ଡିନେଡିନ୍ (ନ୍ୟୁଜିଲାଣ୍ଡ), ୨୬ା୨(ଏପି)- ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଅନ୍ତର୍ଜାତୀୟ ଟି୨୦ କ୍ରିକେଟ ମ୍ୟାଚ୍ରେ ନ୍ୟୁଜିଲାଣ୍ଡ ୪ରନରେ ରେମାଞ୍ଚକ ବିଜୟ ହାସଲ କରିଛି। ଫଳରେ ଦଳ ୫ ମ୍ୟାଚ ବିଶିଷ୍ଟ ସିରିଜରେ ୨-୦ରେ ଅଗ୍ରଣୀ ଲାଭ କରିଛି। ଏହି ମ୍ୟାଚରେ ମାର୍ଟିନ ଗୁପ୍ଟିଲ ଫର୍ମକୁ ଫେରିଛନ୍ତି। ସେ ୫୦ ବଲ୍ରେ ଆକର୍ଷଣୀୟ ୯୭ ରନ କରିଛନ୍ତି। ନ୍ୟୁଜିଲାଣ୍ଡକୁ ଜିତାଇବାରେ ମୁଖ୍ୟ ଭୂମିକା ଗ୍ରହଣ କରିଥିବାରୁ ସେ ମ୍ୟାନ ଅଫ୍୍ ଦି ମ୍ୟାଚ ବିବେଚିତ ହୋଇଛନ୍ତି। ଗୁରୁବାର ୟୁନିଭର୍ସିଟି ଓଭାଲଠାରେ ଖେଳାଯାଇଥିବା ଏହି ମ୍ୟାଚରେ ଘରୋଇ ଦଳ ଟସ୍ରେ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିଲା। ଦଳ ନିର୍ଦ୍ଧାରିତ ଓଭରରେ ୭ ଉଇକେଟ ବିନିମୟରେ ୨୧୯ ରନ କରିଥିଲା।
ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନମାନେ ମୋଟ ୧୮ଟି ଛକା ମାରିଥିଲେ। ଅନ୍ତର୍ଜାତୀୟ ଟି୨୦ରେ ଏହା ଏକ ରେକର୍ଡ। ପୁନଶ୍ଚ ଅନ୍ତର୍ଜାତୀୟ ଟି୨୦ରେ ସର୍ବାଧିକ ଛକା ମାରିବାରେ ଗୁପ୍ଟିଲ (୧୩୨) ଭାରତର ରୋହିତ ଶର୍ମା (୧୨୭)କୁ ଅତିକ୍ରମ କରିଯାଇଛନ୍ତି। ୫୩ ରନ କରିଥିବା କେନ୍ ଓ୍ବିଲିୟମସନ ୩ଟି ଛକା ଲଗାଇଥିଲେ। ଗୁପ୍ଟିଲ ଓ ଓ୍ବିଲିୟମସନ ଦ୍ୱିତୀୟ ଉଇକେଟ ପାର୍ଟନରଶିପ୍ରେ ୧୩୧ ରନ ଯୋଗ କରିଥିଲେ। ଘରୋଇ ଦଳର ଅନ୍ୟତମ ସଫଳ ବ୍ୟାଟ୍ସବ୍ୟାନ ଜିମି ନିଶାମ ୪୫ ରନ କରି ଅପରାଜିତ ରହିଥିଲେ। ସେ ୧୬ଟି ବଲ୍ର ସମ୍ମୁଖୀନ ହୋଇ ୧ ଚୌକା ଓ ୬ ଛକ ଲାଗାଇଥିଲେ। ସେ ସାମ୍ନା କରିଥିବା ପ୍ରଥମ ୨ଟି ବଲ୍ରେ ଦୁଇଟି ଛକା ଲଗାଇଥିଲେ। ଇନିଂସର ଫାଇନାଲ ବଲ୍ରେ ମଧ୍ୟ ଏକ ଛକା ମାରିଥିଲେ। ଅଷ୍ଟ୍ରେଲିଆର ସବୁଠାରୁ ସଫଳ ବୋଲର କେନ୍ ରିଚାର୍ଡସନ ୪୩ ରନ ଦେଇ ୩ଟି ଉଇକେଟ ଅକ୍ତିଆର କରିଥିଲେ। ଜବାବରେ ଅଷ୍ଟ୍ରେଲିଆ ୧୩ ଓଭରରେ ୬ ଉଇକେଟ ହରାଇ ସଙ୍କଟରେ ପଡିଥିଲା। କିନ୍ତୁ ମାର୍କସ ଷ୍ଟୋଇନିସ୍ (୩୭ ବଲ୍ରୁ ୭୮) ଏବଂ ଡାନିଏଲ ସାମ୍ସ (୧୫ ବଲ୍ରୁ ୪୧) ୬.୧ ଓଭରରେ ପାର୍ଟନରଶିପ୍ରେ ୯୨ରନ ଯୋଗ କରି ଅଷ୍ଟ୍ରେଲିଆ ପାଇଁ ସମ୍ଭାବନା ସୃଷ୍ଟି କରିଥିଲେ। ଜୋସ୍ ଫିଲିପ୍ ୪୫ରନ କରିଥିଲେ। ମ୍ୟାଚ ଜିତିବା ପାଇଁ ଅନ୍ତିମ ଓଭର ବେଳକୁ ଭ୍ରମଣକାରୀ ଦଳ ୧୫ ରନ ଆବଶ୍ୟକ କରୁଥିବାବେଳେ ହାତରେ ଆଉ ୪ଟି ଉଇକେଟ ରହିଥିଲା। ଏହି ଓଭରରେ ଜିମ୍ମି ନିଶାମ ବୋଲିଂ କରିବାକୁ ଆସିଥିଲେ। ସେ ଷ୍ଟୋଇନିସ ଓ ସାମ୍ସଙ୍କ ଉଇକେଟର ପତନ ଘଟାଇ ମ୍ୟାଚକୁ ନ୍ୟୁଜିଲାଣ୍ଡ ସପକ୍ଷରେ ନେଇ ଆସିଥିଲେ।
ସଂକ୍ଷିପ୍ତ ସ୍କୋର
