ନୂଆଦିଲ୍ଲୀ,୬।୧୧ : ପୂର୍ବ ଲଦାଖରେ ଥିବା ବାସ୍ତବିକ ନିୟନ୍ତ୍ରଣ ରେଖା (ଏଲଏସି) ରେ ଚାଲିଥିବା ଉତ୍ତେଜନା ମଧ୍ୟରେ ଭାରତ-ଚାଇନା ସମ୍ପର୍କ ଉପରେ ଏକ ନୂତନ ରଣନୀତି ପ୍ରସ୍ତୁତ କରାଯାଉଛି। ସୋମବାରଠାରୁ ଦିଲ୍ଲୀରେ ଆରମ୍ଭ ହେବାକୁ ଥିବା ପାଞ୍ଚ ଦିନିଆ ମିଲିଟାରୀ କମାଣ୍ଡର୍ସ ସମ୍ମିଳନୀରେ ଏହି କାର୍ଯ୍ୟ ଯୋଜନା ଉପରେ ନିଷ୍ପତ୍ତି ନିଆଯିବ। ଏହା ସହିତ ସୁରକ୍ଷା ଦୃଷ୍ଟିକୋଣରେ ବୃଦ୍ଧି ପାଉଥିବା ବୈଷୟିକ ଚ୍ୟାଲେଞ୍ଜର ମୁକାବିଲା ପାଇଁ ଏକ ବ୍ଲୁ ପ୍ରିଣ୍ଟ ମଧ୍ୟ ପ୍ରସ୍ତୁତ ହେବ ।
ପ୍ରତିରକ୍ଷା ମନ୍ତ୍ରଣାଳୟର ସୂଚନା ଅନୁଯାୟୀ, ନଭେମ୍ବର ୭ ରୁ୧ ୧ ପର୍ଯ୍ୟନ୍ତ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେଙ୍କ ନେତୃତ୍ୱରେ ସମସ୍ତ କମାଣ୍ଡର, ସାମରିକ ବ୍ୟାପାର ବିଭାଗ ତଥା ପ୍ରତିରକ୍ଷା ବିଭାଗର ମୁଖ୍ୟ ତଥା ବରିଷ୍ଠ ଅଧିକାରୀମାନେ ସୁରକ୍ଷାର ବିଭିନ୍ନ ଦିଗ ଉପରେ ଆଲୋଚନା କରିବେ। ଏହି ସମ୍ମିଳନୀରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟ ସମ୍ବୋଧିତ କରିବେ।
ଏହା ସହିତ ସେନା, ବାୟୁସେନା ଏବଂ ନୌସେନା ମୁଖ୍ୟଙ୍କ ସହ ପୃଥକ ବୈଠକ ହେବ। ବର୍ଷକୁ ଦୁଇଥର ଆୟୋଜିତ ଏହି ସମ୍ମିଳନୀ ପ୍ରଶାସନିକ-ରଣନୀତିକ ନୀତି ଏବଂ ରଣନୀତି ସ୍ଥିର କରିବା ପାଇଁ ଏକ ଉଚ୍ଚ ସ୍ତରୀୟ ଫୋରମ ଭାବେ କାର୍ଯ୍ୟ କରିଥାଏ। ସେନା ଉତ୍ପାଦନ, ମାନବ ସମ୍ବଳ ଏବଂ ପ୍ରଶିକ୍ଷଣରେ ଆତ୍ମନିର୍ଭରଶୀଳତା ନେଇ ନୂତନ ନୀତିଗତ ନିଷ୍ପତ୍ତି ନିଆଯିବ ବୋଲି ମନ୍ତ୍ରଣାଳୟ ସୂଚନା ଦେଇଛି। ଏହି ସମ୍ମିଳନୀରେ ସେନାର ତିନି ବିଭାଗର ଅଧିକାରୀମାନେ ମଧ୍ୟ ରୁଷିଆ-ୟୁକ୍ରେନ ଯୁଦ୍ଧ ଉପରେ ଅଧ୍ୟୟନ ଉପରେ ଦୀର୍ଘ ସମୟ ଆଲୋଚନା କରିବାକୁ ଯୋଜନା କରୁଛନ୍ତି। ପୂର୍ବ ଲଦାଖର ସାମ୍ପ୍ରତିକ ପରିସ୍ଥିତି ସହିତ ସମୁଦ୍ରରେ ଚାଇନାର କାର୍ଯ୍ୟକଳାପ ଉପରେ ଏକ ଆକ୍ସନ ପ୍ଲାନ ମଧ୍ୟ ପ୍ରସ୍ତୁତ କରାଯିବ।