ଯାଜପୁର ଅଫିସ,୨୦।୮: ଯାଜପୁର ଜିଲା ବିଞ୍ଝାରପୁର ଥାନା ମଧୁସୂଦନପୁର ପଞ୍ଚାୟତ ରଥସାହି ଗ୍ରାମର ୨ ବର୍ଷ ବୟସ୍କା ଶିଶୁକନ୍ୟା ପିହୁ ଓରଫ ଲକ୍ଷ୍ମୀନାରାୟଣ ନାୟକ ନିଖୋଜ ଘଟଣାରେ ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି) ଓଡ଼ିଶା ଡିଜିପିଙ୍କୁ ଜବାବ ତଲବ କରିଛନ୍ତି। ୧୮ା୮ା୨୦୨୧ରେ ଏନ୍ଏଚ୍ଆର୍ସି ମାମଲାର ଶୁଣାଣି କରିଥିଲେ। ମାମଲାକୁ ଅତି ଜରୁରୀ ମନେକରି ୪ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ ଏନ୍ଏଚ୍ଆରସି ନିର୍ଦ୍ଦେଶ ଦେଇଛନ୍ତି। ଅନ୍ୟଥା ଶିଶୁ ସୁରକ୍ଷା ଅଧିକାର ଆଇନ-୧୯୯୩ ଧାରା ୧୩ ଅନୁସାରେ ସମ୍ପୃକ୍ତ ଅଧିକାରୀଙ୍କୁ ବ୍ୟକ୍ତିଗତ ଭାବେ ଉପସ୍ଥିତ ରହି ରିପୋର୍ଟ ଦାଖଲ କରିବାକୁ ବାଧ୍ୟ କରାଯିବ ବୋଲି ନିର୍ଦ୍ଦେଶରେ କଡ଼ା ଚେତାବନୀ ଦିଆଯାଇଛି।
ପିହୁଙ୍କୁ ଠାବ କରିବାରେ ଯାଜପୁର ଜିଲା ପୋଲିସ ବିଫଳ ହେବାରୁ ତାଙ୍କ ମା’ ମୋନାଲିସା ନାୟକ ୧୧ା୬ା୨୦୨୧ରେ ଏନଏଚ୍ଆର୍ସିରେ ଦ୍ୱାରସ୍ଥ ହୋଇଥିଲେ। ଏହିକ୍ରମରେ ଏନଏଚ୍ଆର୍ସିରେ ୧୨୮୬/୧୮/୨୪/୨୦୨୧ ନମ୍ବରରେ ଏକ ମାମଲା ରୁଜୁ ହୋଇଥିଲା। ମୋନାଲିସାଙ୍କ ଅଭିଯୋଗ ଅନୁସାରେ ୯ା୮ା୨୦୨୦ରୁ ପିହୁଙ୍କୁ ଅପହରଣ କରାଯାଇଥିଲା। ଏନେଇ ଅଭିଯୋଗ ହେବା ପରେ ବିଞ୍ଝାରପୁର ଥାନାରେ ୨୨୮/୨୦୨୦ ନମ୍ବରରେ ଏକ ମାମଲା ରୁଜୁ ହୋଇଥିଲା। କିନ୍ତୁ ପୋଲିସ ଉପଯୁକ୍ତ ଭାବେ ତଦନ୍ତ ନ କରି ହାତବାନ୍ଧି ବସିଛି। ଏପରିକି ତାଙ୍କ ଅଭିଯୋଗରେ ରାଜ୍ୟରେ ପ୍ରାୟ ୩୫୦୦ ଶିଶୁ ନିଖୋଜ ହୋଇଥିବାବେଳେ ରାଜ୍ୟ ପୋଲିସ ସେମାନଙ୍କୁ ଉଦ୍ଧାର କରିବାକୁ କୌଣସି ପଦକ୍ଷେପ ନେଉନାହିଁ। ତେଣୁ ମୋନାଲିସା କମିଶନଙ୍କ ସହଯୋଗ ଲୋଡ଼ିଥିଲେ।
ସୂଚନାଯୋଗ୍ୟ, ଇତିମଧ୍ୟରେ ପିହୁ ନିଖୋଜ ହେବା ଘଟଣାକୁ ୧ ବର୍ଷ ୧୦ ଦିନ ଅତିକ୍ରାନ୍ତ ହୋଇ ସାରିଛି। ପିହୁଙ୍କୁ ଉଦ୍ଧାର କରିବାକୁ ତତ୍କାଳୀନ ଏସ୍ପି ଚରଣ ସିଂ ମୀନାଙ୍କ ନିର୍ଦ୍ଦେଶରେ ବରିଷ୍ଠ ପୋଲିସ ଅଧିକାରୀମାନଙ୍କୁ ନେଇ ୫ଟି ସ୍ବତନ୍ତ୍ର ଦଳ ଗଠନ କରାଯାଇଥିଲା। ପୋଲିସ ଟିମ୍ ସେତେବେଳେ ବିଭିନ୍ନ ସ୍ଥାନରେ ଚଢାଉ କରିଥିଲା। ହେଲେ କୌଣସି ସୁଫଳ ମିଳି ନ ଥିଲା। ଏସ୍ପି ମୀନାଙ୍କ ବଦଳି ପରେ ଏସ୍ପି ରାହୁଲ ପି.ଆର.ଙ୍କ ନିର୍ଦ୍ଦେଶକ୍ରମେ ପୋଲିସ ରଥସାହି ଗ୍ରାମର ୨ଟି ପୋଖରୀ ଶୁଖାଇ ପିହୁଙ୍କୁ ଖୋଜିଥିଲା। ଏହାସହ ପିହୁଙ୍କ ନିଖୋଜ ସମ୍ପର୍କରେ ସୂଚନା ଦେଲେ ୨୦ ହଜାର ଟଙ୍କା ପୁରସ୍କାର ରାଶି ପ୍ରଦାନ କରିବାକୁ ପୋଲିସ ଘୋଷଣା କରିଥିଲା। ଅନ୍ୟପକ୍ଷରେ ପିହୁଙ୍କ ମା’ ମୋନାଲିସା ବିଞ୍ଝାରପୁର ଥାନା ଠାରୁ ଆରମ୍ଭ କରି ଏସ୍ପି, ଜିଲାପାଳ, ଜିଲା ଶିଶୁ ସୁରକ୍ଷା କମିଟି, ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ପ୍ରମୁଖଙ୍କୁ ଭେଟି ଆକୁଳ ନିବେଦନ କରି ଆସୁଛନ୍ତି। ହେଲେ ପିହୁଙ୍କୁ ନ ପାଇ ସେ ଭାଙ୍ଗି ପଡ଼ିଛନ୍ତି।