ବରଗଡ଼,୮।୪(ପ୍ରେମାନନ୍ଦ ଖମାରୀ): ମେଣ୍ଟକୁ ନେଇ ଯେଉଁ ପ୍ରକ୍ରିୟା ଚାଲିଥିଲା, ଭାଜପାର ହଜାର ହଜାର କାର୍ଯ୍ୟକର୍ତ୍ତା ଅସନ୍ତୁଷ୍ଟ ଥିଲେ। ଏଥର ଭାଜପା ଡବଲ ଇଞ୍ଜିନ ସରକାର ଗଢ଼ିବ, କାହିଁକି ମେଣ୍ଟ କରିବାକୁ ଯାଉଛନ୍ତି ବୋଲି ସାଧାରଣ ଜନତା ମଧ୍ୟ ପ୍ରଶ୍ନ କରିଥିଲେ। କୌଣସି ଭିତରି ମେଣ୍ଟ ନାହିଁ, କେନ୍ଦ୍ର ନେତୃତ୍ୱ ଯେଉଁ ଦାୟିତ୍ୱ ଦେବ, ସେ ସେହି ଦାୟିତ୍ୱକୁ ଶୃଙ୍ଖଳିତ ଭାବେ ସମ୍ପାଦନ କରିବେ ବୋଲି ସୋମବାର ବରଗଡ଼ରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଭାଜପା ଲୋକସଭା ପ୍ରାର୍ଥୀ ପ୍ରଦୀପ ପୁରୋହିତ କହିଛନ୍ତି । ସେ ଆହୁରି କହିଥିଲେ, ଏହା ଭାଜପାର ଲଢ଼େଇ ନୁହେଁ, ଜନତାଙ୍କ ଲଢ଼େଇ । ଲୋକେ ନରେନ୍ଦ୍ର ମୋଦିଙ୍କୁ ତୃତୀୟଥର ପ୍ରଧାନମନ୍ତ୍ରୀ କରିବାକୁ ଚାହୁଁଛନ୍ତି। ଏଭଳିସ୍ଥଳେ ବିଜେଡି ଏକ ଶକ୍ତିଶାଳୀ ଦଳ ହୋଇଥିବା ବେଳେ କଂଗ୍ରେସ ଅସ୍ତିତ୍ୱ ହରାଇ ସାରିଛି । ଫଳରେ ନିର୍ବାଚନରେ ଲଢ଼େଇ ଜୋରଦାର ହେବ ଏବଂ ଭାଜପା ତଥା ଜନତାଙ୍କ ବିଜୟ ନିଶ୍ଚିତ ହେବ ବୋଲି ପୁରୋହିତ କହିଥିଲେ।
ସେହିପରି ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତର ଦେଇ ପୁରୋହିତ କହିଥିଲେ, କୌଣସି କମ୍ପାନୀକୁ ଗନ୍ଧମାର୍ଦ୍ଧନର ଏକ ଇଞ୍ଚ ଜମି ପ୍ରଦାନ କରାଯିବ ନାହିଁ । ଏହାକୁ ନେଇ ସେ ବଜ୍ର ଶପଥ କରିଛନ୍ତି । ସେ ନିର୍ବାଚିତ ହେଲେ ଗନ୍ଧମାର୍ଦ୍ଧନର ସୁରକ୍ଷା ପାଇଁ ପଦକ୍ଷେପ ସହିତ ଛୋଟ ଛୋଟ ଔଷଧୀୟ ଶିଳ୍ପ ପ୍ରତିଷ୍ଠା କରି ସ୍ଥାନୀୟ ଲୋକଙ୍କୁ ରୋଜଗାର ଦେବାକୁ ଉଦ୍ୟମ କରାଯିବ ବୋଲି ପୁରୋହିତ କହିଥିଲେ।
ସେହିପରି ରାଜ୍ୟରେ ଭାଜପା ସରକାର ଆସିଲେ ଧାନ କୁଇଣ୍ଟାଲ ପ୍ରତି ୩୧୦୦ ଟଙ୍କା କରାଯିବ ଏବଂ ବରଗଡ଼-ନୂଆପଡ଼ା, ବରଗଡ଼-ରାୟପୁର ରେଳପଥ ନିର୍ମାଣକୁ ଗୁରୁତ୍ୱ ଦିଆଯିବ ବୋଲି ସେ ପ୍ରକାଶ କରିଥିଲେ। ଖବରଦାତା ସମ୍ମିଳନୀରେ ଦଳର ବରିଷ୍ଠ ନେତା ସୁରେଶ୍ୱର ଶତପଥୀ, ଅଶୋକ ପଣ୍ଡା, ରବି ନାରାୟଣ ଦାଶ, ଅକ୍ରୂର ମଲ୍ଲିକ ପ୍ରମୁଖ ଉପସ୍ଥିତ ଥିଲେ।