ଯାଜପୁର,୨୩ା୯(ହର୍ଷବର୍ଦ୍ଧନ ବେହେରା): କଳିଙ୍ଗନଗର ଟାଟା ଷ୍ଟିଲ୍ର ଦ୍ୱିତୀୟ ପର୍ଯ୍ୟାୟ ସମ୍ପ୍ରସାରଣ କାର୍ଯ୍ୟ ଚାଲିଛି। ଏଥିରେ ଅତିରିକ୍ତ ୨୩ ହଜାର ୫୦୦ କୋଟି ଟଙ୍କା ବିନିଯୋଗ କରି ବାର୍ଷିକ ୩ ନିୟୁତ ମେଟ୍ରିକ ଟନ୍ରୁ ୮ ନିୟୁତ ମେଟ୍ରିକ ଟନ୍(ଏମ୍ଟିପିଏ) ପର୍ଯ୍ୟନ୍ତ ଷ୍ଟିଲ୍ ଉପତ୍ାଦନ କରିବାକୁ ଲକ୍ଷ୍ୟ ରହିଛି। ଏଥିପାଇଁ ଟାଟା ଷ୍ଟିଲକୁ ଇଡ୍କୋ ଜରିଆରେ ୨୪୬୮.୫୦ ଏକର ବେସରକାରୀ ଏବଂ ୫୭୧.୮୯ ଏକର ସରକାରୀ ଜମି ଯୋଗାଇ ଦିଆଯାଇଛି। ଇତିମଧ୍ୟରେ ସୁକିନ୍ଦା-ଅନୁଗୋଳ ନୂତନ ରେଳ ଲିଙ୍କ୍ ପ୍ରକଳ୍ପ କାର୍ଯ୍ୟ ଶେଷ ହେବାକୁ ବସିଛି। ଏହିକ୍ରମରେ ଟାଟା ଷ୍ଟିଲ କାରଖାନାର ନିକଟସ୍ଥ ନୂତନ ରେଳ ଷ୍ଟେଶନ ଡୁବୁରୀଠାରୁ ଟାଟା ଷ୍ଟିଲ ୟାର୍ଡ ପର୍ଯ୍ୟନ୍ତ ରେଳ ସଂଯୋଗ କରିବାକୁ ପ୍ରସ୍ତାବ ରହିଛି। ତେଣୁ ଭୁବନେଶ୍ୱର ପୂର୍ବତଟ ରେଳପଥଙ୍କ ଦ୍ୱାରା ୭ ଗ୍ରାମର ୧୩୫.୩୦୦ ଏକର ଜମି ଅଧିଗ୍ରହଣ ଆବଶ୍ୟକ ରହିଛି। ତେଣୁ ଜମି ଅଧିଗ୍ରହଣ ପାଇଁ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଘୋଷଣା କରାଯାଇଛି। ପୂର୍ବରୁ ଇଡ୍କୋ ପକ୍ଷରୁ ହୋଇଥିବା ଜମି ଅଧିଗ୍ରହଣ ସମୟରେ ବ୍ୟାପକ ତ୍ରୁଟି ଏବଂ ପାତରଅନ୍ତର ଅଭିଯୋଗ କରାଯାଇ ଗୁଳିକାଣ୍ଡ ପର୍ଯ୍ୟନ୍ତ ଘଟଣା ଘଟିଥିଲା। ସେହି ଦୃଷ୍ଟିରୁ ଉପରୋକ୍ତ ପରିମାଣ ଜମି ଅଧିଗ୍ରହଣ ସେତେଟା ସହଜ ହେବ ନାହିଁ ବୋଲି ବର୍ତ୍ତମାନ ଜିଲାରେ ଚର୍ଚ୍ଚାର ବିଷୟ ହୋଇଛି।
ପୂର୍ବତଟ ରେଳପଥ ପକ୍ଷରୁ ସୁକିନ୍ଦା-ଅନୁଗୋଳ ନୂତନ ରେଳ ଲିଙ୍କ୍ ପ୍ରକଳ୍ପ କାର୍ଯ୍ୟରେ ଯାଜପୁର, ଢେଙ୍କାନାଳ ଓ ଅନୁଗୋଳ ଜିଲାର ୧୨୭ ଗ୍ରାମର ଜମି ଅଧିଗ୍ରହଣ ହେଉଛି। କେନ୍ଦ୍ର ସରକାରଙ୍କ ରେଳ ମନ୍ତ୍ରଣାଳୟର ଅବହେଳା କାରଣରୁ କେତେକ ଜମି ଅଧିଗ୍ରହଣରେ ଅର୍ଥ ମଞ୍ଜୁର ବାଧକ ସାଜିଥିବା ଯୋଗୁ ବିଭିନ୍ନ ସମସ୍ୟା ସୃଷ୍ଟି ହୋଇଛି। ତେବେ ବର୍ତ୍ତମାନ ଜମି ଅଧିଗ୍ରହଣ ସମସ୍ୟାର ସମାଧାନ ହେବା ସହ ରେଳ ପ୍ରକଳ୍ପ କାର୍ଯ୍ୟ ସୁରୁଖୁରୁରେ ଚାଲିଥିବା ଜଣାପଡ଼ିଛି। ଏଭଳି ସ୍ଥିତିରେ ଡୁବୁରୀଠାରୁ ଟାଟା ଷ୍ଟିଲ ୟାର୍ଡ ପର୍ଯ୍ୟନ୍ତ ପୁଣି ଜମି ଅଧିଗ୍ରହଣ କାର୍ଯ୍ୟ ପୂର୍ବତଟ ରେଳପଥ କର୍ତ୍ତୃପକ୍ଷଙ୍କ ପାଇଁ ଚ୍ୟାଲେଞ୍ଜ ହେବ ବୋଲି ମତପ୍ରକାଶ ପାଇଛି।
ପ୍ରସ୍ତାବିତ ଭୂମି ଅଧିଗ୍ରହଣ ଅନୁସୂଚୀର ରିପୋର୍ଟ ଅନୁସାରେ ଯାଜପୁର ଜିଲାର ସୁକିନ୍ଦା ତହସିଲ ଅନ୍ତର୍ଗତ ସଂସାଇଲୋ ଗ୍ରାମର ୫୯.୫୯୦ ଏକର, ଓଳିଆ ଗ୍ରାମର ୮.୨୦୦ ଏକର, ଅଭୟପୁର ଗ୍ରାମର ୧୩.୮୯୦ ଏକର, ହାତିମୁଣ୍ଡା ଗ୍ରାମର ୩୬.୮୩୦ ଏକର, ଗୋବରଘାଟି ଗ୍ରାମର ୧୧.୪୦୦ ଏକର, ବାରଗାଡିଆ ଗ୍ରାମର ୧.୩୬୦ ଏକର ଏବଂ ଡୁବୁରୀ ଗ୍ରାମର ୪.୦୩୦ ଏକର ବେସରକାରୀ ଜମି ରହିଛି। ସୂଚନାଯୋଗ୍ୟ ଯେ, ୨୦୧୫ ନଭେମ୍ବର ୧୮ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟାଟା ଷ୍ଟିଲ୍ ପ୍ରକଳ୍ପକୁ ଲୋକାର୍ପଣ କରିଥିଲେ। ଏହା ୨୦୧୬ ମେ ମାସରେ ବ୍ୟବସାୟିକ ଉପତ୍ାଦନ ଆରମ୍ଭ କରିଥିଲା। ପ୍ରଥମ ପର୍ଯ୍ୟାୟରେ ୨୫ହଜାର କୋଟି ଟଙ୍କା ବିନିଯୋଗ କରାଯାଇ ବାର୍ଷିକ ୩ ନିୟୁତ ମେଟ୍ରିକ ଟନ୍ ଷ୍ଟିଲ୍ ଉତ୍ପାଦନ କରାଯାଇଥିଲା। ଏହି କାରଖାନାରେ ପ୍ରାୟ ୪ ହଜାର ନିୟମିତ ଓ ୧୦ ହଜାର ଲୋକ ଠିକା ଶ୍ରମିକ ଭାବେ ନିଯୁକ୍ତି ପାଇଛନ୍ତି। ଏଥିରେ ୬୦ ଭାଗରୁ ଉର୍ଦ୍ଧ୍ୱ ସ୍ଥାନୀୟ ନିଯୁକ୍ତି ରହିଛି ବୋଲି କମ୍ପାନୀ ପକ୍ଷରୁ ଦାବି କରାଯାଉଛି। ଏହାବାଦ୍ ଟାଟା ଷ୍ଟିଲ ପକ୍ଷରୁ ବିଭିନ୍ନ ପାରିପାର୍ଶ୍ୱିକ ବିକାଶ ସହ ପାନୀୟଜଳ, ଶିକ୍ଷା, ଗମନାଗମନ, କ୍ରୀଡ଼ା ଇତ୍ୟାଦି କ୍ଷେତ୍ରକୁ ଅଗ୍ରାଧିକାର ଦିଆଯାଉଛି ବୋଲି ମତପ୍ରକାଶ ପାଇଛି। ତେଣୁ ଲୋକଙ୍କ ଆର୍ଥିକ ଅଭିବୃଦ୍ଧି ସହ ଜୀବନଧାରଣରେ ବଡ଼ ପରିବର୍ତ୍ତନ ପାଇଁ ସ୍ବଚ୍ଛତା ଅବଲମ୍ବନ କରି ଜମି ଅଧିଗ୍ରହଣରେ ସହଯୋଗ କରିବାକୁ ପ୍ରଶାସନ ପକ୍ଷରୁ ଆଶା କରାଯାଇଛି। ଏ ସଂକ୍ରାନ୍ତରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ରଙ୍କୁ ପଚାରିବାରୁ ସେ କହିଛନ୍ତି, ଏହି ପ୍ରସ୍ତାବିତ ରେଳ ଲାଇନ ଟାଟା ଷ୍ଟିଲର ନୁହେଁ। ଏଥିରେ ରେଳ ମନ୍ତ୍ରଣାଳୟର ରାଜସ୍ବ ବଢ଼ିବା ଲକ୍ଷ୍ୟ ରହିଛି। ତେଣୁ ସମସ୍ତେ ଏହି ପ୍ରକଳ୍ପକୁ ସହଯୋଗ କରିବାର ଆବଶ୍ୟକତା ରହିଛି।