ଭାପୁର,୫ା୫(ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାର ଜନସାଧାରଣଙ୍କ ପାଇଁ ବିଭିନ୍ନ ପ୍ରକାରର ଯୋଜନା କରିଛନ୍ତି। କୌଣସି ଗରିବ ଓ ଅସହାୟ ବ୍ୟକ୍ତି ଚାଳ ଘରେ ରହିବ ନାହିଁ ବୋଲି ଆବାସ ଯୋଜନା ପ୍ରଣୟନ କରିଛନ୍ତି। ହେଲେ ନୟାଗଡ଼ ଜିଲା ଭାପୁର ବ୍ଲକ ନିମାଣୀ ପଞ୍ଚାୟତରୁ ଆସିଛି ଏକ ସଙ୍ଗୀନ ଅଭିଯୋଗ। ଜଣେ ହିତାଧିକାରୀଙ୍କ ଅଗୋଚରରେ ଆବାସ ଯୋଜନା ହଡ଼ପ କରାଯାଇଥିବା ନେଇ ଜଲା ପ୍ରଶାସନ ନିକଟରେ ଅଭିଯୋଗ ହୋଇଛି। ନିମାଣୀ ଗାଁର ସୁରେଶ ଚନ୍ଦ୍ର ସ୍ବାଇଁଙ୍କ ଅଭିଯୋଗ ଅନୁଯାୟୀ, ୨୦୧୭-୧୮ ଆର୍ଥିକ ବର୍ଷରେ ନିମାଣୀ ପଞ୍ଚାୟତ ମାଧ୍ୟମରେ ଭାପୁର ବ୍ଲକରୁ ପ୍ରଧାନମନ୍ତ୍ରୀ ଆବାସ ଯୋଜନା ମିଳିଥିଲା। ସୁରେଶ ଗୃହ ନିର୍ମାଣ କରି ନ ଥିବା ବେଳେ କେତେଜର ଅସାଧୁ ବ୍ୟକ୍ତି ଟଙ୍କା ଉଠାଇ ଅନ୍ୟ ନାମରେ ହଡ଼ପ କରି ନେଇଛନ୍ତି। ସନ୍ନ୍ୟାସୀ ସ୍ବାଇଁଙ୍କ ସାନପୁଅ ସୁରେଶ ଚନ୍ଦ୍ର ସ୍ବାଇଁ ନାମରେ ଆବାସ ଯୋଜନା ଆସିଥିଲେ ମଧ୍ୟ ତାଙ୍କ ଅଗୋଚରରେ ତାଙ୍କ ନାମରେ ମିଥ୍ୟା ସତ୍ୟପାଠ କରି ପଞ୍ଚାୟତର କେତେଜର ବ୍ୟକ୍ତି ବଡ଼ଭାଇ ସତ୍ୟାନନ୍ଦ ସ୍ବାଇଁ ତାଙ୍କ ପତ୍ନୀ ବାସୀଙ୍କ ନାମରେ ନେଇଯାଇଥିଲେ। ସୁରେଶଙ୍କ ପତ୍ନୀ ମାନସୀ କହିଥିଲେ, ଆମେ ଗରିବ ଅସହାୟ ଅଟୁ। ସ୍ବାମୀ ମୁଲ ଲାଗି ଯାହା ରୋଜଗାର କରି ଆଣନ୍ତି ସେଥିରେ ପୁଅ ଓ ଝିଅଙ୍କୁ ମିଶାଇ ୪ ପ୍ରାଣୀ ବହୁ କଷ୍ଟରେ ଚଳୁ। ତାଙ୍କ ନାମରେ ଆସିଥିବା ଆବାସ ନେଇ ତାଙ୍କ ଭାଇ ଗୃହ ନିର୍ମାଣ କରି ସମସ୍ତ ଟଙ୍କା ଉଠାଇ ନେଇଛନ୍ତି। ସୁରେଶ ବର୍ତ୍ତମାନ ତାଙ୍କ ପରିବାରକୁ ନେଇ ଗାଁ ମୁଣ୍ଡ ଶାଳ ଜଙ୍ଗଲ ନିକଟରେ ମାଟି କାନ୍ଥ ଘରେ ଜରି ପାଲ ପକାଇ ପରିବାର ସହ ରହୁଛନ୍ତି। ଏ ନେଇ ସୁରେଶ ନୟାଗଡ଼ ଜିଲାପାଳ, ସ୍ଥାନୀୟ ବିଧାୟକ ଓ ଭାପୁର ବିଡିଓ ରଞ୍ଜିତ କୁମାର ମଲ୍ଲିକଙ୍କୁ ନ୍ୟାୟ ପାଇଁ ଲିଖିତ ଅଭିଯୋଗ କରିଛନ୍ତି। ଏ ସମ୍ପର୍କରେ ବିଡିଓ ମଲ୍ଲିକଙ୍କୁ ପଚାରିବାରେ ଅଭିଯୋଗ ପାଇଛି, ଖୁବ୍ଶୀଘ୍ର ଏହାର ତଦନ୍ତ କରିଯିବ ବୋଲି ସେ କହିଛନ୍ତି।
ସୂଚନା ଅନୁଯାୟୀ, ପୂର୍ବରୁ ସେହି ପଞ୍ଚାୟତ ସୁଦାମ ନାୟକ ୨୦୧୭-୧୮ ମସିହାରେ ଆବାସ ଯୋଜନା ପାଇବା ପାଇଁ ଯୋଗ୍ୟ ବିବେଚିତ ହୋଇଥିଲେ। ତେବେ ତାଙ୍କ ଅଜଣାତରେ ଆସିଥିବା ଆବାସ ଯୋଜନାର ଅର୍ଥ ହଡ଼ପ ହେବା ସହ ସେ ସହାୟତା ରାଶି ପାଇବାରୁ ବଞ୍ଚତ୍ତ ହୋଇଥିଲେ। ତେବେ ବ୍ଲକ୍ ପ୍ରଶାସନ ସୁଦାମଙ୍କ ଚାଳଛପର ଘର ଦେଖି ତାଜୁବ ହୋଇଯାଇଥିଲେ। ବ୍ଲକ ପ୍ରଶାସନର ଖୋଳତାଡରୁ ତତ୍କାଳୀନ ଜିଆର୍ଏସ୍ ଅର୍ଥ ଲୋଭରେ ଚତୁରତାର ସହିତ ଅର୍ଥ ହଡପ କରିଥିଲେ। ଆବାସ ଜାଲିଆତି ଘଟଣାରେ ଜାଲ କାଗଜପତ୍ରରେ ଅର୍ଥ ହଡପ ପାଇଁ ଜିଆରଏସ୍କୁ ଜିଲା ପ୍ରଶାସନ ସେହି ସମୟରେ ଚାକିରିରୁ ବିଦା କରିଥିଲେ। ପୁଣି ସେହି ଘଟଣାର ପୁନରାବୃତ୍ତି ଘଟିଛି ବୋଲି ସାଧାରଣରେ ଚର୍ଚ୍ଚା ଚାଲିଛି। ପ୍ରଶାସନ ପକ୍ଷରୁ ତଦନ୍ତ କରାଯାଇ ଦୋଷୀମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସାଧାରଣରେ ଦାବି ହେଉଛି।