ଜେନେଭା,୧୦।୮ : କ୍ଷମତାଚ୍ୟୁତ ହୋଇଥିବା ନାଇଜର ରାଷ୍ଟ୍ରପତିଙ୍କ ଅବସ୍ଥା ଖରାପ ହେବାରେ ଲାଗିଛି। ସେ କେବଳ ଭାତ ଖାଇ ଜୀବନ ବିତାଉଛନ୍ତି। ଏହାକୁ ନେଇ ଜାତିସଂଘ ପକ୍ଷରୁ ଚିନ୍ତା ବ୍ୟକ୍ତ କରାଯାଇଛି। ଜାତିସଂଘର ସେକ୍ରେଟେରୀ ଜେନେରାଲ ଆଣ୍ଟୋନିଓ ଗୁଟେରସ ଉଦବେଗ ପ୍ରକାଶ କରିଛନ୍ତି।
ସେ କହିଛନ୍ତି ଯଦି ଏକ ଦେଶର ରାଷ୍ଟ୍ରପତିଙ୍କୁ ଶୁଖିଲା ଭାତ ଖାଇ ବଞ୍ଚିବାକୁ ପଡିବ, ତେବେ କଳ୍ପନା କରନ୍ତୁ ସେହି ଦେଶର ଅବସ୍ଥା କ’ଣ ହେବ? କିଛି ଦିନ ପୂର୍ବରୁ ନାଇଜରରେ ହୋଇଥିବା କ୍ଷମତା ଦଖଲ ପରେ ସାମରିକ ଜୁଣ୍ଟା ରାଷ୍ଟ୍ରପତି ମହମ୍ମଦ ବାଜୁମଙ୍କ ସରକାରକୁ ହଟାଇ ଦେଇଥିଲା। ଏଥି ସହ ରାଷ୍ଟ୍ରପତି ମହମ୍ମଦ ବାଜୁମଙ୍କ ତାଙ୍କ ଘରେ ନଜରବନ୍ଦ କରାଯାଇଥିଲା।
ରିପୋର୍ଟ ଅନୁଯାୟୀ, ନାଇଜର ରାଷ୍ଟ୍ରପତି ତାଙ୍କ ବନ୍ଧୁଙ୍କ ସହ ଫୋନ ମାଧ୍ୟମରେ କଥାବାର୍ତ୍ତା କରୁଥିବା ସମୟରେ ତାଙ୍କ ଯନ୍ତ୍ରଣାକୁ କହିଥିଲେ। ତାଙ୍କୁ ଭଲ ଖାଦ୍ୟ ଏବଂ ଔଷଧ ଦିଆଯାଉ ନାହିଁ ବୋଲି ରାଷ୍ଟ୍ରପତି କହିଛନ୍ତି। ସେମାନେ ଏକ ସପ୍ତାହ ଧରି ବିଦ୍ୟୁତ ବିନା ଜୀବନ ବିତାଉଛନ୍ତି। ସେ ଆହୁରି ମଧ୍ୟ ସୂଚନା ଦେଇଛନ୍ତି ସେ କେବଳ ଚାଉଳ ଏବଂ ପାସ୍ତା ଖାଇ ଜୀବନ ବଞ୍ଚିବାକୁ ବାଧ୍ୟ ହେଉଛନ୍ତି।
ଜାତିସଂଘର ସେକ୍ରେଟେରୀ ଜେନେରାଲ ଆଣ୍ଟୋନିଓ ଗୁଟେରସ ନାଇଜରର ରାଷ୍ଟ୍ରପତି ମହମ୍ମଦ ବାଜୁମ ଏବଂ ତାଙ୍କ ପରିବାରର ସାମ୍ପ୍ରତିକ ପରିସ୍ଥିତିକୁ ନେଇ ଚିନ୍ତା ବ୍ୟକ୍ତ କରିଛନ୍ତି ବୋଲି ଜାତିସଂଘ ମୁଖପାତ୍ର ଏକ ବିବୃତ୍ତିରେ କହିଛନ୍ତି। ଆଣ୍ଟୋନିଓ ଗୁଟେରସ କହିଛନ୍ତି ବାଜୁମ ଏବଂ ତାଙ୍କ ପରିବାରକୁ ତୁରନ୍ତ ବିନା ସର୍ତ୍ତରେ ମୁକ୍ତ କରାଯିବା ଉଚିତ।
