ଭୁବନେଶ୍ୱର,୪।୧୦ (ବ୍ୟୁରୋ): ମାଓବାଦୀଙ୍କୁ ନିପାତ କରିବା ପାଇଁ ପ୍ରସ୍ତୁତ ହେଉଛି ନୂଆ ରଣନୀତି। ଏଥିପାଇଁ ଆବଶ୍ୟକ ସମସ୍ତ ସହଯୋଗ କେନ୍ଦ୍ର ସରକାର ଯୋଗାଇ ଦେବେ। ଶନିବାର ଭୁବନେଶ୍ୱରଠାରେ ଓଡ଼ିଶାର ମାଓବାଦୀ ମୁକାବିଲା ରଣନୀତିର ସମୀକ୍ଷା କରିବାବେଳେ ସ୍ବରାଷ୍ଟ୍ର ମନ୍ତ୍ରଣାଳୟର ବରିଷ୍ଠ ସୁରକ୍ଷା ପରାମର୍ଶଦାତା କେ.ବିଜୟ କୁମାର ଏହି ପ୍ରତିଶ୍ରୁତି ଦେଇଛନ୍ତି। ଏନେଇ ରାଜ୍ୟ ଗୋଇନ୍ଦା ମୁଖ୍ୟାଳୟଠାରେ ଏକ ଉଚ୍ଚସ୍ତରୀୟ ବୈଠକ ବସିଥିଲା। ତାଙ୍କ ସହ ଓଡ଼ିଶା ଗସ୍ତରେ ଆସିଥିବା ସିଆର୍ପିଏଫ୍ ଡିଜି ଏ.ପି. ମାହେଶ୍ୱରୀ ମଧ୍ୟ ଉକ୍ତ ବୈଠକରେ ଯୋଗଦେଇଥିଲେ। ରାଜ୍ୟରେ ବର୍ତ୍ତମାନର ମାଓବାଦୀଙ୍କ ସ୍ଥିତି ବାବଦରେ ପୁଙ୍ଖାନୁପୁଙ୍ଖ ଆଲୋଚନା କରାଯାଇଥିଲା। ମାଓବାଦୀ ପ୍ରଭାବକୁ ପ୍ରତିହତ କରିବା ପାଇଁ ନିଆଯାଇଥିବା ପଦକ୍ଷେପର ଅଗ୍ରଗତି, ନୂଆ ରଣକୌଶଳ, କେନ୍ଦ୍ରୀୟ ସଶସ୍ତ୍ର ପୋଲିସ ବଳର ପୁନଃ ମୁତୟନ, ରାଜ୍ୟ ପୋଲିସ ଓ କେନ୍ଦ୍ରୀୟ ପୋଲିସ ବଳ ମଧ୍ୟରେ ଉଚିତ ସମନ୍ବୟ ରକ୍ଷା ଏବଂ ଏକ୍ଷେତ୍ରରେ ଆବଶ୍ୟକ ସହାୟତା ଓ ସହଯୋଗ ସଂକ୍ରାନ୍ତରେ ଗୁରୁତ୍ୱପୂର୍ଣ୍ଣ ଆଲୋଚନା ହେବା ସହ କେତେକ ନିଷ୍ପତ୍ତି ହୋଇଥିଲା।
ରାଜ୍ୟର ଅତି ମାଓବାଦୀ ପ୍ରବଣ ଅଞ୍ଚଳରେ କେନ୍ଦ୍ରୀୟ ସୁରକ୍ଷା ବଳ (ସିଆର୍ପିଏଫ୍) ସହଯୋଗରେ ମାଓବାଦୀ ଦମନ କାର୍ଯ୍ୟକୁ ଅଧିକ ତ୍ୱରାନ୍ବିତ କରାଯିବାକୁ ନିଷ୍ପତ୍ତି ହୋଇଛି। ଏହି ପରିପ୍ରେକ୍ଷୀରେ କଳାହାଣ୍ଡି, କନ୍ଧମାଳ ଓ ନବରଙ୍ଗପୁର ଜିଲାରେ ସିଆର୍ପିଏଫ୍ର ପୁନଃ ମୁତୟନ ପ୍ରସଙ୍ଗକୁ ବୈଠକରେ ଗୁରୁତ୍ୱ ଦିଆଯାଇଥିଲା। ଏହାସହ ଏହି ସବୁ ଜିଲାରେ ମାଓବାଦୀଙ୍କ ଗତିବିଧି ନେଇ ଆଲୋଚନା ହେବା ପରେ ଏଥିଲାଗି କେନ୍ଦ୍ର ସରକାର ଆର୍ଥିକ ସହାୟତା ଯୋଗାଇବାକୁ ପ୍ରସ୍ତୁତ ଅଛନ୍ତି ବୋଲି ବିଜୟ କୁମାର ସୂଚନା ଦେଇଥିଲେ। ସେ କହିଲେ, ଆନ୍ଧ୍ର ଓ ଓଡ଼ିଶା ପୋଲିସ ମଧ୍ୟରେ ଥିବା ଉତ୍ତମ ସମନ୍ବୟକୁ କେନ୍ଦ୍ର ସରକାର ପ୍ରଶଂସା କରିଛନ୍ତି। ମାଓବାଦୀ ଦମନ କ୍ଷେତ୍ରରେ ପୂର୍ବରୁ ଦୁଇ ରାଜ୍ୟର ପୋଲିସ ପରସ୍ପର ମଧ୍ୟରେ ଉତ୍ତମ ସମନ୍ବୟ ଯୋଗୁ ଯଥେଷ୍ଟ ସଫଳତା ମଳିଛି। ତେଣୁ ଏହି ଢାଞ୍ଚାରେ ସିଆର୍ପିଏଫ୍ ସହ ରାଜ୍ୟ ପୋଲିସ ସମନ୍ବୟ ରକ୍ଷା କରି ଓଡ଼ିଶାରେ ମାଓବାଦୀ ଦମନ କାର୍ଯ୍ୟକୁ ଆଗେଇ ନେବା ପାଇଁ ବୈଠକରେ ସ୍ଥିର ହୋଇଛି। ଏହି ବୈଠକରେ ଓଡ଼ିଶା ଡିଜିପି ଅଭୟ, ସିଆର୍ପିଏଫ୍ ସ୍ପେଶାଲ ଡିଜି କୁଲଦୀପ ସିଂହ, ବିଏସ୍ଏଫ ଏଡିଜି ଏସ୍.ଏଲ୍ ଥାଓସେସ୍, ଓଡ଼ିଶା ଗୋଇନ୍ଦା ବିଭାଗ ନିର୍ଦ୍ଦେଶକ ଆର୍.କେ. ଶର୍ମା ଓ ଆଇଜି (ଅପରେଶନ୍) ଅମିତାଭ୍ ଠାକୁର ଉପସ୍ଥିତ ରହି ଦୁଇ କେନ୍ଦ୍ରୀୟ ଅଧିକାରୀଙ୍କ ସହ ଆଲୋଚନା କରିଥିଲେ।