ନିଜ ଅସ୍ତିତ୍ୱ ବଞ୍ଚାଇବା ପାଇଁ ରାହୁଲଙ୍କ ଶରଣରେ ନୀତୀଶ-ଲାଲୁ: ବାବୁଲାଲ ମରାଣ୍ଡି…

ରାଞ୍ଚି,୨୬।୬ : ଜରୁରୀକାଳୀନ ପରିସ୍ଥିତି ନେଇ ମନ୍ତବ୍ୟ ଦେବା ଅବସରରେ ପୂର୍ବତନ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ତଥା ବିଧାନସଭାର ଭାଜପାର ନେତା ବାବୁଲାଲ ମରାଣ୍ଡି ବିରୋଧୀ ଏକତାକୁ ଟାର୍ଗେଟ କରିଛନ୍ତି। ପାଟନାରେ ବିରୋଧୀ ଦଳର ବୈଠକରେ କଂଗ୍ରେସ, ଆରଜେଡି ଏବଂ ଜେଡିୟୁ ଗୋଟିଏ ପ୍ଲାଟଫର୍ମରେ ଦେଖାଯାଇଥିବାକୁ ଦର୍ଶାଇ ସେ କହିଛନ୍ତି ଆରଜେଡ଼ିର ଲାଲୁ ପ୍ରସାଦ ଯାଦବ ଏବଂ ଜେଡ଼ିୟୁର ମୁଖ୍ୟମନ୍ତ୍ରୀ ନୀତୀଶ କୁମାର ସେମାନଙ୍କ ଅସ୍ତିତ୍ୱ ବଞ୍ଚାଇବା ପାଇଁ କଂଗ୍ରେସରେ ରାହୁଲଙ୍କ ଶରଣ ନେଇଛନ୍ତି। ସେମାନଙ୍କୁ ଭାରତରେ ଲାଗୁ ହୋଇଥିବା ଜରୁରୀକାଳୀନ ପରିସ୍ଥିତିର ନିନ୍ଦା କରିବା ଆବଶ୍ୟକ।

ସୂଚନାଯୋଗ୍ୟ, ୨୫ ଜୁନ, ୧୯୭୫ ରେ ଦେଶର ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଜରୁରୀକାଳୀନ ପରିସ୍ଥିତି ଲଗାଇଥିଲେ। ଜରୁରୀକାଳୀନ ପରିସ୍ଥିତି ବିରୋଧରେ ଜୟପ୍ରକାଶ ନାରାୟଣଙ୍କ ଆନ୍ଦୋଳନରେ ସକ୍ରିୟ ଥିବା ଛାତ୍ର ନେତା ନୀତୀଶ କୁମାର ଏବଂ ଲାଲୁ ଯାଦବ ପ୍ରଥମ ଥର ପାଇଁ ଜାତୀୟ ରାଜନୀତିରେ ପ୍ରବେଶ କରିଥିଲେ। ପରେ ଉଭୟ ଜନତା ପାର୍ଟିରେ ଏକାଠି ହୋଇଥିଲେ। ଭାଜପା ନେତା ବାବୁଲାଲ ମାରାଣ୍ଡି କହିଛନ୍ତି ଜରୁରୀକାଳୀନ ପରିସ୍ଥିତି ଲାଗୁ କରିଥିବାରୁ କଂଗ୍ରେସ ମଧ୍ୟ ଦେଶବାସୀଙ୍କୁ କ୍ଷମା ମାଗିବା ଉଚିତ। ୨୫ ଜୁନ ଦିନ ଗଣତନ୍ତ୍ରକୁ ବେଡ଼ିରେ ବନ୍ଧା ଯାଇଥିଲା। ଗଣତାନ୍ତ୍ରିକ ଅନୁଷ୍ଠାନ, ମୌଳିକ ଅଧିକାର ଏବଂ ଜନ ବିରୋଧକୁ ରଦ୍ଦ କରାଯାଇଥିଲା। ବିରୋଧୀମାନେ ସବୁ ପ୍ରକାର ନିର୍ଯାତନାର ଶିକାର ହୋଇଥିଲେ। ସେମାନଙ୍କୁ ଜେଲରେ ନିର୍ଯାତନା ଦିଆଯାଉଥିଲା। ସେହି ସମୟରେ ଜେଲ ଯାଇଥିବା ଲୋକଙ୍କ ମଧ୍ୟରେ ଲାଲୁ ପ୍ରସାଦ ଏବଂ ନୀତୀଶ କୁମାରଙ୍କ ଭଳି ନେତା ମଧ୍ୟ ଥିଲେ। ରାଜନୈତିକ ବନ୍ଦୀମାନଙ୍କ ପାଇଁ ଆଣାଯାଇଥିବା ମିସା ଆଇନର ଅପବ୍ୟବହାର କରାଯାଇଥିଲା ।
ବିରୋଧୀ ଦଳର ବୈଠକର ଏକ ଫଟୋ ଟୁଇଟ କରି ସେ ଲେଖିଛନ୍ତି ଆତ୍ମ ସମ୍ମାନ ଥିବା ବ୍ୟକ୍ତି ଆଦୌ ବିରୋଧୀ ଏକତା ମଧ୍ୟରେ କାମ କରିବେ ନାହିଁ।