ନୂଆଦିଲ୍ଲୀ/
ପୁରୀ ଅଫିସ, ୨୧। ୧୧: ପୁରୀ ପୋଲିସ ହେପାଜତରେ ମୃତ୍ୟୁ ମାମଲାକୁ ନେଇ ଜାତୀୟ ମାନବ ଅଧିକାର କମିଶନ (ଏନ୍ଏଚ୍ଆର୍ସି) ଅସନ୍ତୋଷ ପ୍ରକାଶ କରିଛନ୍ତି। ଆଇନର ଶାସନ ଚାଲିଥିବା ଦେଶରେ ଏସବୁ ଗ୍ରହଣୀୟ ନୁହେଁ ବୋଲି କମିଶନ କହିଛନ୍ତି। ଏହି ମାମଲାକୁ ଗୁରୁତ୍ୱର ସହ ଗ୍ରହଣ କରି କମିଶନ ଶୁକ୍ରବାର ମୁଖ୍ୟ ଶାସନ ସଚିବ ଏବଂ ପୋଲିସ ମହାନିର୍ଦ୍ଦେଶକ (ଡିଜିପି)ଙ୍କୁ ନୋଟିସ ଜାରି କରିଛନ୍ତି। ଆଗାମୀ ୪ ସପ୍ତାହ ମଧ୍ୟରେ କେ. ରମେଶଙ୍କ ମୃତ୍ୟୁର ସବିଶେଷ କାରଣ ଦର୍ଶାଇ ରିପୋର୍ଟ ଦାଖଲ କରିବାକୁ କୁହାଯାଇଛି। ଏନ୍ଏଚ୍ଆର୍ସି ଅଭିଯୋଗ କପି, ଅଭିଯୁକ୍ତଙ୍କ ନାମରେ ଦାଏର ଏତଲା କପି ସହ ପଞ୍ଚନାମା, ମେଡିକାଲ ଲିଗାଲ ସାର୍ଟିଫିକେଟ, ପୋଷ୍ଟମର୍ଟମ ରିପୋର୍ଟ, ପୋଷ୍ଟମର୍ଟମର ଭିଡିଓ ରେକର୍ଡିଂ, ଭିସେରା ଏବଂ ଫରେନ୍ସିକ ରିପୋର୍ଟ ଦାଖଲ କରିବାକୁ କମିଶନ ନିର୍ଦ୍ଦେଶ ଦେଇଛନ୍ତି। ଅଭିଯୁକ୍ତଙ୍କ ଗିରଫ ପରେ ତାଙ୍କ ପରିବାରକୁ ପୋଲିସ ଜଣାଇଥିଲା କି ନାହିଁ, ଗିରଫ ମେମୋ, ଇନ୍ସପେକ୍ସନ ମେମୋ କପି ଆଦି ଦାଖଲ କରିବାକୁ ମଧ୍ୟ କମିଶନଙ୍କ ନିର୍ଦ୍ଦେଶ ରହିଛି। ଏହି ଘଟଣାରେ କାର୍ଯ୍ୟାନୁଷ୍ଠାନ ଦାବି କରି ଭାଜପା ରାଷ୍ଟ୍ରୀୟ ପ୍ରବକ୍ତା ଡା. ସମ୍ବିତ ପାତ୍ର ଏବଂ ମାନବାଧିକାର କର୍ମୀ ମନୋଜ ଜେନା ଏନ୍ଏଚ୍ଆର୍ସିଙ୍କ ଦ୍ୱାରସ୍ଥ ହୋଇଛନ୍ତି। ଡା. ପାତ୍ର କହିଛନ୍ତି, କେ. ରମେଶ ଓ ତାଙ୍କ ପରିବାର ପ୍ରତି ପୁରୀ ପୋଲିସ ଅତି ଅମାନବୀୟତା ପ୍ରଦର୍ଶନ କରିଛି। ପରିବାରବର୍ଗଙ୍କୁ ନ
ଜଣାଇ ରମେଶଙ୍କ ମୃତଦେହକୁ ଦାହ କରିଦେଇଛି। ତାଙ୍କ ମା, ବାପା, ଦାଦାଙ୍କୁ ଉଠାଇ ନେଇ ଲୁଚାଇ ରଖିଛି। ଫଳରେ ସେମାନଙ୍କର ମାନବିକ ଅଧିକାର କ୍ଷୁଣ୍ଣ ହୋଇଛି। ତେଣୁ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ସହ ମୃତକଙ୍କ ପରିବାରକୁ ନ୍ୟାୟ ଦିଆଯାଉ। ଏନ୍ଏଚ୍ଆର୍ସି ଏହି ଘଟଣାକୁ ଅତି ଗୁରୁତ୍ୱର ସହ ନେଇ କାର୍ଯ୍ୟାନୁଷ୍ଠାନ ପାଇଁ ପ୍ରତିଶ୍ରୁତି ଦେଇଥିବା ପାତ୍ର କହିଛନ୍ତି। ସେହିପରି ମାନବାଧିକାର କର୍ମୀ ଜେନା କହିଛନ୍ତି, କମିଶନ ଏହି ଘଟଣାରେ କ୍ଷୁବ୍ଧ ହେବା ସହ ରାଜ୍ୟ ସରକାରଙ୍କୁ ନୋଟିସ ଜାରି କରିଛନ୍ତି।
ରିପୋର୍ଟ ମାଗିଲେ ହାଇକୋର୍ଟ
ପୁରୀ ଅଫିସ,୨୧। ୧୧: ପୁରୀ ପୋଲିସ ହେପାଜତରେ କେ. ରମେଶଙ୍କ ମୃତ୍ୟୁକୁ ନେଇ ହାଇକୋର୍ଟରେ ଏକ ମାମଲା (ଡବ୍ଲୁପିସି ନଂ.୩୨୦୫୮) ରୁଜୁ ହୋଇଛି। ପୁରୀର ଆଇନଜୀବୀ ଶରତ କୁମାର ରାୟଗୁରୁ ଏହି ମାମଲା କରିଛନ୍ତି। ହାଇକୋର୍ଟ ତାଙ୍କ ମାମଲାକୁ ଗ୍ରହଣ କରି ରାଜ୍ୟ ସରକାରଙ୍କୁ ରିପୋର୍ଟ ତଲବ କରିଛନ୍ତି। ମୃତଦେହ ବ୍ୟବଚ୍ଛେଦ ରିପୋର୍ଟ ସହ ଘଟଣାର ସବିଶେଷ ରିପୋର୍ଟ ଦାଖଲ କରିବା ଲାଗି ନିର୍ଦ୍ଦେଶ ଦେଇଛନ୍ତି। ଆସନ୍ତା ସୋମବାର ମାମଲାର ପରବର୍ତ୍ତୀ ଶୁଣାଣି ପାଇଁ ଧାର୍ଯ୍ୟ ହୋଇଛି।
ରାୟଗୁରୁ ତାଙ୍କ ଆବେଦନରେ ହାଇକୋର୍ଟର ଜଣେ କାର୍ଯ୍ୟରତ ବିଚାରପତିଙ୍କ ଦ୍ୱାରା ମାମଲାର ତଦନ୍ତ କରିବା ଲାଗି ନିବେଦନ କରିଛନ୍ତି। ଏତଦ୍ବ୍ୟତୀତ ଯେଉଁ ପୋଲିସ ଅଧିକାରୀମାନେ ଏଥିରେ ସମ୍ପୃକ୍ତ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ମଧ୍ୟ ନିବେଦନ କରିଛନ୍ତି। ଗଣମାଧ୍ୟକୁ ସୂଚନା ଦେଇ ରାୟଗୁରୁ କହିଛନ୍ତି, କେ. ରମେଶଙ୍କ ମୃତ୍ୟୁ ପାଇଁ ପୋଲିସ ସମ୍ପୂର୍ଣ୍ଣ ଦାୟୀ। ତେଣୁ ତୁରନ୍ତ ଏସ୍ପିଙ୍କୁ ବଦଳି ଓ ବାସେଳିସାହି ଥାନା ଅଧିକାରୀଙ୍କୁ ବରଖାସ୍ତ କରାଯିବା ସହ ମୃତକଙ୍କ ପରିବାରକୁ ନ୍ୟାୟ ଦେବା ଉଚିତ।