ଇସଲାମାବାଦ,୩ା୯: ଇସଲାମାବାଦ ହାଇକୋର୍ଟ (IHC) ପାକିସ୍ତାନୀ ନ୍ୟୁଜ୍ ଚାନେଲ ଏଆର୍ଓ୍ବାଇର ପ୍ରସାରଣକୁ ତୁରନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ପରେ ଅନେକ ସହରରେ ଏହି ଚ୍ୟାନେଲ ପୁନଃ ସ୍ଥାପିତ ହୋଇଛି। ପାକିସ୍ତାନ ଇଲେକ୍ଟ୍ରୋନିକ ମିଡିଆ ନିୟାମକ ପ୍ରାଧିକରଣ (PEMRA) ଏହି ଚାନେଲର ପ୍ରସାରଣକୁ ସ୍ଥଗିତ ରଖିଛି।
ଲାହୋର ସମେତ ଦେଶର ଅନେକ ସହରରେ ଏହି ପ୍ରସାରଣ ପୁନଃ ଆରମ୍ଭ ହୋଇଥିଲା। ଇସଲାମାବାଦ, ଲାହୋର ଏବଂ ସୁକ୍କୁର ସମେତ ଦେଶର ଅନେକ ସହରରେ ଏହି ଚାନେଲ ପୁଣିଥରେ ପ୍ରସାରିତ ହୋଇଛି। ତେବେ ଏହି ଚାନେଲଟି ସାରା ଦେଶରେ ପ୍ରସାରିତ ହୋଇନାହିଁ। ପାକିସ୍ତାନ ଟେଲିକମ କମ୍ପାନୀ (ପିଟିସିଏଲ) ମଧ୍ୟ ଲାହୋର ଏବଂ କରାଚିରେ ଚାନେଲକୁ ପୁନଃ ସ୍ଥାପିତ କରିଛି।
ଇସଲାମାବାଦ ହାଇକୋର୍ଟର ପ୍ରଧାନ ବିଚାରପତି ଅତହର ମୀନ୍ଲାହ ପାକିସ୍ତାନୀ ନ୍ୟୁଜ୍ ଚାନେଲଗୁଡ଼ିକର କେବୁଲରେ ପ୍ରସାରଣ ସ୍ଥଗିତ ରଖିବା ବିରୋଧରେ ଏକ ପିଟିଶନର ଶୁଣାଣି କରିଥିଲେ। ଏହି ସମୟ ମଧ୍ୟରେ ସେ ସୂଚନା ବିଭାଗର ସଚିବ ଶହେରା ସହିଦ ଏବଂ ପେମ୍ରା ଅଧ୍ୟକ୍ଷ ସଲିମ ବାଗଙ୍କୁ ସୋମବାର କୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି। ଚାନେଲର ପ୍ରସାରଣ କାହିଁକି ଅଗଷ୍ଟ ୮ରେ ବନ୍ଦ ହୋଇଥିଲା ଏବଂ ଏତେ ଦିନ ମଧ୍ୟରେ ଚାନେଲର ପ୍ରସାରଣକୁ ପୁନଃ ସ୍ଥାପିତ କରିବାକୁ କାହିଁକି କୌଣସି ପଦକ୍ଷେପ ନିଆଯାଇ ନ ଥିଲା। ଯଦି ୧ ଘଣ୍ଟା ମଧ୍ୟରେ ଚାନେଲ ପୁନଃ ଚାଲୁ ନ ହୁଏ ତେବେ ସୋମବାର ପେମ୍ରାର ଅଧ୍ୟକ୍ଷଙ୍କୁ କୋର୍ଟରେ ହାଜର ହେବାକୁ ପଡ଼ିବ ବୋଲି ପ୍ରଧାନ ବିଚାରପତି ଚେତାବନୀ ଦେଇଛନ୍ତି। ସୂଚନାଯୋଗ୍ୟ, ପାକିସ୍ତାନ ଇଲେକ୍ଟ୍ରୋନିକ ମିଡିଆ ନିୟାମକ ପ୍ରାଧିକରଣ (PEMRA) ଗତ ୨୩ ଦିନ ଧରି ଏହାର ପ୍ରସାରଣକୁ ସ୍ଥଗିତ ରଖିଥିଲା।