ବଡ଼ବିଲ, ୨୬।୯(ସ୍ବ.ପ୍ର.): କେନ୍ଦୁଝର ଜିଲା ବଡବିଲ ପୌରାଞ୍ଚଳରେ ରହୁଥିବା ୟଶ୍ ଜାଲୁକା କେନ୍ଦ୍ରୀୟ ଲୋକସେବା ଆୟୋଗ( ୟପିଏସ୍ସି) ଦ୍ୱାରା ପରିଚାଳିତ ପରୀକ୍ଷା-୨୦୨୦ରେ ଦେଶରେ ୪ର୍ଥ ସ୍ଥାନ ହାସଲ କରିଛନ୍ତି। ଏବେ ବିଭିନ୍ନ ମହଲରୁ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିଛି। ତେବେ ଦୈନିକ ଖବରକାଗଜ ପଢିବା ଏହି ସଫଳତାରେ ସହାୟ ହୋଇଛି ବୋଲି ୟଶ୍ କହିଛନ୍ତି।
ବଡ଼ବିଲ ୧୫ ନମ୍ବର ୱାର୍ଡସ୍ଥିତ ପଞ୍ଚବଟୀ ରେସିଡେନ୍ସିର ଫ୍ଲାଟ ନଂ-୨୦୩ ରେ ରହୁଥିବା ମନୋଜ ଜାଲୁକା ଏବଂ ଶୋଭାଦେବୀଙ୍କ ପୁଅ ୟଶ୍। ସେ ୬ଷ୍ଠରୁ ୧୦ମ ପର୍ଯ୍ୟନ୍ତ ବଡବିଲ ସେଣ୍ଟମେରିଜ ସ୍କୁଲରେ ପଢିଥିଲେ। ପରବର୍ତ୍ତୀ ସମୟରେ ବୋକାରୋରେ ଯୁକ୍ତ ଦୁଇ, ଦିଲ୍ଲୀରେ ଗ୍ରାଜୁଏଶନ ଏବଂ ଇକୋନୋମିକ୍ସରେ ମାଷ୍ଟର ଡିଗ୍ରୀ ହାସଲ କରି ୟୁପିଏସ୍ସି ସିଭିଲ ସର୍ଭିସେସ ପରୀକ୍ଷା ଦେଇଥିଲେ। ସେ ଦୈନିକ ୮ଘଣ୍ଟା ପରିଶ୍ରମ କରୁଥିଲେ। ଆଉ ଖବରକାଗଜ ପଢୁଥିଲେ। ୟଶ୍ ସରକାରଙ୍କର ବିଭିନ୍ନ ଲୋକାଭିମୁଖୀ ଯୋଜନାର ସୁପରିଚାଳନାରେ ନିଜକୁ ସମର୍ପଣ କରିବେ ବୋଲି କହିଛନ୍ତି।