ଓ୍ବେଲିଂଟନ, ୧୦ା୭ (ପି.ଟି.)-ଚଳିତବର୍ଷ ସ୍ଥଗିତ ରଖାଯାଇଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ପାଇଁ ନ୍ୟୁଜିଲାଣ୍ଡ ଆଗ୍ରହ ପ୍ରକାଶ କରିଥିବା ଯାହା ଶୁଣାଯାଉଛି ତାହା ଠିକ୍ ନୁହେଁ। ତାହା ଏକ ଗୁଜବ ମାତ୍ର। କିନ୍ତୁ ଫ୍ୟୁଚର ଟୁର୍ ପ୍ରୋଗ୍ରାମ୍ ପାଇଁ ନ୍ୟୁଜିଲାଣ୍ଡ କ୍ରିକେଟ(ଏନ୍ଜେଡ୍ସି) ପ୍ରତିଶ୍ରୁତିବଦ୍ଧ ବୋଲି ନ୍ୟୁଜିଲାଣ୍ଡ କ୍ରିକେଟ(ଏନ୍ଜେଡ୍ସି)ର ମୁଖପାତ୍ର ରିଚାର୍ଡ ବ୍ରୁକ୍ସ କହିଛନ୍ତି। ଆଇପିଏଲ ଚଳିତ ବର୍ଷ ମାର୍ଚ୍ଚରେ ହେବାର କାର୍ଯ୍ୟକ୍ରମ ଥିଲା। ମାତ୍ର କୋଭିଡ୍-୧୯ ଯୋଗୁ ଏହାକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ନ୍ୟୁଜିଲାଣ୍ଡକୁ ଯଦି ଅବା ଆଇପିଏଲ୍ ଆୟୋଜନ ପାଇଁ ଅଫର୍ ଦିଆଯାଏ ତାହାକୁ ବର୍ତ୍ତମାନ ପରିସ୍ଥିତିରେ ଆୟୋଜନ କରିବା ସମ୍ଭବପର ନୁହେଁ ବୋଲି ବ୍ରୁକ୍ସ କହିଛନ୍ତି। ଏନ୍ଜେଡ୍ସି ଯଦି ଫ୍ୟୁଚର ଟୁର୍ ପ୍ରୋଗ୍ରାମ୍କୁ କାର୍ଯ୍ୟକାରୀ କରେ ତେବେ ଏହି ଟି୨୦ ଇଭେଣ୍ଟ ଆୟୋଜନ ପାଇଁ ସମୟ ଅଭାବ ରହିବ। ମହାମାରୀ ଯୋଗୁ ଆଇପିଏଲ୍ ଯଦି ବିଦେଶରେ ହୁଏ ତେବେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଓ ଶ୍ରୀଲଙ୍କା ପରେ ନ୍ୟୁଜିଲାଣ୍ଡ ମଧ୍ୟ ଟୁର୍ନାମେଣ୍ଟ ଆୟୋଜନ ଦୌଡ଼ରେ ଅଛି। କରୋନା ମହାମାରୀ ଯେପରି ଭାବେ ବ୍ୟାପିବାରେ ଲାଗିଛି ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ୍କୁ ସ୍ଥଗିତ ରଖାଯିବା ଯଥେଷ୍ଟ ସମ୍ଭାବନା ରହିଛି। ଯଦି ଏହା କାର୍ଯ୍ୟକାରୀ ହୁଏ ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସେପ୍ଟେମ୍ବର-ନଭେମ୍ବରରେ ଆଇପିଏଲ ଆୟୋଜନ କରିବା ଲାଗି ନଜର ରଖିଛି। ଇଣ୍ଡିଆନ ପ୍ରିମିୟର ଲିଗ୍ର ୧୨ ବର୍ଷ ଇତିହାସରେ ଏହା ଥରେ ମାତ୍ର ବିଦେଶରେ ଆୟୋଜନ ହୋଇଛି। ୨୦୦୯ରେ ଦେଶରେ ସାଧାରଣ ନିର୍ବାଚନ ଯୋଗୁ ଟୁର୍ନାମେଣ୍ଟକୁ ଦକ୍ଷିଣ ଆଫ୍ରିକାରେ ଆୟୋଜନ କରିବାକୁ ପଡ଼ିଥିଲା।