ଭୁବନେଶ୍ୱର, ୩୦।୯(ବ୍ୟୁରୋ): ଆଶ୍ଚର୍ଯ୍ୟ ହେଲେ ବି ସତ। ଏକ ବ୍ଲାଇଣ୍ଡ୍ ସ୍କୁଲ ବା ଦୃଷ୍ଟିହୀନ ବିଦ୍ୟାଳୟ ପରିସର କୂଅ ଭିତରୁ ମିଳିଥିବା ବ୍ଲାଇଣ୍ଡ୍ ଇଲ୍ (ଯେଉଁ ଇଲ୍ର ଆଖି ନାହିଁ)କୁ ଏକ ନୂଆ ପ୍ରଜାତିର ମାଛ ଭାବେ ମାନ୍ୟତା ମିଳିଛି। ଏହା ଉପରେ ଭାରତର ୪ଜଣ ଗବେଷକ ୨୦୧୯ରୁ ଗବେଷଣା ଜାରି ରଖିଥିଲେ। ଏହି ଗବେଷଣା ନିବନ୍ଧଟି ମାଛଙ୍କ ଉପରେ ପ୍ରକାଶିତ ହେଉଥିବା ବିଶ୍ୱର ଅନ୍ୟତମ ଶ୍ରେଷ୍ଠ ଜର୍ନାଲ ‘ଆକୁଆ: ଇଣ୍ଟରନ୍ୟାଶନାଲ ଜର୍ନାଲ ଅଫ୍ ଇକ୍ଥିଓଲୋଜି’ର ସଦ୍ୟତମ ସଂସ୍କରଣରେ ପ୍ରକାଶିତ ହୋଇଛି। ୪ଜଣ ଗବେଷକଙ୍କ ମଧ୍ୟରେ ଜଣେ ଓଡ଼ିଆ ମଧ୍ୟ ଅଛନ୍ତି। ସେ ହେଲେ ଗୋପାଳପୁରସ୍ଥିତ ଜୁଲୋଜିକାଲ ସର୍ଭେ ଅଫ୍ ଇଣ୍ଡିଆ(ଜେଡ୍ଏସ୍ଆଇ)ର ସାଇଣ୍ଟିଷ୍ଟ ଇନ୍ଚାର୍ଜ ଡ. ଅନିଲ ମହାପାତ୍ର। ଅନ୍ୟ ୩ଜଣ ହେଲେ ଜୟାସିମ୍ହାନ୍ ପ୍ରବୀନରାଜ, ତେଜସ୍ ଠାକରେ ଓ ଆନମ୍ ପଓ୍ବନ କୁମାର। ସେହି ନୂଆ ପ୍ରଜାତି ବ୍ଲାଇଣ୍ଡ୍ ଇଲ୍ର ବୈଜ୍ଞାନିକ ନାମ ରଖାଯାଇଛି ରକ୍ଥାମିକ୍ଥିସ୍ ମୁମ୍ବା(Rakthamichthys Mumba)। ଏହାର ସାଧାରଣ ନାମ ‘ମୁମ୍ବାଇ ବ୍ଲାଇଣ୍ଡ୍ ଇଲ୍’ ଦିଆଯାଇଛି।
୨୦୧୯ରେ ମହାରାଷ୍ଟ୍ରର ମୁମ୍ବାଇର ଯୋଗେଶ୍ୱରୀ ୱେଷ୍ଟରେ ଥିବା ଏକ ବ୍ଲାଇଣ୍ଡ୍ ସ୍କୁଲ ପରିସର କୂଅରେ ଏଭଳି ବିରଳ ମାଛ ଦେଖିବାକୁ ମିଳିଥିଲା। ପମ୍ପ ଦ୍ୱାରା ପାଣି ଶୁଖାଇ ୫ଟି ବ୍ଲାଇଣ୍ଡ୍ ଇଲ୍ ଧରାଯାଇ ଗବେଷଣା କରାଯାଇଥିଲା। ଏହି ଗବେଷଣାରୁ ୫ଟି ଯାକ ସ୍ପେସିମେନ୍କୁ ପରୀକ୍ଷା ନିରୀକ୍ଷା କରିବାରୁ ଏହା ସାରା ବିଶ୍ୱରେ ମିଳୁଥିବା ଅନ୍ୟସବୁ ବ୍ଲାଇଣ୍ଡ୍ ଇଲ୍ ପ୍ରଜାତିଠାରୁ ଭିନ୍ନ ଥିବା ଜଣାପଡ଼ିଥିଲା। ଏହାର ଡିଏନ୍ଏ ଆନାଲିସିସ ଗୋପାଳପୁର ଜେଡ୍ଏସ୍ଆଇ ଡିଏନ୍ଏ ଲାବରେଟୋରିରେ ହୋଇଥିବାବେଳେ ଡ. ଅନିଲ ମହାପାତ୍ର ଦାୟିତ୍ୱରେ ଥିଲେ। ଡିଏନ୍ଏ ଆନାଲିସିସରେ ଏହି ନୂଆ ବ୍ଲାଇଣ୍ଡ୍ ଇଲ୍ଟି ନିଜର ନିକଟ ସମ୍ପର୍କୀୟଙ୍କଠାରୁ ପ୍ରାୟ ୨୩ % ଅଲଗା ଥିଲା। ଏହା ଦେଖିବାକୁ ପତଳା, ୨୬୫ ମିଲିମିଟର ପର୍ଯ୍ୟନ୍ତ ବଢ଼ିଥାନ୍ତି ଏବଂ ଦେହର ରଙ୍ଗ ଗୋଲାପୀ-ନାଲି ରଙ୍ଗର ହୋଇଥାଏ। ଏହି ଇଲ୍ରେ ଆଖି, ଫିନ୍ ଓ କାତି ନ ଥାଏ। ଅଦ୍ୟାବଧି ଏହି ମୁମ୍ବାଇ ବ୍ଲାଇଣ୍ଡ୍ ଇଲ୍ କେବଳ ସେହି ଦୃଷ୍ଟିହୀନ ସ୍କୁଲ କୂଅରୁ ହିଁ ଦେଖିବାକୁ ମିଳିଛି। ଏହା ଏକ ମଧୁର ଜଳ ଇଲ୍। ଓଡ଼ିଶାରେ ଯଦି କାହା ବାଡ଼ିରେ ଥିବା କୂଅ ଭିତରୁ କେବେ ଏହି ପରି କିଛି ଇଲ୍ ବା ଅନ୍ୟ କିଛି ଚିହ୍ନି ନ ପାରୁ ଥିବା ମାଛ ବା ଅନ୍ୟ କିଛି ଜୀବ ମିଳନ୍ତି, ତେବେ ତାହାକୁ ମାରି ବା ଫୋପାଡ଼ି ନ ଦେଇ ଜେଡ୍ଏସ୍ଆଇ ଗୋପାଳପୁର କାର୍ଯ୍ୟାଳୟକୁ ଜଣାଇବାକୁ ଡ. ମହାପାତ୍ର ନିବେଦନ କରିଛନ୍ତି। ଉଲ୍ଲେଖଯୋଗ୍ୟ, ଏହି ନୂଆ ପ୍ରଜାତି ଇଲ୍ର ଫୋଟୋକୁ ଆକୁଆ ଜର୍ନାଲ ତା’ର କଭର ପୃଷ୍ଠାରେ ସ୍ଥାନ ଦେଇଛି।