ୱେଲିଂଟନ,୨୯ ।୧: ନ୍ୟୁଜିଲାଣ୍ଡର ସବୁଠାରୁ ବଡ ସହର ଅକଲାଣ୍ଡ ସହରରେ ଲଗାତାର ମୁଷଳ ଧାରରେ ବର୍ଷା ହେବା ଫଳରେ ବନ୍ୟା ପରିସ୍ଥିତି ଉପୁଜିଛି । ଏଥିରେ ଏବେ ପର୍ଯ୍ୟନ୍ତ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ନିଖୋଜ ଥିବା ଜଣାପଡିଛି । ପୋଲିସ ଶନିବାର ଏହି ସୂଚନା ଦେଇଛି । ଏହାରି ଭିତରେ ଅଧିକାରୀମାନେ ଓକଲାଣ୍ଡରେ ଜରୁରୀ ପରିସ୍ଥିତି ଘୋଷଣା କରିଛନ୍ତି । ଶୁକ୍ରବାର ରାତିରେ କିଛି ସ୍ଥାନରେ ପ୍ରାୟ ୩ ଘଣ୍ଟାରେ ୧୫ ସେଣ୍ଟିମିଟର(୬ଇଞ୍ଚ) ବର୍ଷା ରେକର୍ଡ କରାଯାଇଥିଲା ।
ନ୍ୟୁଜିଲାଣ୍ଡର ନୂଆ ପ୍ରଧାନମନ୍ତ୍ରୀ କ୍ରିସ ହିପକିନ୍ସ ବର୍ଷାରେ ହୋଇଥିବା କ୍ଷୟକ୍ଷତିର ଆକଳନ କରିବା ପାଇଁ ସେନା ବିମାନରେ ସହର ନିରିକ୍ଷଣ କରିଥିଲେ । ଜୈସିଂଡା ଅର୍ଡର୍ନଙ୍କ ଇସ୍ତଫା ପରେ ହିପକିନ୍ସ ବୁଧବାର ପ୍ରଧାନମନ୍ତ୍ରୀ ପଦ ପାଇଁ ଶପଥ ନେଇଛନ୍ତି ।
ହିପକିନ୍ସ କହିଛନ୍ତି ବର୍ଷା ଅକଲାଣ୍ଡ ସହରକୁ ସମ୍ପୂର୍ଣ୍ଣ ଭାବେ ପ୍ରଭାବିତ କରିଛି । ତେବେ ଆଗକୁ ଏଠାରେ ଅଧିକ ବର୍ଷାର ସମ୍ଭାବନା ଥିବାରୁ ଲୋକେ ସତର୍କ ରହିବାକୁ ସେ କହିଛନ୍ତି । ଏହା ପୂର୍ବରୁ ଅକଲାଣ୍ଡର ବିମାନ ବନ୍ଦରର କିଛି ଭାଗରେ ପାଣି ଜମା ହୋଇ ଯିବାରୁ କିଛି ବିମାନ ସେବାକୁ ବାତିଲ କରାଯାଇଥିଲା, ଯାହା ଫଳରେ ଶହ ଶହ ଯାତ୍ରୀ ବିମାନ ବନ୍ଦରରେ ରାତିରେ ଫସି ରହିଥିଲେ ।