ନୂଆଦିଲ୍ଲୀ,୨୯।୬: କରୋନା ସଂକ୍ରମଣ ଏବେ ସାରା ବିଶ୍ୱ ପାଇଁ ଚିନ୍ତାର କାରଣ ପାଲଟିଛି। ହେଲେ ଏପର୍ଯ୍ୟନ୍ତ ବି କରୋନା ଲକ୍ଷଣକୁ ନେଇ ଅନେକ ଲୋକ ଅନ୍ଧାର ମଧ୍ୟରେ ରହିଛନ୍ତି। ଦେଶରେ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଉଥିବା ବେଳେ ଏବେ ସୁଦ୍ଧା ଭାରତରେ ସଂକ୍ରମିତଙ୍କ ସଂଖ୍ୟା ୫.୨୮ ଲକ୍ଷରୁ ଅଧିକ ହୋଇ ଗଲାଣି। ଇତି ମଧ୍ୟରେ କରୋନା ସଂକ୍ରମଣର ନୂଆ ଲକ୍ଷଣ ସାମ୍ନାକୁ ଆସିଛି। ଆଉ ଏହି ନୂଆ ଲକ୍ଷଣକୁ ନେଇ ସ୍ବାସ୍ଥ୍ୟ ବିଭାଗର ଚିନ୍ତା ବଢି ଯାଇଛି। ଏପର୍ଯ୍ୟନ୍ତ ଜଣାଥିଲା କି ଜ୍ୱର ହେବା, ନିଶ୍ୱାସ ନେବାରେ କଷ୍ଟ ଅନୁଭବ କରିବା, ଶୁଖିଲା କାଶ ହେବା, ଥକ୍କା ଲାଗିବା ଭଳି ଶାରୀରିକ ପରିବର୍ତ୍ତନ କରୋନାର ଲକ୍ଷଣ। ଏହିସବୁ ଲକ୍ଷଣ ଥିବା ଲୋକଙ୍କୁ ତୁରନ୍ତ କରୋନା ପରୀକ୍ଷା କରିବାକୁ କୁହାଯାଉଥିଲା। ହେଲେ ଏବେ ଆମେରିକାର ମେଡିକାଲ ହେଲ୍ଥ ସେଣ୍ଟର ଫର୍ ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନଶନ କରୋନାର ଆଉ ୩ ନୂଆ ଲକ୍ଷଣ ସମ୍ପର୍କରେ ସୂଚନା ଦେଇଛି। ଏହିସବୁ ଲକ୍ଷଣ ଭାରତରେ ମୌସୁମୀ ଆସିବା ପରେ ଅଧିକ ମାତ୍ରାରେ ଦେଖାଯିବ ବୋଲି ଅନୁମାନ କରାଯାଇଛି। ସୂଚନା ଅନୁଯାୟୀ, କରୋନା ୩ ନୂଆ ଲକ୍ଷଣ ହେଉଛି ନାକରୁ ପାଣି ବୋହିବା, ବାନ୍ତି ଲାଗିବା ଓ ଡାଇରିଆ ହେବା। ଏହାମଧ୍ୟ କରୋନାର ଲକ୍ଷଣ ବୋଲି କହିଛି ଆମେରିକାର ମେଡିକାଲ ହେଲ୍ଥ ସେଣ୍ଟର ଫର୍ ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନଶନ। ତେଣୁ ଏସବୁ ଲକ୍ଷଣ ଦେଖାଦେଲେ ଅବହେଳା ନ କରି ତୁରନ୍ତ କରୋନା ଟେଷ୍ଟ କରାଇନେବା ଜରୁରୀ ବୋଲି କୁହାଯାଇଛି।
