ଦାରିଙ୍ଗବାଡ଼ି,୪ା୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବଜାରର ନିହାର ରଞ୍ଜନ ସାହୁ ନିଜ ମୋବାଇଲରେ ଡିଜିଟାଲ ଆର୍ଟ କରି ଏବେ ଦାରିଙ୍ଗବାଡ଼ି ସମେତ ବିଭିନ୍ନ ସ୍ଥାନରେ ପରିଚୟ ସୃଷ୍ଟି କରିଛନ୍ତି। ପଲିଟେକ୍ନିକାଲରେ ଡିପ୍ଲୋମା କରିବା ପରେ ସେ ରାଜ୍ୟ ବାହାରେ କାର୍ଯ୍ୟ କରୁଥିଲେ। ଏବେ ସେ ଚାକିରି ଛାଡ଼ି ଡିଜିଟାଲ ଆର୍ଟ ମାଧ୍ୟମରେ ରୋଜଗାର କରିବା ସହ ଅନ୍ୟକୁ ମଧ୍ୟ ଏହି ଆର୍ଟ ଶିଖାଇବାକୁ ଯୋଜନା କରିଛନ୍ତି। ଦାରିଙ୍ଗବାଡ଼ିର ବିଶିଷ୍ଠ ବ୍ୟବସାୟୀ ବଳରାମ ସାହୁଙ୍କ ପୁଅ ନିହାରଙ୍କୁ ନେଇ ଅଞ୍ଚଳରେ ବହୁତ ଚର୍ଚ୍ଚା ଚାଲିଛି। ଆଜିକାଲି ଯୁବଗୋଷ୍ଠୀ ସ୍ମାର୍ଟ ମୋବାଇଲ ବ୍ୟବହାର କରି ଅନେକ ବିଭିନ୍ନ ଡିଜିଟାଲ ଗେମ୍ ଖେଳି ସମୟ ଅତିବାହିତ କରୁଥିବା ବେଳେ ନିହାର ଏହି ମୋବାଇଲରୁ ଅନ୍ୟ କିଛି କରି ଯୁବପିଢ଼ିଙ୍କ ପାଇଁ ରୋଲମଡେଲ ସାଜିଛନ୍ତି। ଡିଜିଟାଲ ଆର୍ଟରେ ବିଶେଷକରି ମହାପ୍ରଭୁ ଜଗନ୍ନାଥଙ୍କ ଚିତ୍ରକୁ ଅଧିକ ଗୁରୁତ୍ୱ ଦେଉଥିବା ବେଳେ ସେ ବିଭିନ୍ନ ଚିତ୍ର ବିଶେଷ କରି ବଲିଉଡ୍ ଫିଲ୍ମ୍ ‘ପୁଷ୍କରା’ର ପୋଷ୍ଟର କରିଥିବାରୁ ଫିଲ୍ମ ନାୟକ ସବ୍ୟସାଚୀ ତାଙ୍କ ପୋଷ୍ଟରେ ନିହାରଙ୍କୁ ପ୍ରଶଂସା କରିଛନ୍ତି। ସେହିପରି ଇକୋ ରିଟ୍ରିଟ୍ଠାରୁ ଆରମ୍ଭ କରି ସୂର୍ଯ୍ୟୋଦୟ, ସୂର୍ଯ୍ୟାସ୍ତ, ପ୍ରାଣୀମାନଙ୍କ ଚିତ୍ର ଆଙ୍କି ବେଶ୍ ପ୍ରଶଂସା ସାଉଁଟିଛନ୍ତି।