ନୂଆଦିଲ୍ଲୀ,୨୦।୫: ମହିଳା ବିଶ୍ୱ ବକ୍ସିଂ ଚାମ୍ପିୟନଶିପ୍ରେ ଥାଇଲ୍ୟାଣ୍ଡର ଜିତପୋଙ୍ଗ ଜୁତାମସ୍ଙ୍କୁ ପରାସ୍ତ କରି ଭାରତୀୟ ବକ୍ସର ନିଖତ ଜରିନ ସ୍ବର୍ଣ୍ଣ ପଦକ ଜିତିଛନ୍ତି। ସେ ୫୨ କିଲୋଗ୍ରାମ ଓଜନ ବର୍ଗରେ ଥାଇଲ୍ୟାଣ୍ଡର ଖେଳାଳିଙ୍କୁ ୫-୦ରେ ପରାସ୍ତ କରିଥିଲେ। ସେ ବିଶ୍ୱ ଚାମ୍ପିୟନଶିପ୍ରେ ସ୍ବର୍ଣ୍ଣ ଜିତିବାରେ ଭାରତର ପଞ୍ଚମ ମହିଳା ବକ୍ସର ହୋଇଛନ୍ତି। ତାଙ୍କ ପୂର୍ବରୁ ଏମସି ମେରୀକମ, ସରିତା ଦେବୀ, ଜେନି ଆରଏଲ ଏବଂ ଲେଖା ସି ମଧ୍ୟ ଏହି କୀର୍ତ୍ତିମାନ କରିଛନ୍ତି।
ଏହା ପୂର୍ବରୁ ସେ ୫୨ କିଲୋଗ୍ରାମ ବର୍ଗର ସେମିଫାଇନାଲ ମ୍ୟାଚରେ ବ୍ରାଜିଲର କାରୋଲିନ ଡି ଆଲମାଇଡାକୁ ୫-୦ରେ ପରାସ୍ତ କରିଥିଲେ। ନିଖତଙ୍କ ବ୍ୟତୀତ ଅନ୍ୟ ଦୁଇଜଣ ଭାରତୀୟ ବକ୍ସର ମନୀଷା ମୋନ (୫୭ କିଲୋଗ୍ରାମ) ଏବଂ ଡେବ୍ୟୁଣ୍ଟ ପରବୀନ ହୁଦା (୬୩ କିଲୋଗ୍ରାମ)ଙ୍କୁ ବ୍ରୋଞ୍ଜ ପଦକ ସହିତ ସନ୍ତୁଷ୍ଟ ହେବାକୁ ପଡିଥିଲା।