ପାଟନା,୨୬।୭: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ପୁଣି ଥରେ ରାଜ୍ୟ ଶାସନ ପ୍ରସଙ୍ଗରେ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ସେ ରାଜ୍ୟସ୍ବ ଏବଂ ଜମି ସଂସ୍କାର ବିଭାଗରେ ହୋଇଥିବା ୪୮୦ ବଦଳିକୁ ବାତିଲ କରି ଏକ ଦୃଢ଼ ବାର୍ତ୍ତା ଦେଇଛନ୍ତି।
ତେବେ ଜୁନ୍ରେ ରାଜ୍ୟର ରାଜସ୍ବ ଏବଂ ଜମି ସଂସ୍କାର ବିଭାଗରେ ୪୮୦ ଅଫିସରଙ୍କ ବଦଳି-ପୋଷ୍ଟିଂ କରାଯାଇଥିଲା। ଏହାକୁ ମୁଖ୍ୟମନ୍ତ୍ରୀ ବାତିଲ କରିଛନ୍ତି। ଡେପୁଟି ସିଏମ୍ ତେଜସ୍ବୀ ଯାଦବଙ୍କ ନିକଟତର କୁହାଯାଉଥିବା ଆଲୋକ ମେହେଟ୍ଟା ଏହି ବିଭାଗର ମନ୍ତ୍ରୀ ଥିବା ବେଳେ ନୀତୀଶଙ୍କ ଏଭଳି ଆଭିମୁଖ୍ୟ ଚର୍ଚ୍ଚାର ବିଷୟ ପାଲଟିଛି।
ଆର୍ଜେଡି କୋଟାର ମନ୍ତ୍ରୀ ବିଭାଗର ବଦଳି ବାତିଲ ହେବା ପରେ ବିହାରର ମେଣ୍ଟ ସରକାରରେ ସବୁକିଛି ଠିକ୍ ଚାଲିଛି ତ ବୋଲି ପ୍ରଶ୍ନ ଉଠିବାରେ ଲାଗିଛି। ଏପରିକି ନିଜ ସର୍ତ୍ତ ଅନୁଯାୟୀ ସରକାର ଚଳାଇବେ ବୋଲି ସ୍ପଷ୍ଟ କରିଥିବା କୁହାଯାଉଛି।