ନୂଆଦିଲ୍ଲୀ,୯।୫: ଟେରର ପଣ୍ଡିଂକୁ ନେଇ ରାଷ୍ଟ୍ରୀୟ ଯାଞ୍ଚ ଏଜେନ୍ସି(ଏନଆଇଏ) ଆକ୍ସନରେ। ଜମ୍ମୁ-କଶ୍ମୀରର କିଛି ସ୍ଥାନରେ ମଙ୍ଗଳବାର ଏନଆଇଏ ଦ୍ୱାରା ଚଢାଉ କରାଯାଇଛି। ଶ୍ରୀନଗର, ଅନନ୍ତନାଗ, କୁପଓ୍ବାଡା, ଶୋପିଆନ, ରାଜୌରି ଓ ପୁଞ୍ଛରେ ଏନଆଇଏ ଟିମ ଚଢାଉ ପାଇଁ ପହଞ୍ଚିଛନ୍ତି। ହେଲେ ଏବେ ପର୍ଯ୍ୟନ୍ତ କାହାକୁ ଅଟକ ରଖାଯାଇଥିବା ଖବର ମିଳିନାହିଁ। ତାମିଲନାଡୁରେ ବି ଚଢାଉ ଅଭିଯାନ ଜାରି ରହିଛି।
ସୂଚନାଯୋଗ୍ୟ, ଏହା ପୂର୍ବରୁ ମେ’ ୨ରେ ଜମ୍ମୁ-କଶ୍ମୀରର ୬ ଜିଲାର ୧୨ଟି ସ୍ଥାନରେ, ପୀର ପଞ୍ଜାଲ ଅଞ୍ଚଳ, ମଧ୍ୟ ଓ ଦକ୍ଷିଣ କଶ୍ମୀରର ବିଭିନ୍ନ ସ୍ଥାନରେ ଚଢାଉ କରାଯାଇଥିଲା। କୁହାଯାଉଛି କି ଆତଙ୍କବାଦୀ ତଥା ବିଦ୍ରୋହୀ କାର୍ଯ୍ୟକଳାପ ପାଇଁ ଅପରାଧିକ ଷଡଯନ୍ତ୍ର ରଚିଥିବା ବିଦ୍ରୋହୀ ନେଟୱାର୍କ ତଥା ଅନ୍ୟାନ୍ୟ ପ୍ରସଙ୍ଗରେ ଏହି ଚଢାଉ ଏକ ବଡ଼ ଧରଣର କଟକଣା।
ଏହା ବ୍ୟତୀତ ତାମିଲନାଡୁର ୧୦ ରୁ ଅଧିକ ସ୍ଥାନରେ ଏନଆଇଏର ଚଢାଉ ଚାଲିଛି। ପ୍ରକାଶ ଯେ, ଯାଞ୍ଚ ଏଜେନ୍ସି ପିଏଫଆଇ ସହିତ ଜଡିତ କେତେକ ବ୍ୟକ୍ତି ଏବଂ ନେତାଙ୍କ ସ୍ଥାନ ଉପରେ ଚଢାଉ କରାଯାଉଛି। ଏହି ମାମଲାରେ ପୂର୍ବରୁ ଦିଆଯାଇଥିବା ଏଫଆଇଆର ଯାଞ୍ଚ ସମୟରେ ଏହି ଚଢାଉ କରାଯାଉଛି। ସୂଚନାଯୋଗ୍ୟ, ଏହା ପୂର୍ବରୁ ନିଆଯାଇଥିବା କାର୍ଯ୍ୟାନୁଷ୍ଠାନ ସମୟରେ, ସାରା ଦେଶରୁ ୧୦୬ ଜଣ ପିଏଫଆଇ ସଦସ୍ୟଙ୍କୁ ଗିରଫ କରାଯାଇଥିଲା ।