ହାଇଦ୍ରାବାଦ୍,୩।୭: ହାଇଦ୍ରାବାଦରେ ବିଜେପିର ଜାତୀୟ କାର୍ଯ୍ୟକାରିଣୀ ବୈଠକ ଶେଷ ହୋଇଛି। ଏହି ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏବଂ ଭାଜପା ରାଷ୍ଟ୍ରୀୟ ସଭାପତିଙ୍କ ସମେତ ଦଳର ଅନେକ ହେଭିଓ୍ବେଟ୍ ନେତା ଯୋଗ ଦେଇଥିଲେ। ଏହି ଅବସରରେ ଅମିତ ଶାହା ଏକ ଭବିଷ୍ୟବାଣୀ କରିଛନ୍ତି। ସେ କହିଛନ୍ତି, ଆସନ୍ତା ୩୦ରୁ ୪୦ ବର୍ଷ ପର୍ଯ୍ୟନ୍ତ ଭାଜପା ଯୁଗ ରହିବ ଏବଂ ଭାରତ ବିଶ୍ୱଗୁରୁ ହେବ। ବଂଶବାଦ ରାଜନୀତି, ଜାତିବାଦ ରାଜନୀତି ଏବଂ ତୁଷ୍ଟୀକରଣ ରାଜୀନୀତି ଏକ ବଡ଼ ପାପ। ଦେଶ ଦୀର୍ଘ ବର୍ଷ ଧରି ଏଭଳି ରାଜନୀତିରେ ପେଷି ହୋଇଆସୁଛି। ପଶ୍ଚିମବଙ୍ଗ ଓ ତେଲେଙ୍ଗାନାରେ ଭାଜପା ପାରିବାରିକ ଶାସନର ଅନ୍ତ ଘଟାଇବ କଂଗ୍ରେସ ଦଳରେ ପରିବାର ଯୋଗୁ ଏପର୍ଯ୍ୟନ୍ତ ଅନ୍ତରୀଣ ନିର୍ବାଚନ ହୋଇପାରୁନାହିଁ ବୋଲି ସେ କହିଛନ୍ତି।
ଏହାସହ ଭାଜପାର ଜାତୀୟ କାର୍ଯ୍ୟକାରିଣୀ ବୈଠକରେ ପ୍ରଧାନମନ୍ତ୍ରୀ ମୋଦି ଦଳର ସଦସ୍ୟମାନଙ୍କୁ ‘ସ୍ନେହ ଯାତ୍ରା’ ଆରମ୍ଭ କରି ସମାଜର ସମସ୍ତ ବର୍ଗରେ ପହଞ୍ଚିବାକୁ କହିଥିଲେ। ଦୀର୍ଘ ଦିନ ଧରି ଭାରତକୁ ଶାସନ କରୁଥିବା ଦଳଗୁଡ଼ିକ ବର୍ତ୍ତମାନ ଅସ୍ତିତ୍ୱ ହରାଇବାକୁ ବସିଛନ୍ତି। ଆମେ ସେମାନଙ୍କୁ ପରିହାସ କରିବା ଉଚିତ ନୁହେଁ, କିନ୍ତୁ ସେମାନଙ୍କ ଭୁଲରୁ ଶିଖିବା ଆବଶ୍ୟକ। ଏହାସହ ପରିବାରବାଦ ରାଜନୀତି ବନ୍ଦ କରିବାକୁ ମଧ୍ୟ ପ୍ରଧାନମନ୍ତ୍ରୀ କହିଛନ୍ତି।