ନାଉଗଁା,୩୦ା୧୧(ସ୍ବ.ପ୍ର.): ନାଉଗଁା ବ୍ଲକରେ ପିଡିଏସ୍ ସାମଗ୍ରୀ ପରିବହନରେ ସରକାରୀ ନିୟମ ଉଲ୍ଲଘଂନ ହେଉଛି। ଉକ୍ତ ବ୍ଲକରେ ସମୁଦାୟ ୧୭ ହଜାର ୨୫୪ ଜଣ ଖାଉଟି କାର୍ଡଧାରୀ ଥିବାବେଳେ ୬୩ ହଜାରରୁ ଊର୍ଦ୍ଧ୍ୱ ହିତାଧିକାରୀ ଅଛନ୍ତି। ହିତାଧିକାରୀମାନଙ୍କୁ ସୁବିଧାରେ ସାମଗ୍ରୀ ଯୋଗାଇବା ପାଇଁ ୨୬ଟି ଡିଲର ପଏଣ୍ଟ ରହିଛି। ପ୍ରତ୍ୟେକ ଡିଲର ପଏଣ୍ଟ ପ୍ରତିଦିନ ସକାଳ ୮ ଟାରୁ ୪ଟା ପର୍ଯ୍ୟନ୍ତ ଖୋଲା ରହିବା ସହ ଖୁଚୁରା ବିକ୍ରିୟ କେନ୍ଦ୍ରଗୁଡିକ ପ୍ରତ୍ୟହ ସକାଳ ୮ ଟାରୁ ୧୨ଟା ଓ ଅପରାହ୍ନ ୪ ଟାରୁ ୮ ଟା ପର୍ଯ୍ୟନ୍ତ ଖୋଲା ରହିବା ପାଇଁ ସରକାରୀ ନିୟମ ରହିଛି। ଖାଉଟି ସାମଗ୍ରୀ ସୁବିଧାରେ ପହଞ୍ଚାଇବା ପାଇଁ ଠିକାଦାର ନିଯୁକ୍ତ ହୋଇଛନ୍ତି। ପ୍ରତି ମାସରେ ଉକ୍ତ ଠିକାଦାର ସାମଗ୍ରୀକୁ ନିର୍ଦ୍ଧାରିତ ସମୟ ଅନୁସାରେ ସୁଚାରୁ ରୂପେ ଆଣି କେନ୍ଦ୍ରରେ ପହଞ୍ଚାଇବାକୁ ନିର୍ଦ୍ଦେଶ ରହିଛି। ମାତ୍ର ବ୍ଲକରେ ପିଡିଏସ୍ ସାମଗ୍ରୀ ପରିବହନରେ ନିଯୁକ୍ତ ଠିକାଦାର ମନମୁଖି ଭାବେ କାର୍ଯ୍ୟ କରୁଥିବା ଅଭିଯୋଗ ହୋଇଛି। ଓଡ଼ିଶା ପବ୍ଲିକ ଡିଷ୍ଟ୍ରିବ୍ୟୁଶନ ସିଷ୍ଟମ (କଣ୍ଟ୍ରୋଲ) ଆଦେଶ ୨୦୧୬ ଅନୁସାରେ, ଖାଉଟି ସାମଗ୍ରୀ ପହଞ୍ଚାଇବା ଦାୟିତ୍ୱରେ ଥିବା ଠିକାଦାର ରାତି ୮ଟା ମଧ୍ୟରେ ସାମଗ୍ରୀ କେନ୍ଦ୍ରରେ ପହଞ୍ଚାଇବେ। କିନ୍ତୁ ସମ୍ପୃକ୍ତ ଠିକାଦାର ନିୟମ ଉଲ୍ଲଂଘନ କରି ସୋମବାର ରାତି ୮ଟା ୩୦ ସମୟରେ ପିଡିଏସ୍ ପରିବହନ ଗାଡିରେ ଏହି ସାମଗ୍ରୀ ନେଇ ଗଙ୍ଗଦାହାଟରେ ଯାଉଥିବା ଦେଖିବାକୁ ମିଳିଥିଲା। ଉକ୍ତ ସାମଗ୍ରୀ ଡିଲର ପଏଣ୍ଟକୁ ଯାଉଥିଲା ନା ଅନ୍ୟ କୁଆଡ଼େ ଯାଉଥିଲା ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାର ଉଚ୍ଚସ୍ତରୀୟ ତଦନ୍ତ କରିବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
ଏ ସମ୍ପର୍କରେ ବ୍ଲକ ଯୋଗାଣ ନିରୀକ୍ଷକ ଅମିୟ ରଞ୍ଜନ ପ୍ରଧାନଙ୍କୁ ପଚାରିବାରେ କ’ଣ ପାଇଁ ରାତିରେ ପିଡିଏସ୍ ଗାଡି ଯାଇଥିଲା, ସେବିଷୟରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।