ଆର୍.ଉଦୟଗିରି,୧୦ା୧୦(ଡି.ଏନ୍.ଏ.)-ଗଜପତି ଜିଲା ଅଡ଼ବା ଥାନା କଲବା ଗାଁର ଦାଦନ ଶ୍ରମିକ ଶାଙ୍କ ମୁର୍ମୁଙ୍କ ଗୋଡ଼ ହାତ କଟା ଘଟଣାର ଦୀର୍ଘଦିନ ପରେ ପୋଲିସ ଥାନାରେ ମାମଲା ରୁଜୁ କରିଛି। ଶାଙ୍କଙ୍କ ସ୍ତ୍ରୀ ସୁଶୀଳା ମୁର୍ମୁଙ୍କ ଏତଲା ଆଧାରରେ ଅଡବା ପୋଲିସ ମାମଲା ନଂ.୧୧୯/୨୨ ରୁଜୁ କରିବା ସହ ତଦନ୍ତ କରୁଛି। ସେପଟେ ଅଡ଼ବା ଥାନା ଅଧିକାରୀ ଆନନ୍ଦ୍ର ଚନ୍ଦ୍ର ପାତ୍ର କହିଛନ୍ତି, ଖୁବ୍ଶୀଘ୍ର ଏକ ଟିମ୍ ଉତ୍ତରପ୍ରଦେଶ ଯାଇ ତଦନ୍ତ କରିବ। ଦାଦନ ଖଟିବାକୁ ବାହାର ରାଜ୍ୟକୁ ଯାଇ ହାତ ଗୋଡ଼ କାଟିଦେବା ଭଳି ଏକ ସମ୍ବେଦନଶୀଳ ଘଟଣାରେ ମାମଲା ରୁଜୁ ନ ହେବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ପୋଲିସ ଓ ଜିଲା ଶ୍ରମ ବିଭାଗ ମିଳିତ ଭାବେ ଏହି ଘଟଣାର ତଦନ୍ତ କରିବେ ବୋଲି ଥାନା ଅଧିକାରୀ କହିଛନ୍ତି। ଏହି ଘଟଣାରେ ଏଯାଏ ଶ୍ରମ ବିଭାଗ କୌଣସି ପଦକ୍ଷେପ ନେଇ ନ ଥିବା ବେଳେ ପୋଲିସ କାର୍ଯ୍ୟାନୁଷ୍ଠାନ ଉପରେ ସମସ୍ତ ନଜର ରହିଛି। ଅଭିଯୋଗ ଅନୁଯାୟୀ ଶାଙ୍କ ମୁର୍ମୁଙ୍କୁ ମାସିକ ୨୦ ହଜାର ଟଙ୍କା ମିଳିବ ବୋଲି ପ୍ରଲାଭନ ଦେଖାଇ ଉତ୍ତରପ୍ରଦେଶର ଏକ ସିମେଣ୍ଟ କମ୍ପାନୀକୁ ନିଆଯାଇଥିଲା। ସେଠାରେ କିଛିଦିନ କାମ କରିବା ପରେ ଶାଙ୍କ ମଜୁରି ଟଙ୍କା ମାଗିଥିଲେ। ପରେ ତାଙ୍କୁ ଅଚେତ କରାଯାଇଥିଲା। ଚେତା ଫେରିବା ପରେ ଗୋଟିଏ ଗୋଡ଼ ଓ ଗୋଟିଏ ପାପୁଲି କଟିଯାଇଥିବା ଦେଖିଥିଲେ। ଏ ନେଇ ସେଠାରେ ଚିକିତ୍ସା କରାଯାଇ ଗାଁକୁ ପଠାଇ ଦେଇଥିଲା। ରେଳଲାଇନରେ ପଡ଼ିଥିବା ବେଳେ ତାଙ୍କୁ ଉଦ୍ଧାରକରି ଆଣିଛୁ ବୋଲି ଶାଙ୍କଙ୍କୁ ଗ୍ରାମକୁ ଛାଡ଼ିବାକୁ ଆସିଥିବା ଯୁବକମାନେ କହିଛନ୍ତି। ଏହି ଘଟଣା ସମ୍ପର୍କରେ ବ୍ରହ୍ମପୁର ସାମାଜିକ କର୍ମୀ ରବୀନ୍ଦ୍ର ମିଶ୍ର ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି)ଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାକୁ କମିଶନ ଗ୍ରହଣ କରିବା ସହ ଆସନ୍ତା ୮ ସପ୍ତାହ ମଧ୍ୟରେ ରିପୋର୍ଟ ଦେବାକୁ ଗଜପତି ଜିଲାପାଳଙ୍କୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।