ନୂଆପଡା ଅଫିସ,୯ା୧୦: ନୂଆପଡ଼ା ଜିଲା ଗୋହିରାପଦର ଗ୍ରାମ ନିକଟରେ ଏକ ପେଟ୍ରୋଲ ପମ୍ପ ସ୍ଥାପନ ସକାଶେ ଏନଓସି (ନୋ ଅବଜେକ୍ସନ ସାର୍ଟିଫିକେଟ) ପ୍ରଦାନ ପାଇଁ ୨୦ ହଜାର ଟଙ୍କା ଲାଞ୍ଚ ନେବାବେଳେ ଭିଜିଲାନ୍ସ ହାତରେ ଧରାପଡିଛନ୍ତି ଏନ୍ଏଚ୍ (ଜାତୀୟ ରାଜପଥ) ବିଭାଗ ସହକାରୀ ନିର୍ବାହୀ ଯନ୍ତ୍ରୀ ସଂଯୋଗ ମେହେର। ଶୁକ୍ରବାର ପୂର୍ବାହ୍ନ ୧୧ଟାବେଳେ ଖଡିିଆଳରୋଡସ୍ଥିତ ତାଙ୍କ ସରକାରୀ ବାସଭବନରେ ସେ ଲାଞ୍ଚ ନେଉଥିବାବେଳେ ଭିଜିଲାନ୍ସ ଦ୍ୱାରା ଧରା ପଡିଛନ୍ତି।
ଖଡ଼ିଆଳ ରୋଡର ସୁଶାନ୍ତ କୁମାର କହ୍ଲୋରାସ ନାମକ ଜଣେ ଯୁବକ ତରବୋଡ ପଞ୍ଚାୟତ ଗୋହିରାପଦର ଗ୍ରାମ ନିକଟରେ ଏକ ପେଟ୍ରୋଲ ପମ୍ପ ସ୍ଥାପନ ସକାଶେ ଟେଣ୍ଡର ପାଇଛନ୍ତି। ହେଲେ ଏହା ଜାତୀୟ ରାଜପଥ ନଂ.୩୫୩ କଡରେ ନିର୍ମାଣ ହେବାକୁ ଥିବାରୁ ଏନ୍ଏଚ୍ ବିଭାଗରୁ ନୋ ଅବଜେକ୍ସନ ସାର୍ଟିଫିକେଟ ଆବଶ୍ୟକ। ଏଣୁ ଗତ ସେପ୍ଟେମ୍ବର ମାସ ୧୫ରେ ଖଡ଼ିଆଳ ରୋଡ଼ରେ ଥିବା ଜାତୀୟ ରାଜପଥ ବିଭାଗ ଅଫିସରେ ସେ ଏଥିଲାଗି ଆବେଦନ କରିଥିଲେ। ହେଲେ ଏଥିପାଇଁ ସହକାରୀ ନିର୍ବାହୀ ଯନ୍ତ୍ରୀ ପ୍ରଥମେ ୧ ଲକ୍ଷ ଟଙ୍କା ଦାବି କରିଥିଲେ। ପରେ ୨୦ହଜାର ଟଙ୍କାରେ ଜବାବ ଛିଣ୍ଡିଥିଲା। ଏହାକୁ ନେଇ ଅଭିଯୋଗକାରୀ କୋରାପୁଟ ଡିଭିଜନ ଭିଜିଲାନ୍ସ ଅଫିସରେ ଅଭିଯୋଗ କରିଥିଲେ। ଏହାପରେ ତାଙ୍କୁ ଧରିବାକୁ ଭିଜିଲାନ୍ସ ଯୋଜନା କରିଥିଲା। ଠିକ୍ ଟଙ୍କା ନେବା ସମୟରେ ପୂର୍ବରୁ ପ୍ରସ୍ତୁତ ହୋଇ ରହିଥିବା ଭିଜିଲାନ୍ସ ଟିମ୍ ତାଙ୍କୁ ଧରିଥିଲା। ଏ ନେଇ ନଂ.୨୦/୨୦ରେ ଏକ ମାମଲା ରୁଜୁ ହୋଇଥିବା କଳାହାଣ୍ଡି ଭିଜିଲାନ୍ସ ଡିଏସ୍ପି (ନୂଆପଡା ଇନଚାର୍ଜ) ସତ୍ୟବାନ ମହାନନ୍ଦ ସୂଚନା ଦେଇଛନ୍ତି।