ଭୁବନେଶ୍ୱର,୫।୨(ବ୍ୟୁରୋ): ହୀରାକୁଦ ନଦୀବନ୍ଧ ଯୋଜନା ଯୋଗୁ ବିସ୍ଥାପିତ ହୋଇଥିବା ଲୋକଙ୍କୁ ଥଇଥାନ ସମ୍ପର୍କିତ ଏକ ମାମଲାରେ ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି) ଓଡ଼ିଶା ଏବଂ ଛତିଶଗଡ଼ ମୁଖ୍ୟ ଶାସନ ସଚିବଙ୍କୁ ନୋଟିସ କରିଛନ୍ତି। ଏହି ଦୀର୍ଘ ଅସମାହିତ ପ୍ରସଙ୍ଗରେ ସମ୍ବଲପୁର, ଝାରସୁଗୁଡ଼ା, ବରଗଡ଼, ସୁନ୍ଦରଗଡ଼ ଓ ସୁବର୍ଣ୍ଣପୁର ଜିଲାପାଳଙ୍କୁ ମଧ୍ୟ ନୋଟିସ ହୋଇଛି। ବରିଷ୍ଠ ଆଇନଜୀବୀ ରାଧାକାନ୍ତ ତ୍ରିପାଠୀ ଦାଖଲ କରିଥିବା ପ୍ରାୟ ୫ ବର୍ଷ ପୁରୁଣା ଏକ ପିଟିଶନର ଶୁଣାଣି କରି କମିଶନ ଓଡ଼ିଶା ମୁଖ୍ୟ ଶାସନ ସଚିବଙ୍କ ଏକ ରିପୋର୍ଟକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ଏନ୍ଏଚ୍ଆର୍ସି କହିଛନ୍ତି, ହୀରାକୁଦ ଡ୍ୟାମ୍ ନିର୍ମାଣ ବେଳେ ହଜାର ହଜାର ପରିବାର ବିସ୍ଥାପିତ ହୋଇଥିଲେ। ଏହାର ୬୦ ବର୍ଷ ପରେ ମଧ୍ୟ ସେମାନଙ୍କୁ ପୁନଃ ଥଇଥାନ କରାଯାଇ ନାହିଁ କିମ୍ବା ଓଡ଼ିଶା ସରକାରଙ୍କ ପ୍ରତିଶ୍ରୁତି ମୁତାବକ କ୍ଷତିପୂରଣ ଦିଆଯାଇ ନାହିଁ। ଏଥିଯୋଗୁ ବିସ୍ଥାପିତ ପରିବାରଗୁଡ଼ିକ ଏବେ ବି ଦୟନୀୟ ଅବସ୍ଥାରେ ଜୀବନ ବିତାଉଛନ୍ତି। ଏହି ପରିପ୍ରେକ୍ଷୀରେ ବାସଗୃହ ନିର୍ମାଣ ପାଇଁ ଜମି ପାଇବାକୁ ଆବେଦନ କରିଥିବା ଲୋକଙ୍କୁ ପ୍ରମାଣିକ ଦସ୍ତାବିଜ ନ ଥିବା ଦର୍ଶାଇ ଓଡ଼ିଶା ସରକାର ସେମାନଙ୍କ ଆବେଦନକୁ ଅଗ୍ରାହ୍ୟ କରିଦେଇଛନ୍ତି। ଏହାକୁ ନେଇ ମଧ୍ୟ ଏନ୍ଏଚ୍ଆର୍ସି ପ୍ରଶ୍ନ ଉଠାଇଛନ୍ତି। ବିସ୍ଥାପିତ ହେବାର ୬୬ ବର୍ଷ ପରେ ପ୍ରମାଣ ଦେଖାଇବା ଅସମ୍ଭବ। ସରକାରଙ୍କ ପାଖରେ ବିସ୍ଥାପନର ରେକର୍ଡ ନାହିଁ। ଏହି ପ୍ରସଙ୍ଗରେ କୌଣସି ସର୍ଭେ ମଧ୍ୟ କରାଯାଇ ନାହିଁ। ତେଣୁ ଓଡ଼ିଶା ସରକାର ୧୩,୭୪୦ ବିସ୍ଥାପିତ ପରିବାରଙ୍କୁ କ୍ଷତିପୂରଣ ପ୍ରଦାନ କରି ୮ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ କମିଶନ ନିର୍ଦ୍ଦେଶ ଦେଇଛନ୍ତି।
ଅନ୍ୟପକ୍ଷେ ଛତିଶଗଡ଼ସ୍ଥିତ ସରଗୁଜା ଓ ରାୟଗଡ଼ ଜିଲାର ପ୍ରଭାବିତ ୨୦ଟି ଗ୍ରାମର ଲୋକଙ୍କୁ ଥଇଥାନ ନିମନ୍ତେ ରାଜ୍ୟ ସରକାର କ’ଣ ସବୁ ପଦକ୍ଷେପ ନେଇଛନ୍ତି, ତାହା ଉପରେ ମଧ୍ୟ ୬ ସପ୍ତାହ ଭିତରେ ରିପୋର୍ଟ ପ୍ରଦାନ ପାଇଁ କମିଶନ ନିର୍ଦ୍ଦେଶ ଦେଇଛନ୍ତି। ପ୍ରକାଶ ଯେ, ଆଇନଜୀବୀ ରାଧାକାନ୍ତ ତ୍ରିପାଠୀ ୧୯୫୨-୫୩ରେ ହୀରାକୁଦ ବହୁମୁଖୀ ନଦୀବନ୍ଧ ଯୋଜନା ନିର୍ମାଣ ନିମନ୍ତେ ଜମି ଅଧିଗ୍ରହଣ ବେଳେ ୨୬,୫୬୧ ପରିବାର ବିସ୍ଥାପିତ ହୋଇଥିବା ଦର୍ଶାଇ ସେମାନଙ୍କ ଥଇଥାନ ଲାଗି ଏନ୍ଏଚ୍ଆର୍ସିଙ୍କ ଦୃଷ୍ଟି ଆକର୍ଷଣ କରିଥିଲେ।