ ଯୁବବର୍ଗଙ୍କ ନିମନ୍ତେ କ୍ରୀଡ଼ା ପ୍ରତିଯୋଗିତାର ଆୟୋଜନ, ‘ନୂଆ-ଓ’ ଜିଲା ଉତ୍ସବ ପାଳନ, ତଥା ଡିଜିଟାଲ ମଞ୍ଚକୁ ବ୍ୟବହାର କରି ବିଭିନ୍ନ ସୃଜନଶୀଳ ପ୍ରତିଯୋଗିତା ଆୟୋଜନ କରାଯାଉଅଛି।
ଏହି କାର୍ଯ୍ୟକ୍ରମରେ ଜିଲା ଏବଂ ରାଜ୍ୟସ୍ତରୀୟ କ୍ରୀଡ଼ା ପ୍ରତିଯୋଗିତା ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି। ଏଥି ନିମନ୍ତେ ବଜେଟ ପରିମାଣକୁ ୩୧୫ କୋଟି ଟଙ୍କାକୁ ବୃଦ୍ଧି କରାଯାଇଛି। ଓଡ଼ିଶା ଗ୍ରାମ ପଞ୍ଚାୟତ ନିର୍ବାହୀ ଅଧିକାରୀ (ନିଯୁକ୍ତି ଓ ସେବା ସର୍ତ୍ତାବଳୀ ପ୍ରଣାଳୀ) କ୍ୟାଡର ପୁନର୍ଗଠନ ପ୍ରସ୍ତାବକୁ ମଧ୍ୟ ମଞ୍ଜୁରୀ ମିଳିଛି। ଏହାଦ୍ୱାରା ଗ୍ରାମ ପଞ୍ଚାୟତରେ କାର୍ଯ୍ୟରତ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କ ପାଇଁ ପଦୋନ୍ନତିମୂଳକ ବାଟ ଫିଟିଛି। ଓଡ଼ିଶା ଅଧସ୍ତନ ଅର୍ଥ ସେବା ନିୟମାବଳୀ-୧୯୮୮ର ସଂଶୋଧନ ପ୍ରସ୍ତାବକୁ କ୍ୟାବିନେଟ ମଞ୍ଜୁରୀ ମିଳିଛି।
ସହାୟକ ବାଣିଜ୍ୟକର ଓ ଜିଏସ୍ଟି ଅଧିକାରୀଙ୍କ ଦ୍ବାରା ପାରିତ ହେବାକୁ ଥିବା ବିଭାଗୀୟ ପରୀକ୍ଷା ପାଇଁ ନିର୍ଦ୍ଧାରିତ ପାଠ୍ୟକ୍ରମରେ ସଂଶୋଧନ କରାଯାଇ ଜିଏସ୍ଟି ବ୍ୟବସ୍ଥା ଅଧୀନରେ କାର୍ଯ୍ୟ କରିବାକୁ ଥିବା ଅଧିକାରୀଙ୍କ ଜ୍ଞାନ ବୃଦ୍ଧି କରିବା ସକାଶେ ଓଡ଼ିଶା ଦ୍ରବ୍ୟ ଓ ସେବା କର ଅଧିନିୟମ-୨୦୧୭ ଏବଂ ଏହା ଅଧୀନରେ ପ୍ରସ୍ତୁତ ନିୟମାବଳୀକୁ ପାଠ୍ୟକ୍ରମରେ ଅନ୍ତର୍ଭୁକ୍ତ କରାଯିବ। ଏହାବ୍ୟତୀତ ସେମାନଙ୍କ ଲାଗି ନିର୍ଦ୍ଧାରିତ ପାଠ୍ୟକ୍ରମରେ ଥିବା ଦ ଓଡ଼ିଶା ଭାଲ୍ୟୁ ଆଡେଡ ଟ୍ୟାକ୍ସ ଆକ୍ଟ-୨୦୦୪ ଏବଂ ଏହା ଅଧୀନରେ ପ୍ରସ୍ତୁତ ନିୟମାବଳୀରେ ଥିବା ‘ଓରିସା’ ଶବ୍ଦ ବଦଳରେ ‘ଓଡ଼ିଶା’ ଶବ୍ଦ ବ୍ୟବହାର କରାଯିବ। ଏଥିସହିିତ ଓଡ଼ିଶା ଅଧସ୍ତନ ଅର୍ଥ ସେବା (ବାଣିଜ୍ୟକର ଶାଖା) ନିଯୁକ୍ତି ଓ ସେବା ସର୍ତ୍ତ ନିୟମାବଳୀ, ୧୯୮୮ର ନିୟମ (୨) ର ଖଣ୍ଡ (କ)ରେ ଥିବା ‘ବାଣିଜ୍ୟ କର ଏବଂ ଜିଏସ୍ଟି କମିଶନର, ଓଡ଼ିଶା’ ନାମରେ ସଂଶୋଧନ କରି, ଯଦି ସେ ପ୍ରମୁଖ ସଚିବ ପାହ୍ୟାରେ ଥିବେ ତେବେ ‘ମୁଖ୍ୟ ବାଣିଜ୍ୟକର ଏବଂ ଜିଏସ୍ଟି କମିଶନର, ଓଡ଼ିଶା’ କରିବାକୁ ପ୍ରସ୍ତାବ ଦିଆଯାଇଛି।
ଏଥିସହିତ ନିକଟରେ ମୁକ୍ତିଲାଭ କରିଥିବା ହିନ୍ଦୀ ଚଳଚ୍ଚିତ୍ର ‘ଦ୍ୱାଦଶ ଫେଲ୍’ ପ୍ରଦର୍ଶନ ଉପରୁ ଟିକସ ଛାଡ ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି। ବିଡିଏ, ସିଡିଏ ଏବଂ ଓଡ଼ିଶା ରାଜ୍ୟ ହାଉସିଂ ବୋର୍ଡ ଦ୍ୱାରା ନିୟମ ଅନୁସାରେ ଇଚ୍ଛାଧୀନ କୋଟାରେ ଏକକ ଆବଣ୍ଟିତ ମାମଲାକୁ ଟାସ୍କଫୋର୍ସ ରିପୋର୍ଟରୁ ବାଦ୍ ଦେବାକୁ ସରକାର ନିଷ୍ପତ୍ତି ନେଇଛନ୍ତି। କୋରାପୁଟ ଜିଲା ସୁନାବେଡ଼ାଠାରେ ଅସ୍ଥାୟୀ ଭାବେ ବସବାସ କରୁଥିବା ୫୧୫ ଯୋଗ୍ୟ ପୂର୍ବ ପାକିସ୍ତାନ ଏବଂ ବର୍ମା ପ୍ରତ୍ୟାବର୍ତ୍ତନକାରୀ ବିସ୍ଥାପିତ ପରିବାରଙ୍କୁ ସ୍ଥାୟୀ ବାସଗୃହ ପ୍ରଦାନ କରାଯିବ।