ଭୁବନେଶ୍ୱର, ୧୦।୧ (ବ୍ୟୁରୋ): ହକି ବିଶ୍ୱକପ୍ ପାଇଁ ଏବେଠୁ ରାଜଧାନୀରେ ଆରମ୍ଭ ହୋଇଯାଇଛି ଉତ୍ସବ। ପୁଣି ଆଗକୁ ରହିଛି ବଡ଼ ମହୋତ୍ସବ। ମନୋରଞ୍ଜନ ସହ ସ୍ବତନ୍ତ୍ର ଆତିଥେୟତା ପ୍ରଦାନ କରିବାକୁ ଜାନୁୟାରୀ ୧୫ରୁ ଆରମ୍ଭ ହେଉଛି ‘ଡଟ୍ ଫେଷ୍ଟ ଭୁବନେଶ୍ୱର’। ନାଚ, ଗୀତ ସାଙ୍ଗକୁ ମୁମ୍ବାଇର ତାରକାଙ୍କ ଗହଣରେ କୋଳାହଳମୟ ହୋଇପଡିବ ସାରା ରାଜଧାନୀ। ୧୫ରୁ ୨୯ ତାରିଖ ୧୫ଦିନ ଧରି ଡଟ୍ ଫେଷ୍ଟ ମାହୋଲରେ ଝୁମିବେ ଖେଳାଳି, ଅତିଥି ଓ ସହରବାସୀ। ତେବେ ଡଟ୍ ଫେଷ୍ଟର ଅଂଶବିଶେଷ ଭାବେ ଖୋଲିବ ନାଇଟ୍ ବଜାର ବା ଫ୍ଲି ମାକେର୍ଟ, ଯାହାକି ଅନ୍ୟତମ ଆକର୍ଷଣ ସାଜିବ। ପ୍ରଥମ ଥର ‘ନାଇଟ୍ ବଜାର’ ଡଟ୍ ଫେଷ୍ଟରେ ସ୍ଥାନ ପାଇଥିବାରୁ ଏହାକୁ ନେଇ ଲୋକଙ୍କ ମଧ୍ୟରେ ଏବେଠାରୁ ଉତ୍ସାହ ଦେଖାଦେଲାଣି। ଜାନୁୟାରୀ ୧୫ରୁ ୨୯ ତାରିଖ ପର୍ଯ୍ୟନ୍ତ ଏକାମ୍ର ହାଟରେ ଏହି ବଜାର ଚାଲିବ। ଏଥିପାଇଁ ନୂଆ ରୂପରେ ସଜେଇ ହେଉଛି ଏକାମ୍ର ହାଟ। ଓଡ଼ିଶା ସହ ୧୧ଟି ରାଜ୍ୟ ଏଥିରେ ସାମିଲ ହେବେ। ରାଜଧାନୀବାସୀଙ୍କୁ ଏହା ଏକ ନୂଆ ଅନୁଭୂତି ଆଣିଦେବା ସହ ଆଞ୍ଚଳିକ ଶିଳ୍ପୀ, କଳାକାର, ଷ୍ଟାର୍ଟଅପ୍, ପର୍ଫର୍ମର, ମେକର୍ ଓ କ୍ରିଏଟରଙ୍କ ପାଇଁ ଏକ ଉଲ୍ଲେଖନୀୟ ମଞ୍ଚ ପ୍ରଦାନ କରିବ। ପ୍ରତିଦିନ ଅପରାହ୍ନ ୫ଟାରୁ ଆରମ୍ଭ ହୋଇ ବିଳମ୍ବିତ ରାତି ପର୍ଯ୍ୟନ୍ତ ମାର୍କେଟ ଚାଲିବ। ଏଥିରେ ଦେଶୀ ବିଦେଶୀ ସମସ୍ତ ପ୍ରକାରର ପାରମ୍ପରିକ, ଅତ୍ୟାଧୁନିକ ତଥା ଗବେଷଣାତ୍ମକ ସାମଗ୍ରୀ ଉପଲବ୍ଧ ହେବ। ସେହିପରି ହସ୍ତତନ୍ତ ଏବଂ ହସ୍ତଶିଳ୍ପକୁ ପ୍ରୋତ୍ସାହିତ କରିବା ପାଇଁ ଉତ୍କଳିକା ପକ୍ଷରୁ ବିଭିନ୍ନ ପ୍ରକାର ଷ୍ଟଲ୍ ମାଧ୍ୟମରେ ସ୍ବତନ୍ତ୍ର ବସ୍ତ୍ର ପ୍ରଦର୍ଶନ ହେବ। କେବଳ ବଡ଼ ବ୍ରାଣ୍ଡ୍ ନୁହେଁ, ବରଂ ନିଜ ଉତ୍ପାଦ ପ୍ରଦର୍ଶନ ସହ ବିକ୍ରିବଟା ପାଇଁ ପ୍ଲାଟ୍ଫର୍ମ ଆବଶ୍ୟକ କରୁଥିବା ଓଡ଼ିଶାର ବିଭିନ୍ନ ଉଦ୍ୟୋଗୀଙ୍କୁ ଏଠାରେ ସୁଯୋଗ ଦିଆଯିବ। ନାଇଟ୍ ବଜାରରେ ଦର୍ଶକ ଓ ଗ୍ରାହକମାନେ ଜୁଏଲାରୀ, ହୋମ୍ ଡେକୋର୍, ପୋଷାକର ବିଭିନ୍ନ ଭେରାଇଟି ସହ ୧୨୦ରୁ ଊର୍ଦ୍ଧ୍ୱ ଘରୋଇ ଉତ୍ପାଦ କ୍ରୟ କରିପାରିବେ। ସେହିପରି ନାଇଟ୍ ବଜାରକୁ ଆସୁଥିବା ଲୋକଙ୍କୁ ମନୋରଞ୍ଜନ ଯୋଗାଇବ ସଙ୍ଗୀତ, ନୃତ୍ୟ ସହିତ ରକ୍ବ୍ୟାଣ୍ଡ, ମ୍ୟାଜିକ ଶୋ’। ଏକାମ୍ର ହାଟରେ ମୋଟ୍ ୩ଟି ଷ୍ଟେଜ୍ରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ। ଏଠାକୁ ଯିବା ପାଇଁ ଲୋକଙ୍କୁ କୌଣସି ଦେୟ ଦେବାକୁ ପଡିବ ନାହିଁ। ସହରବାସୀ ମାଗଣାରେ ଏହାର ମଜା ଉଠାଇ ପାରିବେ।