ନୂଆଦିଲ୍ଲୀ,୧୫।୯: ରାଷ୍ଟ୍ରୀୟ ଯାଞ୍ଚ ଏଜେନ୍ସି(ଏନ୍ଆଇଏ) ଗୁଜରାଟର ଗୋଧରା ଅଞ୍ଚଳରୁ ଗିତେଲୀ ଇମରାନ ଖାନ୍ ନାମକ ଜଣେ ଯୁବକଙ୍କୁ ଗିରଫ କରିଛି। ସେ ପାକିସ୍ତାନ ପାଇଁ ଗୁଇନ୍ଦାଗିରି କରୁଥିବା ଜଣାପଡ଼ିଛି। ଇମରାନ୍ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସ୍ଆଇକୁ ଦେଶର ସୁରକ୍ଷା ସମ୍ପର୍କିତ ଗୋପନୀୟ ତଥ୍ୟ ପ୍ରଦାନ କରୁଥିବା ଏନ୍ଆଇଏ ପକ୍ଷରୁ କୁହାଯାଇଛି। ତାଙ୍କ ଉପରେ ଭାରତୀୟ ଦଣ୍ଡବିଧାନ ଅନୁଯାୟୀ ବିଭିନ୍ନ ଦଫାରେ ମାମଲା ରୁଜୁ କରାଯାଇଛି।
ଅପରପକ୍ଷେ ଗିତେଲି ବିଶାଖାପାଟଣା ଏସ୍ପିସୋନେଜ୍ କେସ୍ର ମୁଖ୍ୟ ଅଭିଯୁକ୍ତ। ସେ ସୀମାରେ ପୋଷାକ ବ୍ୟବସାୟ କରୁଥିଲେ। ସେଠାରେ ପାକିସ୍ତାନର ଗୁଇନ୍ଦା ବିଭାଗ ସମ୍ପର୍କରେ ଆସିଥିଲେ। ତାଙ୍କ ନିର୍ଦ୍ଦେଶରେ ସେ କିଛି ଭାରତୀୟ ଜଳସେନା କର୍ମଚାରୀଙ୍କ ବ୍ୟାଙ୍କ ଆକାଉଣ୍ଟରେ ଟଙ୍କା ଡିପୋଜିଟ୍ କରୁଥିଲେ। ଏହାର ପ୍ରତିବଦଳରେ ତାଙ୍କଠାରୁ ଅନେକ ସୂଚନା ପ୍ରାପ୍ତ କରୁଥିଲେ। ତାଙ୍କ ଘର ଉପରେ ଚଢ଼ାଉ କରାଯାଇ ଗିତେଲିଙ୍କୁ ଗିରଫ କରାଯାଇଛି। ତାଙ୍କ ଘରୁ ବହୁତ ଇଲେକ୍ଟ୍ରୋନିକ୍ ଉପକରଣ ଜବତ କରାଯାଇଛି। ସେଥିରୁ ଅନେକ ତଥ୍ୟ ମିଳିବା ନେଇ ଏନ୍ଆଇଏ ଆଶା ପ୍ରକାଶ କରିଛି। ଏହି ଘଟଣାରେ ପୂର୍ବରୁ ୧୪ଜଣ ଅଭିଯୁକ୍ତଙ୍କ ବିରୋଧରେ ଚାର୍ଜଶିଟ୍ ଦାଖଲ କରାଯାଇଥିବା ବେଳେ ଅଧିକ ଯାଞ୍ଚ ଜାରି ରହିଛି।