ସାଉଥାମ୍ପଟନ,୧୩।୬: ଆସନ୍ତା ୧୮ ତାରିଖରୁ ନ୍ୟୁଜିଲାଣ୍ଡ ବିପକ୍ଷରେ ଖେଳାଯିବାକୁ ଥିବା ବିଶ୍ୱ ଟେଷ୍ଟ ଚାମ୍ପିୟନଶିପ୍(ଡବ୍ଲ୍ୟୁଟିସି)ର ଫାଇନାଲ ପୂର୍ବରୁ ଟିମ୍ ଇଣ୍ଡିଆକୁ ଲାଗିଛି ଶକ୍ତ ଧକ୍କା। ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ ହାତରୁ ଚାଲି ଯାଇଛି ନମ୍ବର ଓ୍ବାନ ଟେଷ୍ଟ ଦଳର ମାନ୍ୟତା। ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ଇଂଲଣ୍ଡକୁ ୧-୦ ବ୍ୟବଧାନରେ ହରାଇ ନ୍ୟୁଜିଲାଣ୍ଡ ରବିବାର ଶୀର୍ଷ ସ୍ଥାନ ଅଧିକାର କରିଛି।
ଆଇସିସି ଦଳଗତ ଟେଷ୍ଟ ର଼୍ୟାଙ୍କିଙ୍ଗ୍ରେ ସର୍ବାଧିକ ୧୨୩ ପଏଣ୍ଟ ସହ ନ୍ୟୁଜିଲାଣ୍ଡ ଶୀର୍ଷକୁ ଉଠିଥିବାବେଳେ ଦ୍ୱିତୀୟ ସ୍ଥାନକୁ ଖସିଥିବା ଭାରତ ନିକଟରେ ରହିଛି ୧୨୧ ପଏଣ୍ଟ। ୧୦୮ ପଏଣ୍ଟ ସହ ଅଷ୍ଟ୍ରେଲିଆ ତାଲିକାର ତୃତୀୟ ସ୍ଥାନରେ ରହିଛି। ତା’ ପଛକୁ ରହିଛି ଇଂଲଣ୍ଡ (୧୦୭)। ତେବେ ଟେଷ୍ଟ ଭଳି ଦିନିକିଆ ଦଳଗତ ର଼୍ୟାଙ୍କିଙ୍ଗରେ ମଧ୍ୟ ନମ୍ବର ଓ୍ବାନ ପୋଜିଶନରେ ରହିଛି ନ୍ୟୁଜିଲାଣ୍ଡ।
