ଭୁବନେଶ୍ୱର, ୨୨ା୧୦(କ୍ରୀଡ଼ା ପ୍ରତିନିଧି): ଚଳିତ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପରେ ଶୁକ୍ରବାର ବଡ଼ ବିପର୍ଯ୍ୟୟ ଘଟାଇଛି ନାଇଜେରିଆ। ବିଶ୍ୱର ନମ୍ବରଓ୍ବାନ ଦଳ ଆମେରିକାକୁ ପେନାଲ୍ଟି ଶୁଟ୍ଆଉଟ ୪-୩ ଗୋଲରେ ପରାସ୍ତ କରି ସେମିଫାଇନାଲରେ ପ୍ରବେଶ କରିଛି ଏହି ଆଫ୍ରିକୀୟ ଦଳ। ପୂର୍ବରୁ ୩ଥର ୨୦୧୦, ୨୦୧୨ ଓ ୨୦୧୪ରେ କ୍ୱାର୍ଟର ଫାଇନାଲ ପର୍ଯ୍ୟାୟରୁ ବିଦାୟ ନେଇଥିବା ନାଇଜେରିଆ ପ୍ରଥମଥରପାଇଁ ଏହି ମେଗା ପ୍ରତିଯୋଗିତାର ସେମିଫାଇନାଲରେ ପ୍ରବେଶ କରିଛି। ଆମେରିକା-ନାଇଜେରିଆ ମ୍ୟାଚ ନିର୍ଦ୍ଧାରିତ ସମୟରେ ୧-୧ ଗୋଲରେ ଡ୍ର ରହିଥିଲା। ମ୍ୟାଚର ୨୨ତମ ମିନିଟରେ ପେନାଲ୍ଟି ଏରିଆରେ ଆମେରିକାର ରିଲେ ଜ୍ୟାକସନ ଫାଉଲ୍ କରିବାରୁ ନାଇଜେରିଆକୁ ପେନାଲ୍ଟି ମିଳିଥିଲା। ରେଫରିଙ୍କ ନଜରକୁ ଏହା ଆସି ନ ଥିବାରୁ ନାଇଜେରିଆ ଭିଏଆର (ଭିଡିଓ ଆସିଷ୍ଟାଣ୍ଟ ରେଫରି) ନେଇ ସଫଳ ହୋଇଥିଲା। ୨୬ତମ ମିନିଟରେ ଓମାମୁଜୋ ଏଡାଫେ ଗୋଲ ଦେଇ ନାଇଜେରିଆକୁ ୧-୦ ଗୋଲରେ ଅଗ୍ରଣୀ କରାଇଥିଲେ। ୪୦ତମ ମିନିଟରେ ଆମେରିକାର ଆମାଲିଆ ଭିଲାରିଲ ଗୋଲଟିକୁ ପରିଶୋଧ କରି ଦେଇଥିଲେ। ନିର୍ଦ୍ଧାରିତ ୯୦ ମିନିଟ ଏବଂ ଇଞ୍ଜୁରି ଟାଇମ୍ ଅତିରିକ୍ତ ୮ ମିନିଟରେ ଆଉ ଗୋଲ ହୋଇ ନ ଥିଲା। ଫଳାଫଳ ନିର୍ଣ୍ଣୟ ପାଇଁ ପେନାଲ୍ଟି ଶୁଟ୍ ଆଉଟର ସହାୟତା ନିଆ ଯାଇଥିଲା। ଏହି ପର୍ଯ୍ୟାୟରେ ଆମେରିକା ପକ୍ଷରୁ ଇମେରି ଆଡାମ୍ସ, ଟେଲର ସୁଆରେଜ, ମିଆ ଭୁତା ଏବଂ ନାଇଜେରିଆର ଇଡିଡଙ୍ଗ ଇଟିମ, ଇଡେଟ ଓଫିଅଙ୍ଗ, ମିରାକଲ ଉସାନି ଓ ଓମାମୁଜୋ ଇଡାଫେ ଗୋଲ ସ୍କୋର କରିଥିଲେ।
ବ୍ରାଜିଲ-ଜର୍ମାନୀ ମ୍ୟାଚରେ ମଧ୍ୟ କଡ଼ା ଟକ୍କର ହୋଇଥିଲା। ପ୍ରଥମାର୍ଦ୍ଧ ଶେଷସୁଦ୍ଧା ଜର୍ମାନୀ ୧-୦ ଗୋଲରେ ଅଗ୍ରଣୀ ରହିଥିଲା। ଦଳ ପକ୍ଷରୁ ମାରି ଷ୍ଟେନର ୨୩ତମ ମିନିଟରେ ଗୋଲ କରିଥିଲେ। ବ୍ରାଜିଲ ୬ଷ୍ଠ ଓ ଜର୍ମାନୀ ୭ମ ଥରପାଇଁ ବିଶ୍ୱକପ ଖେଳିଥିଲା। ୨୦୦୮ରେ ଜର୍ମାନୀ ୩ୟ ସ୍ଥାନ ଅଧିକାର କରି ଶ୍ରେଷ୍ଠ ସଫଳତା ପାଇଥିଲା। ବ୍ରାଜିଲ ୨୦୧୦ ଓ ୨୦୧୨ରେ କ୍ୱାର୍ଟର ଫାଇନାଲରୁ ବିଦାୟ ନେଇଥିଲା।