ଅନୁଗୋଳ,୨୬।୧୨(ଅମିତ ସାମଲ): ରାଉରକେଲା ସହରର ଭଞ୍ଜ ଭବନଠାରେ ଅନୁଷ୍ଠିତ ଓଡ଼ିଶା ସାଇନିଂ ଆଇକନର ସବ୍ ଜୁନିଅର ବର୍ଗରେ ଚମକିଛନ୍ତି ଅନୁଗୋଳ ଝିଅ ନିଖିତା ସାହୁ। ପ୍ରାୟ ୧୦ ଜଣ ମଡେଲଙ୍କୁ ପଛରେ ପକାଇ ସେ ମିସ୍ ଓଡ଼ିଶା ଟାଇଟଲ ହାସଲ କରିଛନ୍ତି। ନିଖିତାଙ୍କ ବାପା ବିଜୟ କୁମାର ସାହୁ ଏକ ଘରୋଇ କାରଖାନାରେ ଯନ୍ତ୍ରୀ ଭାବେ କାର୍ଯ୍ୟରତ ଥିବାବେଳେ ମା’ ଅଞ୍ଜଳି ମଧୁସ୍ମିତା ସାହୁ ଜଣେ ଗୃହିଣୀ। ନିଖିତା ଅନୁଗୋଳ ଜିଲା ନାଲ୍କୋର ଦିଲ୍ଲୀ ପବ୍ଲିକ ସ୍କୁଲରେ କ୍ଲାସ ୫ରେ ଅଧ୍ୟୟନରତ। ଓଡ଼ିଶା ସାଇନିଂ ଆଇକନ ପ୍ରତିଯୋଗିତାର ପ୍ରଥମ ପର୍ଯ୍ୟାୟ ଅନ୍ଲାଇନରେ ହୋଇଥିଲା। ଏଥିରେ ୪୦୦ରୁ ଊର୍ଦ୍ଧ୍ୱ ପ୍ରତିଯୋଗୀ ଅଂଶଗ୍ରହଣ କରିଥିଲେ। ପ୍ରତ୍ୟେକ ବିଭାଗରେ ୧୦ ଜଣ ଲେଖାଏ ପ୍ରତିଯୋଗୀଙ୍କୁ ଚୟନ କରାଯାଇ ଫାଇନାଲକୁ ପ୍ରବେଶ କରାଯାଇଥିଲା। ସେମାନଙ୍କ ମଧ୍ୟରେ ହୋଇଥିବା ପ୍ରତିଯୋଗିତାରେ ନିଖିତା ବିଜୟ ଲାଭ କରିବା ସହ ଓଡ଼ିଶା ସାଇନିଂ ଆଇକନର କ୍ରାଉନ ହାସଲ କରିଛନ୍ତି। ଆଗକୁ ଜଣେ ସଫଳ ଫ୍ୟାଶନ ଡିଜାଇନର ହେବାକୁ ଲକ୍ଷ୍ୟ ଥିବା ନିଖିତା ପ୍ରକାଶ କରିଛନ୍ତି।