ପାଟନା,୨୫।୧: ମହାଗଠବନ୍ଧନରେ ଯୋଗଦେବା ପରେ ବିହାର ମୁଖ୍ୟମନ୍ତ୍ରୀ ନିତିଶ କୁମାର କେନ୍ଦ୍ର ମୋଦି ସରକାରଙ୍କୁ ଲଗାତର ଟାର୍ଗେଟ୍ କରୁଛନ୍ତି। ବୁଧବାର ସେ କହିଛନ୍ତି, କେନ୍ଦ୍ର ସରକାର ଗରିବ ରାଜ୍ୟ ପ୍ରତି ଧ୍ୟାନ ଦେଉନାହାଁନ୍ତି। ପଛୁଆ ରାଜ୍ୟଗୁଡିକର ବିକାଶ ପାଇଁ କେନ୍ଦ୍ର ସର୍ବପ୍ରଥମେ କାର୍ଯ୍ୟ କରିବା ଉଚିତ, କିନ୍ତୁ କେନ୍ଦ୍ର ସରକାର ଋଣ ଉପରେ ମଧ୍ୟ ରୋକ ଲଗାଇଛନ୍ତି। ଏହା ବିକାଶ କାର୍ଯ୍ୟକୁ ପ୍ରଭାବିତ କରୁଛି। ଏହା ପୂର୍ବରୁ କୌଣସି କେନ୍ଦ୍ର ସରକାର ଏତେ ହସ୍ତକ୍ଷେପ କରି ନ ଥିଲେ।
ନୀତୀଶ କୁମାର କହିଛନ୍ତି, ବିହାରର ବିକାଶ ପାଇଁ ସେ କେନ୍ଦ୍ରରୁ ଦାବି କରୁଛନ୍ତି କିନ୍ତୁ କୌଣସି ସହାୟତା ମିଳୁନାହିଁ। ଏନଡିଏରେ ଏକାଠି ରହିଥିବାବେଳେ ମଧ୍ୟ କେନ୍ଦ୍ର କୌଣସି ସାହାଯ୍ୟ ଦେଇ ନ ଥିଲା। ଏହା ପରେ ମଧ୍ୟ ରାଜ୍ୟ ସରକାର ବିକାଶ ପାଇଁ ନିଜେ ଉଦ୍ୟମ କରୁଛନ୍ତି। ଯଦି କେନ୍ଦ୍ରରୁ ସାହାଯ୍ୟ ମିଳିଥାନ୍ତା ତେବେ ବିକାଶ କାର୍ଯ୍ୟ ରାଜ୍ୟରେ ତୀବ୍ର ହୋଇଥାନ୍ତା। କେନ୍ଦ୍ର ଗରିବ ରାଜ୍ୟମାନଙ୍କୁ ସାହାଯ୍ୟ କରିବାକୁ ଚାହୁଁନାହାନ୍ତି। କେନ୍ଦ୍ର ସରକାର କେବଳ ପ୍ରଚାର ଉପରେ ଧ୍ୟାନ ଦିଅନ୍ତି। ଏଥି ସହ ବିହାରରେ ବିକାଶ ପାଇଁ ରାଜ୍ୟ ସରକାର ସମସ୍ତ ପ୍ରକାର ଉଦ୍ୟମ କରୁଛନ୍ତି ବୋଲି ସେ କହିଛନ୍ତି।
