ପାଟନା, ୨।୧: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ତାଙ୍କ ପୁଅ ନିଶାନ୍ତ ଏପରିକି କ୍ୟାବିନେଟ ମନ୍ତ୍ରୀଙ୍କଠାରୁ ଗରିବ। ସର୍ବସାଧାରଣଙ୍କ ଅବଗତି ନିମନ୍ତେ ନୀତୀଶ ଓ ତାଙ୍କ ସରକାରର ମନ୍ତ୍ରୀମାନେ ଦେଇଥିବା ବ୍ୟକ୍ତିଗତ ସମ୍ପତ୍ତି ସୂଚନାରୁ ଏହା ଜଣାପଡିଛି। କ୍ୟାବିନେଟ ସେକ୍ରେଟେରିଏଟ୍ ୱେବ୍ସାଇଟରେ ଦିଆଯାଇଥିବା ତଥ୍ୟ ଅନୁଯାୟୀ, ନୀତୀଶ କୁମାରଙ୍କ ପାଖରେ ନଗଦ ୩୫, ୮୮୫ ଏବଂ ବ୍ୟାଙ୍କରେ ପାଖାପାଖି ୩୪,୦୦୦ ଟଙ୍କା ଜମା ରହିଛି। ପୁଅ ନିଶାନ୍ତଙ୍କ ପାଖରେ ୨୮,୨୯୭ ନଗଦ ଏବଂ ୧ କୋଟି ଟଙ୍କା ସ୍ଥାୟୀ ଜମା ରହିଛି। ମୁଖ୍ୟମନ୍ତ୍ରୀଙ୍କଠାରେ ୯୮,୦୦୦ ଟଙ୍କାର ଅଳଙ୍କାର ଥିବାବେଳେ ନିଶାନ୍ତଙ୍କ ନିକଟରେ ୨୦ ଲକ୍ଷରୁ ଅଧିକ ମୂଲ୍ୟର ଗହଣା ରହିଛି। ଏନ୍ଡିଏ ସରକାରଙ୍କ ଅଂଶବିଶେଷ ଥିବା ବିକାଶଶୀଳ ଇନ୍ସାନ ପାର୍ଟି (ଭିଆଇପି)ର ପ୍ରତିଷ୍ଠାତା ମୁକେଶ ସାହାନି କ୍ୟାବିନେଟର ସବୁଠାରୁ ଧନୀ ମନ୍ତ୍ରୀ ବୋଲି ସୂଚନା ଦିଆଯାଇଛି। ୨୦୧୦ରେ ସମସ୍ତ କ୍ୟାବିନେଟ ମନ୍ତ୍ରୀଙ୍କ ପାଇଁ ବର୍ଷର ପ୍ରଥମ ଦିନରେ ସେମାନଙ୍କର ସମ୍ପତ୍ତି ବିବରଣୀ ପ୍ରକାଶ କରିବାକୁ ନୀତୀଶ ସରକାର ବାଧ୍ୟତାମୂଳକ କରିଥିଲେ।