ନୂଆଦିଲ୍ଲୀ,୨୧।୫: ବିଶ୍ୱ ବକ୍ସିଂ ଚାମ୍ପିୟନଶିପ୍ରେ ସ୍ବର୍ଣ୍ଣ ଜିତି ଇତିହାସ ସୃଷ୍ଟି କରିଥିବା ଭାରତୀୟ ବକ୍ସର ନିଖତ୍ ଜରିନ ବଲିଉଡ୍ ଅଭିନେତା ସଲମାନ ଖାନଙ୍କ ବଡ଼ ପ୍ରଶଂସକ। ନିଜର ବିଜୟ ପରେ ସେ ତାଙ୍କର ଦୁଇଟି ସ୍ବପ୍ନ ଥିବା କଥା ପ୍ରକାଶ କରିଛନ୍ତି। ସେଥିରୁ ଗୋଟିଏ ହେଲା ଟୁଇଟରରେ ଟ୍ରେଣ୍ଡ କରିବା, ଯାହା ପୂରଣ ହୋଇଛି। ଆଉ ଅନ୍ୟଟି ହେଲା ସଲମାନଙ୍କୁ ଭେଟିବା।
ବିଜୟ ପରେ ସୋସିଆଲ ମିଡିଆରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିବା ନିଖତ ବିଭିନ୍ନ ଗଣମାଧ୍ୟମରେ ସାକ୍ଷାତକାର ଦେଉଛନ୍ତି। ତେବେ ସେଗୁଡ଼ିକ ମଧ୍ୟରୁ ଗୋଟିଏ ସାକ୍ଷାତକାରରେ ସେ ରୋକଠୋକ ଭାବେ ଜଣେ ଖବରଦାତାଙ୍କୁ ଜବାବ ଦେଇ ସଲମାନ ଆପଣଙ୍କ ଭାଇ ହୋଇଥିବେ, ମୋର କିନ୍ତୁ ‘ଜାନ୍’ ବୋଲି କହୁଥିବା ଦେଖାଯାଉଛି। ତାଙ୍କର ଏହି ବୟାନ ଏବେ ଚର୍ଚ୍ଚାର ବିଷୟ ପାଲଟିଛି।
ଅଭିନେତା ସଲମାନ ମଧ୍ୟ ନିଜର ଟୁଇଟର ଆକାଉଣ୍ଟରେ ସାକ୍ଷାତକାରର ଭିଡିଓ କ୍ଲିପ ଶେୟାର କରିଛନ୍ତି। ଏଥିସହ ସେ ନିଖତଙ୍କୁ ସ୍ବର୍ଣ୍ଣ ଜିତିବାକୁ ନେଇ ଅଭିନନ୍ଦନ ଜଣାଇଛନ୍ତି।