ନିଶ୍ଚିନ୍ତକୋଇଲି,୨୭ା୧୨(ସ୍ବ.ପ୍ର.): ଦିନକୁ ଦିନ ଚାଷ ଜମି କମି ଯାଉଥିବାବେଳେ ପଲ୍ଲୀରୁ ଦିଲ୍ଲୀ ସବୁଠି କୋଠାବାଡ଼ି ଦେଖିବାକୁ ମିଳୁଛି। ଅପରପକ୍ଷେ ଅଧିକ ଲାଭ ଆଶାରେ କ୍ଷେତରେ ରାସାୟନିକ ସାର, କୀଟନାଶକ ବ୍ୟବହାର କରାଯାଉଛି। ଏହାକୁ ଖାଇ ଲୋକେ ଦୁରାରୋଗ୍ୟ ବ୍ୟାଧିରେ ପୀଡ଼ିତ ହେଉଛନ୍ତି। ଏଭଳିସ୍ଥିତିରେ ଜଣେ ଅବସରପ୍ରାପ୍ତ ସରକାରୀ କର୍ମଚାରୀ ପରିଣତ ବୟସରେ ଛାତ ଉପରେ କିଚେନ ଗାର୍ଡେନ କରି ଯୁବ ଚାଷୀଙ୍କ ପାଇଁ ପ୍ରେରଣା ପାଲଟିଛନ୍ତି। କଟକ ଜିଲା ନିଶ୍ଚିନ୍ତକୋଇଲି ବ୍ଲକ ବଡ଼କ୍ଷୀର ପଞ୍ଚାୟତ ଅନ୍ତର୍ଗତ ଗୋପପୁର( ରଙ୍ଗମୁଣ୍ଡାଇ ) ଗ୍ରାମର ନୀଳକଣ୍ଠ ନନ୍ଦ ସରକାରୀ ଚାକିରିରୁ ଅବସର ନେବା ଘରେ ଛାତ ଉପରେ ପରିବା ଚାଷ ପାଇଁ ଇଚ୍ଛା କରିଥିଲେ। ଏନେଇ ବର୍ଜ୍ୟବସ୍ତୁ ଭାବେ ପରିଗଣିତ ପ୍ଲାଷ୍ଟିକ ଡବା, ଟିଣ ଓ ପଲିଥିନକୁ ଏକତ୍ର କରି ଛାତ ଉପରେ ପରିବା ଓ ଫୁଲ ଚାଷ ଆରମ୍ଭ କରିଥିଲେ। ରାସାୟନିକ ସାର ପ୍ରୟୋଗ ନ କରି ସମ୍ପୂର୍ଣ୍ଣ ଜୈବିକ ପଦ୍ଧତିରେ ଚାଷ କରିଥିଲେ। ଏବେ ତାଙ୍କ ଘର ଛାତ ଉପରେ କ୍ଷେତ ଭଳି ପନିପରିବା ହୋଇଛି। ଭଲ ପନିପରିବା ହେବା ଯୋଗୁ ଲକ୍ଡାଉନ ସମୟରେ ପରିବା ଦର ହୁ ହୁ ହୋଇ ବଢ଼ିଥିବାବେଳେ ନୀଳକଣ୍ଠଙ୍କ ଉପରେ କୌଣସି ପ୍ରଭାବ ପଡ଼ି ନ ଥିଲା। ଏହି ସମୟରେ ସେ ପଡ଼ୋଶୀଙ୍କୁ ପନିପରିବା ଦେଇ ସମସ୍ତଙ୍କ ପାଇଁ ପ୍ରେରଣା ପାଲଟିଥିଲେ। ତାଙ୍କଠାରୁ ଉତ୍ସାହିତ ହୋଇ ସ୍ଥାନୀୟ ଅଞ୍ଚଳରେ ବହୁ ଲୋକ ଏବେ ଛାତ ଉପରେ ପରିବା ଚାଷ କରିବା ଆରମ୍ଭ କରିଛନ୍ତି। ଏ ସମ୍ପର୍କରେ ନୀଳକଣ୍ଠ କୁହନ୍ତି, ଛାତ ଉପରେ ଜୈବିକ ପ୍ରଣାଳୀରେ ପରିବା ଚାଷ କଲେ ସତେଜ ପନିପରିବା ଖାଇ ସୁସ୍ଥ ଓ ନୀରୋଗ ରହିବା ସହ ନିଜ ଆର୍ଥତ୍କ ମାନଦଣ୍ଡକୁ ସୁଦୃଢ଼ କରାଯାଇପାରିବ।