କେନ୍ଦୁଝର, ୧୫ା୩ (ସ୍ବ.ପ୍ର.): କେନ୍ଦୁଝର ଜିଲା ହରିଚନ୍ଦନପୁର ଥାନା ଅନ୍ତର୍ଗତ କାଳିମାଟି ଗାଁରେ ଏକ ଅଭାବନୀୟ ଘଟଣା ଘଟିଛି। ବିବାହର ୫ ଦିନ ପୁରି ନ ଥିବା ବେଳେ ଜଣେ ଯୁବକ ଆତ୍ମହତ୍ୟା କରିଛନ୍ତି। ଯୁବକଙ୍କ ମୃତଦେହ ଗାଁ ନିକଟସ୍ଥ ଏକ ଜଙ୍ଗଲରୁ ଉଦ୍ଧାର କରାଯାଇଛି। ମୃତ ଯୁବକ ଜଣଙ୍କ ହେଲେ ଦୁଧିଆନାଳୀ ସାହିର ନିର୍ମଳ ସାହୁ (୨୫)।
ମିଳିଥିବା ସୂଚନା ଅନୁସାରେ ନିର୍ମଳ ହରିଚନ୍ଦନପୁର ଥାନା ଅନ୍ତର୍ଗତ ପିଠାଗୋଳା ଗାଁର ବୁଧୁମତୀଙ୍କୁ ଗତ ୧୧ରେ ବିବାହ କରିଥିଲେ। ମଙ୍ଗଳବାର ସକାଳେ ନିର୍ମଳ ପିଆଜ ଖୋଳିବାକୁ ଯାଉଛି କହି ଆଉ ଫେରି ନ ଥିଲେ। ପରିବାରବର୍ଗ ଖୋଜାଖୋଜି କରିବା ପରେ ବିଳମ୍ବିତ ରାତି ପର୍ଯ୍ୟନ୍ତ ପାଇ ନ ଥିଲେ। ବୁଧବାର ସକାଳେ ଗ୍ରାମର କେତେକ ଲୋକ ମହୁଲ ସଂଗ୍ରହ କରିବାକୁ ଯାଇଥିବାବେଳେ ଏକ ଗଛରେ ନିର୍ମଳ ଝୁଲୁଥିବାର ଦେଖିବାକୁ ପାଇଥିଲେ। ଏ ନେଇ ସେମାନେ ପରିବାରବର୍ଗ ଲୋକଙ୍କୁ ଅବଗତ କରାଇଥିଲେ। ପରିବାରବର୍ଗ ଘଟଣାସ୍ଥଳକୁ ଯାଇ ଦେଖିବା ସହ ହରିଚନ୍ଦନପୁର ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଁଞ୍ଚି ନିର୍ମଳଙ୍କ ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ନିମନ୍ତେ ପଠାଇ ତଦନ୍ତ ଜାରି ରଖିଛି। ଏନେଇ ଏକ ଅପମୃତ୍ୟୁ ମାମଲା ରୁଜୁ ହୋଇ ତଦନ୍ତ ଚାଲିଛି ବୋଲି ଦାୟିତ୍ୱରେ ଥିବା ଥାନା ଅଧିକାରୀ ସୁରେଶ କୁମାର ମାଝୀ କହିଛନ୍ତି।