ନୂଆଦିଲ୍ଲୀ,୨୭।୯(ପି.ଟି.): ପୂର୍ବତନ ଭାରତୀୟ ମହିଳା କ୍ରିକେଟର ନିତୁ ଡେଭିଡ୍ ମହିଳା ଚୟନ କମିଟି ମୁଖ୍ୟ ନିଯୁକ୍ତ ହୋଇଛନ୍ତି। ୯୦ ଦଶକ ଶେଷ ଆଡକୁ ଓ ୨୦୦୦ ପ୍ରାରମ୍ଭରେ ସେ ଉଚ୍ଚକୋଟୀର ପ୍ରଦର୍ଶନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ହେମଲତା କାଲାଙ୍କ ବଦଳରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତାଙ୍କୁ ଏହି ହାଇପ୍ରୋଫାଇଲ ପଦରେ ନିଯୁକ୍ତ ଦେଇଛି।
କମିଟିର ଅନ୍ୟ ସଦସ୍ୟମାନେ ହେଲେ ମିଠୁ ମୁଖାର୍ଜୀ, ରେନୁ ମର୍ଗାରେଟ, ଆରତି ବୈଦ୍ୟ ଓ ଭି. କାଲପାନ। ଏମାନେ ସମସ୍ତେ ଭାରତ ପାଇଁ କ୍ରିକେଟ ଖେଳିଛନ୍ତି। କାଲାଙ୍କ ନେତୃତ୍ୱରେ ପୂର୍ବ କମିଟିର କାର୍ଯ୍ୟକାଳ ଗତ ମାର୍ଚ୍ଚରେ ଶେଷ ହୋଇଥିଲା। ପୂର୍ବ କମିଟିରେ ସୁଧା ଶାହ, ଅଞ୍ଜଳି ପେଣ୍ଡାକର, ଶଶୀ ଗୁପ୍ତା ଓ ଲୋପାମୁଦ୍ରା ବାନାର୍ଜୀ ସଦସ୍ୟ ରହିଥିଲେ। ଏହି କମିଟି ଅଷ୍ଟ୍ରେଲିଆରେ ଅନୁଷ୍ଠିତ ମହିଳା ଟି୨୦ ବିଶ୍ୱକପ୍ ପାଇଁ ଭାରତୀୟ ଦଳ ଚୟନ କରିଥିଲେ। ଏଥିରେ ଭାରତ ଫାଇନାଲରେ ପରାସ୍ତ ହୋଇ ରନର୍ସଅପ ବିବେଚିତ ହୋଇଥିଲା।
ପୂର୍ବତନ ବାମହାତୀ ସ୍ପିନର ନିତୁ ଡେଭିଡ୍ ଅଭିଜ୍ଞତା ଓ ବୟସାଧିକ ଦୃଷ୍ଟିକୋଣରୁ ଏହି ୫ ଜଣିଆ ଚୟନ କମିଟିର ଅଧ୍ୟକ୍ଷ ନିଯୁକ୍ତ ହୋଇଛନ୍ତି ବୋଲି ବିସିସିଆଇ ସମ୍ପାଦକ ଜୟ ଶାହ କହିଛନ୍ତି। ୧୯୯୫ରେ ସେ ଇଂଲଣ୍ଡ ବିପକ୍ଷରେ ଗୋଟିଏ ଟେଷ୍ଟରେ ୫୩ ରନ ବ୍ୟୟ କରି ସର୍ବାଧିକ ୮ ଉଇକେଟ ଅକ୍ତିଆର କରି ରେକର୍ଡ କରିଥିଲେ। ଦିନିକିଆରେ ସେ ୧୪୧ଟି ଉଇକେଟ ନେଇ ଭାରତ ପାଇଁ ଦ୍ୱିତୀୟ ସର୍ବାଧିକ ଉଇକେଟ ହାସଲକାରୀ ସାବ୍ୟସ୍ତ ହୋଇଥିଲେ। ପ୍ରଥମ ମହିଳା କ୍ରିକେଟର ଭାବେ ସେ ଦିନିକିଆରେ ୧୦୦ ଉଇକେଟ ଅକ୍ତିଆର କରିଥିଲେ। ୧୦ଟି ଟେଷ୍ଟ ଖେଳି ନିତୁ ୪୧ ଉଇକେଟ ଅକ୍ତିଆର କରିଥିଲେ। ୨୦୦୮ରେ ସେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ। କୋଭିଡ୍-୧୯ ମହାମାରୀ କାରଣରୁ ଦୀର୍ଘମାସ ହେବ ଭାରତୀୟ ମହିଳା କ୍ରିକେଟ ଦଳ କୌଣସି ମ୍ୟାଚ୍ ଖେଳିନାହିଁ। ତେବେ ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଭାରତୀୟ ଦଳ ଚ୍ୟାଲେଞ୍ଜର ସିରିଜ ଖେଳି ପୁଣି ଥରେ ପଡିଆକୁ ଫେରିବ। ଏହି ସିରିଜ ଲାଗି ଦଳ ଚୟନ କରିବାକୁ ବିସିସିଆଇ ଏହି ଚୟନ କମିଟି ଗଠନ କରିଛି।