କେନ୍ଦୁଝର, ୨୮ା୧୨(ସ୍ବ.ପ୍ର.)- କେନ୍ଦୁଝର ସହରରେ ବାସହୀନ ଓ ଅସହାୟ ଲୋକଙ୍କ ପାଇଁ ରାତ୍ରି ଆଶ୍ରୟସ୍ଥଳୀ ଅଛି ହେଲେ ଦୂରତା ଦୃଷ୍ଟିରୁ ସେଠାକୁ ଯିବାକୁ ଲୋକେ ପସନ୍ଦ ନାହାନ୍ତି। ଫଳରେ ଏହି ଆଶ୍ରୟସ୍ଥଳୀ କାମରେ ଲାଗି ପାରୁନି। ସେଠାକୁ ଯାତାୟାତ ପାଇଁ କୌଣସି ବ୍ୟବସ୍ଥା ନ ଥିବାରୁ ଏବେ ମଧ୍ୟ ଜିଲାପାଳଙ୍କ କାର୍ଯ୍ୟାଳୟ ଆଖପାଖ ରାସ୍ତା କଡ଼ରେ ବହୁ ନିରାଶ୍ରୟ ଏବଂ ସହରରେ କାମଧନ୍ଦା କରୁଥିବା ଲୋକ ପ୍ରବଳ ଥଣ୍ଡାରେ ମଧ୍ୟ ଆଶ୍ରୟ ନେବାକୁ ବାଧ୍ୟ ହେଉଛନ୍ତି ା ଏପରିକି ଛୋଟ ପିଲାମାନେ ରାସ୍ତାକଡ଼ ଓ ଦୋକାନ ବାରଣ୍ଡାରେ ଶୋଉଥିବା ଦେଖିବାକୁ ମିଳୁଛି।
ମୁଖ୍ୟ ସହରଠାରୁ ୬ କି.ମି ଦୂର ତଥା କେନ୍ଦୁଝର ପୌରାଞ୍ଚଳର ପୁରୁଣା ସହର ଭୂମିଜ ସାହିରେ ୨୦୧୯ରୁ ରାଜ୍ୟ ସହରାଞ୍ଚଳ ବିକାଶ ସଂସ୍ଥା ସହାୟତାରେ ଚାଲିଆସୁଛି ଉକ୍ତ ଆଶ୍ରୟସ୍ଥଳୀ। ଏଠାରେ ୫୦ ଜଣ ଲୋକଙ୍କୁ ଆଶ୍ରୟ ଦେବା ପାଇଁ ବ୍ୟବସ୍ଥା ରହିଛି। ସେମାନଙ୍କୁ ରହିବା, ଶୋଇବା ସହିତ କମ୍ବଳ ଆଦି ଅନ୍ୟାନ୍ୟ ସୁବିଧା ଯୋଗାଇ ଦିଆଯାଉଛି। ତେବେ ଏହାର ସୁରକ୍ଷା ପାଇଁ ଆଗ ଓ ପଛ ପାଚେରୀ ନ ଥିବାରୁ ବାହାର ଲୋକ, ଜୀବଜନ୍ତୁ ତଥା ପଶୁମାନଙ୍କ ଅବାଧ ପ୍ରବେଶ ଯୋଗୁ ଏହି ଆଶ୍ରୟସ୍ଥଳୀ ଅସୁରକ୍ଷିତ ଅବସ୍ଥାରେ ରହିଛି ା ଏହାର ସୁରକ୍ଷା ପାଇଁ ୫ ଜଣ କର୍ମଚାରୀ ନିୟୋଜିତ ଅଛନ୍ତି ା କିନ୍ତୁ ବ୍ୟକ୍ତି ପିଛା କମ ଅର୍ଥ ମଞ୍ଜୁର ହେଉଥିବାରୁ ପରିଚାଳନା କିପରି ହେଉଥିବ ବେଶ ଅନୁମାନ କରିହେବ। ସେଥିରୁ ୫ଜଣଙ୍କ ପାଇଁ ଦୈନିକ ୪୦ ଟଙ୍କା ଏବଂ ଅବଶିଷ୍ଟମାନଙ୍କ ପାଇଁ ଦୈନିକ ୧୦ ଟଙ୍କା ହିସାବରେ ଖର୍ଚ୍ଚ ବ୍ୟବସ୍ଥା ରହିଥିବା ଦାୟିତ୍ୱରେ ଥିବା ଜଣେ କର୍ମଚାରୀ କହିଛନ୍ତି। ଲୋକଙ୍କୁ ସଚେତନ କରାଯାଇ ଆଶ୍ରୟସ୍ଥଳକୁ ଯିବାକୁ କୁହାଯାଉଛି। ସେହିପରି ବସ୍ରେ ଲୋକମାନେ ଯାଇ ପାରିବେ ବୋଲି ଆଶ୍ରୟସ୍ଥଳର ପରିଚାଳକ ଦୀପକ ଜେନା କହିଛନ୍ତି ା
ତେବେ ଜିଲାପାଳଙ୍କ କାର୍ଯ୍ୟାଳୟ ନିକଟରେ ସରକାରୀ ବସ୍ଷ୍ଟାଣ୍ଡ ଥିବାବେଳେ କଟକ ବସ୍ଷ୍ଟପ ତଥା ଦୂରରେ ତେଲକୋଇ, ବଡ଼ବିଲ ତଥା ବାରିପଦା ବସ୍ଷ୍ଟପ ରହିଥିବାରୁ ଏହାର ମଧ୍ୟସ୍ଥଳରେ ଆଶ୍ରୟସ୍ଥଳୀ ପ୍ରତିଷ୍ଠା ହେଲେ ଅଧିକ ଲୋକ ଉପକୃତ ହୋଇ ପାରନ୍ତେ ବୋଲି ସାମାଜିକ କର୍ମୀ ପ୍ରଦୀପ ମହାନ୍ତି କହିଛନ୍ତି। ସୂଚନାଯୋଗ୍ୟ ଯେ, ଆଶ୍ରୟସ୍ଥଳୀ ସ୍ଥାପନ ପାଇଁ କୃଷକ ବଜାର ସ୍ଥାନରେ ପୂର୍ବରୁ ନିଷ୍ପତ୍ତି ହୋଇଥିଲା ା କିନ୍ତୁ କାହିଁକି ଏଠାରେ ନ କରି ୬ କି.ମି. ଦୂରରେ କରାଗଲା ତାହାକୁ ନେଇ ନାନା ପ୍ରଶ୍ନବାଚୀ ସୃଷ୍ଟି ହେଉଛି। କେନ୍ଦୁଝର ପୌରାଞ୍ଚଳରେ ସ୍ଥାୟୀ ଆଶ୍ରୟୀସ୍ଥଳ ଥିବା ବେଳେ ବଡ଼ବିଲ, ଚମ୍ପୁଆ, ଯୋଡ଼ା, ଆନନ୍ଦପୁର ପୌରାଞ୍ଚଳରେ ମଧ୍ୟ ସ୍ଥାୟୀ ଆଶ୍ରୟସ୍ଥଳୀ ସ୍ଥାପନା ପାଇଁ ଦାବି ହେଉଛି।