ମହାକାଳପଡ଼ା,୨୯ା୪(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଳାଇଲୋ ଗ୍ରାମ ଚାଷ ଜମି ମଝି ରାସ୍ତାରୁ ଗୁରୁବାର ଜଣେ ମହିଳାଙ୍କଠାରୁ ସଦ୍ୟ ନବଜାତ ଶିଶୁକନ୍ୟାକୁ ଗାଁର ଦୁଇଜଣ ଯୁବକ ଉଦ୍ଧାର କରିଛନ୍ତି। ଖବରପାଇ ମହାକାଳପଡ଼ା ଥାନା ପୋଲିସ ପହଞ୍ଚତ୍ ୧୦୮ ଆମ୍ବୁଲାନ୍ସ ଯୋଗେ ନବଜାତ ଶିଶୁକନ୍ୟାକୁ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଇଛନ୍ତି।
ମିଳିଥିବା ସୂଚନା ଅନୁସାରେ, ଅଳାଇଲୋ ଗାଁଠାରୁ କେନ୍ଦ୍ରାପଡ଼ା ସଦର ଥାନା ମଧୁରକୂଳ ପର୍ଯ୍ୟନ୍ତ ୩ କିମି ଗହୀର ମଝିରେ ମହିଳା ଜଣକ ନବଜାତ ଶିଶୁକନ୍ୟାର ନାହି ଲାଗିଥିବା ଅବସ୍ଥାରେ ଧରି ଯାଉଥିଲେ। ଗ୍ରାମର ସନାତନ ସେଠୀ ଓ ବୈଦ୍ୟନାଥ ସେଠୀଙ୍କ ସନ୍ଦେହ ହେବାରୁ ମହିଳାଙ୍କୁ ଏହି ନବଜାତ ଶିଶୁକନ୍ୟା ସମ୍ପର୍କରେ ପଚରାଉଚୁରା କରିଥିଲେ। ମହିଳା ଜଣକ କହିବା କଥା ଗୁରୁବାର ପୂର୍ବାହ୍ନ ୧୦ଟାରେ ମଝି ବିଲରେ ଶିଶୁକନ୍ୟାକୁ ସେ ଜନ୍ମ ଦେଇଥିଲେ। ତେବେ ମହିଳା ଏହି ଶିଶୁକନ୍ୟା ଜନ୍ମ କରିବା ପାରିପାର୍ଶ୍ୱିକ ପରିସ୍ଥିତିରୁ ଜଣାପଡୁ ନ ଥିବା ଦେଖିବାକୁ ମିଳିଛି। ଏହି ଘଟଣା ପ୍ରଚାରିତ ପରେ ଘଟଣାସ୍ଥଳରେ ଲୋକଙ୍କ ଭିଡ଼ ଜମିଥିଲା। ଏ ସମ୍ପର୍କରେ ମହିଳାଙ୍କୁ ପଚାରିବାରୁ ନିଜ ନାମ ମନସ୍ମିତା ଜେନା (୪୦) ଓ ସ୍ବାମୀ ଧୀରେନ ପ୍ରଧାନ ବୋଲି କହିଛନ୍ତି। ମହିଳାଙ୍କ ଘର ମାର୍ଶାଘାଇ ଥାନା ଅଞ୍ଚଳରେ ହୋଇଥିବା ବେଳେ ଶାଶୁଘର କେନ୍ଦ୍ରାପଡ଼ା ସଦର ଥାନା ଅଞ୍ଚଳରେ ବୋଲି କହିଛନ୍ତି। ଏହାର ତଦନ୍ତ କରାଗଲେ ଖରାବେଳେ ଜମି ରାସ୍ତାରେ ମନସ୍ମିତା ଶିଶୁକନ୍ୟାକୁ କୁଆଡେ ନେଉଥିଲେ ତାହା ଜଣାପଡିବ। ସେ ତାଙ୍କର କନ୍ୟା ନଁା ଆଉ କାହାର ତାହା ସନ୍ଦେହ ଘେରରେ ରହିଛି। ଏ ସମ୍ପର୍କରେ ମହାକାଳପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଚିକିତ୍ସାଧିକାରୀ ମନୋଜ କୁମାର ପଣ୍ଡାଙ୍କୁ ପଚାରିବାରେ କେନ୍ଦ୍ରାପଡ଼ାରେଏକ ମିଟିଂ ଅଛି। ଖବର ଯାହା ମିଳିଛି ଶିଶୁଟିର ରକ୍ତସ୍ରାବ ହେଉଥିଲା। ଅଧିକ ଚିକିତ୍ସା ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ବୋଲି ସେ କହିଛନ୍ତି।
