ନୂଆଦିଲ୍ଲୀ,୧୫।୧୦: ଭାରତୀୟ ଜନତା ପାର୍ଟି (ଭାଜପା) ଏମପି ନିଶିକାନ୍ତ ଦୁବେ ଲୋକ ସଭା ବାଚସ୍ପତି ଓମ ବିର୍ଲାଙ୍କୁ ଚିଠି ଲେଖି ତ୍ରୁଣମୁଳ କଂଗ୍ରେସ (ଟିଏମସି) ନେତା ମହୁଆ ମୋଇତ୍ରାଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ଏଥିସହ ନିଶିକାନ୍ତ ଦୁବେ ସୁପ୍ରିମକୋର୍ଟର ଓକିଲ ଜୟ ଅନନ୍ତ ଦେହଦ୍ରାଇଙ୍କ ଚିଠିକୁ ଦର୍ଶାଇ ତଦନ୍ତ ଦାବି କରିଛନ୍ତି।
ଓମ ବିର୍ଲାଙ୍କୁ ଲେଖାଯାଇଥିବା ଚିଠିରେ ଭାଜପା ଏମପି ଟିଏମସି ଏମପି ମହୁଆ ମୋଇତ୍ରାଙ୍କୁ ଲୋକ ସଭାରେ ପ୍ରଶ୍ନ ପଚରାଯିବା ନାମରେ ଲାଞ୍ଚ ନେଇଥିବା ଅଭିଯୋଗ କରିଛନ୍ତି। ସେ ଲେଖିଛନ୍ତି ଯେ ଏହା ଗୃହକୁ ଅବମାନନା କରୁଛି। ଏହାର ତୁରନ୍ତ ଯାଞ୍ଚ କରାଯିବା ଉଚିତ।
ଏହି ଚିଠିରେ ସେ କହିଛନ୍ତି ଯେ ମୁଁ ଆଡଭୋକେଟ ଜୟ ଅନନ୍ତ ଦେହାଦ୍ରାଇଙ୍କଠାରୁ ଏକ ଚିଠି ପାଇଛି ଯେଉଁଥିରେ ସେ ମହୁଆଙ୍କୁ ପ୍ରଶ୍ନ ବଦଳରେ ଲାଞ୍ଚ ନେଇଥିବାର ଅଭିଯୋଗ କରିଛନ୍ତି। ଭାଜପା ଏମପି ଚିଠିରେ ଲେଖିଛନ୍ତି ଯେ ଜଣେ ପ୍ରସିଦ୍ଧ ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କ ବ୍ୟବସାୟିକ ସ୍ବାର୍ଥକୁ ଦୃଷ୍ଟିରେ ରଖି ପ୍ରଶ୍ନ ପଚରାଯାଇଥିଲା।
ନିଶିକାନ୍ତ ଦୁବେ ଚିଠିରେ ଲେଖିଛନ୍ତି ଯେ, ମହୁଆଙ୍କ ନିକଟରେ ହୋଇଥିବା ୬୧ ଟି ପ୍ରଶ୍ନ ମଧ୍ୟରୁ ୫୦ ଟି ଏପରି ପ୍ରଶ୍ନ ଥିଲା ଯାହାକି ଦର୍ଶନ ହିରାନନ୍ଦାନୀ ଏବଂ ତାଙ୍କ କମ୍ପାନୀର ବ୍ୟବସାୟିକ ସ୍ବାର୍ଥର ସୁରକ୍ଷା କିମ୍ବା ଲାଭ ପାଇଁ କୁହାଯାଇଥିଲା।