ନୂଆଦିଲ୍ଲୀ,୧୦।୯: ସେପ୍ଟେମ୍ବର ୧୯ରୁ ଆରମ୍ଭ ହେବାକୁ ଯାଉଛି ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ର ୧୩ତମ ସଂସ୍କରଣ। ଏହାର ପ୍ରଥମ ମ୍ୟାଚ୍ ଚେନ୍ନାଇ ସୁପରକିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳାଯିବ। ତେବେ ଆଇପିଏଲ୍ ଆରମ୍ଭ ହେବା ଦିନଠାରୁ କିଛି ନା କିଛି ବିବାଦ ମୁଣ୍ଡଟେକିବାର ନଜିର ରହିଛି। ସେହିଭଳି ଗୋଟିଏ ହେଲା ୧୧ତମ ସିଜନ୍ରେ କୋଲକାତା ନାଇଟ୍ ରାଇଡର୍ସ ଖେଳାଳି ନୀତିଶ ରାଣା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ବିପକ୍ଷରେ ଭଲ ପ୍ରଦର୍ଶନ କରିଥିଲେ। ସେ ଲଗାତାର ଦୁଇଟି ବଲ୍ରେ ବିରାଟ କୋହଲୀ ଏବଂ ଏବି ଡିଭିଲିୟର୍ସଙ୍କୁ ଆଉଟ୍ କରିଦେଇଥିଲେ।
କୋଲକାତାର ଇଡେନ୍ ଗାର୍ଡେନ୍ସରେ ଏହି ମ୍ୟାଚ୍ ଖେଳାଯାଉଥିଲା। କୋଲକାତା ଟିମ୍ ବୋଲିଂ କରୁଥିବା ବେଳେ ଆର୍ସିବି ବ୍ୟାଟିଂ କରୁଥିଲା। ୧୫ତମ ଓଭରରେ ନୀତିଶ ରାଣା ଆସି ଏବି ଡିଭିଲିୟର୍ସଙ୍କୁ ପ୍ରଥମ ବଲ୍ରେ ଆଉଟ୍ କରିଦେଇଥିଲେ। ଏହାପରେ ଆସିଥିବା ବିରାଟଙ୍କୁ ମଧ୍ୟ ସମାନ ଭାବେ ସେ ଆଉଟ୍ କରିଦେଇଥିଲେ। ଅତିଥି ବୋଲର୍ ଭାବେ ଏହା ତାଙ୍କପାଇଁ ବଡ ସଫଳତା ଥିଲା। ସେ ଏତେ ଖୁସି ହୋଇଯାଇଥିଲେ ଯେ ବିରାଟଙ୍କୁ ଖରାପ ଭାଷାରେ ଗାଳି ଦେଇଥିଲେ। ଏହା ଆର୍ସିବି ଅଧିନାୟକଙ୍କୁ ଭଲ ଲାଗି ନ ଥିଲା। ହେଲେ ସେ କିଛି କହି ନ ଥିଲେ।
ପରେ ବିରାଟ ନୀତିଶଙ୍କୁ ମ୍ୟାଚ୍ରେ ବ୍ୟବହାର କରିଥିବା ନିଜର ବ୍ୟାଟ୍ ଉପହାରରେ ଦେଇଥିଲେ। ଏହାକୁ ନୀତିଶ ନିଜର ଇନଷ୍ଟାଗ୍ରାମ ଆକାଉଣ୍ଟରେ ଶେୟାର କରିଥିଲେ।
