ଭୁବନେଶ୍ୱର,୨୭ା୪(ବ୍ୟୁରୋ): ଜଟଣୀ ବିଧାୟକ ସୁରେଶ କୁମାର ରାଉତରାୟ ନିଜର ମନ୍ତବ୍ୟକୁ ନେଇ ଗଣମାଧ୍ୟମରେ ଚର୍ଚ୍ଚାରେ ରହିଥାଆନ୍ତି। ବିଭିନ୍ନ ପ୍ରସଙ୍ଗ ଉପରେ ମତ ଦେଇ ଗଣମାଧ୍ୟମର ଦୃଷ୍ଟି ଆକର୍ଷଣ କରିଥାଆନ୍ତି। ବେଳେ ବେଳେ ତାଙ୍କର ଏହି ମନ୍ତବ୍ୟ ଦଳ ପାଇଁ ବୁମେରାଂ ହୋଇଥାଏ। ଗତ କିଛିଦିନ ହେବ ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ପରିବର୍ତ୍ତନକୁ ନେଇ କଂଗ୍ରେସ ରାଜନୀତି ଏବେ ସରଗରମ ରହିଛି। ଦଳମର ବିଧାୟକ ଓ ନେତାମାନେ ପିସିସି ସଭାପତି ପରିବର୍ତ୍ତନ କରିବା ନେଇ ଦଳୀୟ ଫୋରମରେ ଆଲୋଚନା ନ କରି ବିଭିନ୍ନ ସମୟରେ ଗଣମାଧ୍ୟମରେ ବୟାନ ଦେଉଛନ୍ତି। ଯାହକି ଦଳ ପାଇଁ କ୍ଷତିକାରକ ପରିସ୍ଥିତି ସୃଷ୍ଟି କରୁଛି। ରାଜ୍ୟରେ ଦଳର ସ୍ଥିତି ଅତ୍ୟନ୍ତ ଖରାପ ଅବସ୍ଥାରେ ଥିବା ବେଳେ ଦଳୀୟ ନେତାମାନଙ୍କର ଏଭଳି ମନ୍ତବ୍ୟ କଂଗ୍ରେସ ପାଇଁ ଅଡୁଆ ପରିସ୍ଥିତି ସୃଷ୍ଟି କରୁଛି। ଏପରି ସ୍ଥଳେ ଗତ ୨୩ ତାରିଖରେ ସୁରେଶ ରାଉତରାୟ ପିସିସି ପରିବର୍ତ୍ତନକୁ ନେଇ ଏକ ବିବାଦୀୟ ବୟାନ ଦେଇଥିଲେ। ସେ କହିଥିଲେ ଯେ ପିସିସି ସଭାପତି କିଏ ହେବେ ତାହା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଷ୍ପତ୍ତି କରନ୍ତି। ଏହାକୁ ନେଇ କଂଗ୍ରେସ ମହଲରେ ଅସନ୍ତୋଷ ଦେଖାଦେଇଛି। ମଙ୍ଗଳବାର ପିସିସି ସଭାପତି ନିରଞ୍ଜନ ପଟ୍ଟନାୟକ ସୁରେଶ ରାଉତରାୟଙ୍କୁ ନିଜର ବିବାଦୀୟ ମନ୍ତବ୍ୟ ପାଇଁ ନୋଟିସ ଜାରି କରିଛନ୍ତି।
ନୋଟିସରେ ନିରଞ୍ଜନ ଦର୍ଶାଇଛନ୍ତି ଯେ ଖୁବ୍ ନିକଟରେ ଗଣମାଧ୍ୟମରେ ଦଳର ଆଭ୍ୟନ୍ତରୀଣ ବ୍ୟାପାର ସମ୍ପର୍କରେ ଆପଣ ମନ୍ତବ୍ୟ ଦେଇ କହିଛନ୍ତି ଯେ କଂଗ୍ରେସରେ କିଏ ସଭାପତି ହେବେ ସେ ସଂକ୍ରାନ୍ତରେ ନବୀନବାବୁ ନିଷ୍ପତ୍ତି ନିଅନ୍ତି। ଏହି ମନ୍ତବ୍ୟ କଂଗ୍ରେସ ପାଇଁ ଅତ୍ୟନ୍ତ କ୍ଷତିକାରକ। ଏଥିପାଇଁ ଦଳ ସମାଲୋଚିତ ହେବା ସହ ଭାବମୂର୍ତ୍ତି କ୍ଷୁର୍ଣ୍ଣ ହୋଇଛି। ଆପଣଙ୍କ ଭଳି ଜଣେ ବରିଷ୍ଠ ନେତାଙ୍କ ପକ୍ଷେ ଏଭଳି ବୟାନ ଶୋଭା ପାଉନାହିଁ। କେଉଁ ପରିସ୍ଥିତିରେ ଏଭଳି ବୟାନ ଦେଇଛନ୍ତି ସେ ସମ୍ପର୍କରେ ସନ୍ତୋଷଜନକ ଉତ୍ତର ଖୁବ୍ଶୀଘ୍ର ଦେବାକୁ କୁହାଯାଇଛି। ଏହି ଉତ୍ତର ମିଳିବା ପରେ ଏହାକୁ ଅଖିଳ ଭାରତ କଂଗ୍ରେସ କମିଟିକୁ ପଠାଯିବ ବୋଲି ନିରଞ୍ଜନ ପରୋକ୍ଷରେ ଚେତାବନୀ ଦେଇଛନ୍ତି। ଏହାର ପ୍ରତିକ୍ରିୟାରେ ସୁର କହିଛନ୍ତି ଯେ ଉତ୍ତର ଦେବି। ମୁଁ କିଛି ସେମିତି ବିରାଟ ଭୁଲ କରିନି। ମୁଁ ଯାହା କହିଛି ଆଗରୁ ପିସିସି ସଭାପତି ସେୟା କହିଥିଲେ। ଜୟଦେବ ଜେନା ମଧ୍ୟ କହିଥିଲେ। ଆକ୍ରୋଶମୂଳକ ଭାବେ ଏହି ନୋଟିସ ଦିଆଯାଇଛି ବୋଲି ସେ କହିଛନ୍ତି।