ଡୁନେଡିନ୍,୨୧ା୩(ଏପି)-ଭ୍ରମଣକାରୀ ବାଂଲାଦେଶ ବିପକ୍ଷ ପ୍ରଥମ ଅନ୍ତର୍ଜାତୀୟ ଦିନିକିଆ କ୍ରିକେଟ ମ୍ୟାଚରେ ନ୍ୟୁଜିଲାଣ୍ଡ ୮ ଉଇକେଟରେ ସହଜ ବିଜୟ ହାସଲ କରିଛି। ଏହି ବିଜୟ ଦ୍ୱାରା ଦଳ ୩ ମ୍ୟାଚ ବିଶିଷ୍ଟ ସିରିଜରେ ୧-୦ରେ ଅଗ୍ରଣୀ ଲାଭ କରିଥିଲା। ସ୍ଥାନୀୟ ୟୁନିଭର୍ସିଟି ଓଭାଲଠାରେ ଅନୁଷ୍ଠିତ ଏହି ମ୍ୟାଚରେ ଘରୋଇ ଦଳ ଟସ୍ ଜିତି ପ୍ରଥମେ ଫିଲ୍ଡିଂ କରିବା ଲାଗି ନିଷ୍ପତ୍ତି ନେଇଥିଲା। ନ୍ୟୁଜିଲାଣ୍ଡ ପରିବେଶ ସହ ଭଲରୂପେ ଅଭ୍ୟସ୍ତ ନ ଥିବା ବାଂଲାଦେଶ ପ୍ରଥମେ ବ୍ୟାଟିଂ କରିବାକୁ ଯାଇ ୪୧.୫ ଓଭରରେ ୧୩୧ରନ କରି ଅଲଆଉଟ ହୋଇଯାଇଥିଲା। ଟପ୍ ସ୍କୋରର ମହମୁଦୁଲ୍ଲା ୫୪ ବଲ୍ରୁ ୨୭ ରନ କରିଥିଲେ। ମୁସ୍ଫିକର ରହିମ ୨୩ ରନ କରିଥିଲେ। ନ୍ୟୁଜିଲାଣ୍ଡ ପକ୍ଷରୁ ସବୁଠାରୁ ସଫଳ ବୋଲର ଟ୍ରେଣ୍ଟ ବୋଲ୍ଟ ୨୪ ରନ ବିନିମୟରେ ୪ ଉଇକେଟ ନେଇଥିବାବେଳେ ଜେମ୍ସ ନିଶାମ ଓ ମିଚଲେ ସାଣ୍ଟନର ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ। ଓପନର ମାର୍ଟିନ ଗୁପ୍ଟିଲ ୧୯ ବଲରେ ୩ ଚୌକା ଓ ୪ ଛକା ସହ ଦ୍ରୁତ ୩୮ରନ କରିଥିଲେ। ୫୦ତମ ଅନ୍ତର୍ଜାତୀୟ ଦିନିକିଆ ଖେଳୁଥିବା ହେନରୀ ନିକୋଲସ ୪୯ ରନ କରି ଅପରାଜିତ ରହିଥିଲେ। ଦ୍ୱିତୀୟ ଉଇକେଟରେ ସେ ଓ ଡେଭନ କନଓ୍ବେ (୨୭) ପାର୍ଟନରଶିପ୍ରେ ୬୫ ରନ ଯୋଗ କରିଥିଲେ। ନ୍ୟୁଜିଲାଣ୍ଡ ମାତ୍ର ୨୧.୨ ଓଭରରେ ୨ଉଇକେଟ ବିନିମୟରେ ବିଜୟ ପାଇଁ ଆବଶ୍ୟକ ରନ ସଂଗ୍ରହ କରିନେଇଥିଲା। ଟ୍ରେଣ୍ଟ ବୋଲ୍ଟ ମ୍ୟାନ ଅଫ୍ ଦି ମ୍ୟାଚ ବିବେଚିତ ହୋଇଥିଲେ।
ସଂକ୍ଷିପ୍ତ ସ୍କୋର
ବାଂଲାଦେଶ ଇନିଂସ: ୪୧.୫ ଓଭରରେ ୧୩୧/ଅଲଆଉଟ (ମହମୁଦୁଲ୍ଲା-୨୭, ମୁସ୍ଫିକର-୨୩; ବୋଲ୍ଟ-୪/୨୭, ସାଣ୍ଟନର-୨/୨୩, ନିଶାମ-୨/୨୭)।
ନ୍ୟୁଜିଲାଣ୍ଡ ଇନିଂସ: ୨୧.୨ ଓଭରରେ ୧୩୨/୨ (ହେନ୍ରୀ ନିକୋଲସ-୪୯, ଗୁପ୍ଟିଲ-୩୮, କନଓ୍ବେ-୨୭; ଟସ୍କିନ ଅହମ୍ମଦ-୧/୨୩)।