ଅନୁଗୋଳ ଅଫିସ,୧୧ା୩ ଜନସଂଖ୍ୟା ଦୃଷ୍ଟିରୁ ଅନୁଗୋଳ ପୌରାଞ୍ଚଳର ତୃତୀୟ ବୃହତ୍ତମ ଓ୍ବାର୍ଡ ହେଉଛି ୧ ନମ୍ବର ଓ୍ବାର୍ଡ। ଜନବହୁଳ ଅଞ୍ଚଳ ହୋଇଥିବାରୁ ଏହି ଓ୍ବାର୍ଡର ସମସ୍ୟା ମଧ୍ୟ ଅଧିକ। ହେଲେ ଦୀର୍ଘବର୍ଷ ହେଲା ପୌର ପ୍ରଶାସନ ଏହାର ସମାଧାନ କରିପାରୁ ନାହିଁ। ବିଶେଷକରି ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଥିଲେ ମଧ୍ୟ ସୁଧାରିବା ଦିଗରେ ଧ୍ୟାନ ଦିଆଯାଉ ନ ଥିବା ଓ୍ବାର୍ଡବାସୀ ଅଭିଯୋଗ କରିଛନ୍ତି।
ଅନୁଗୋଳ ପୌର ପରିଷଦର ଶିମିଳିପଡ଼ା ଓ ଶିକ୍ଷକପଡ଼ାର କିଛି ଅଂଶକୁ ନେଇ ଗଠିତ ୧ନଂ. ଓ୍ବାର୍ଡର ସୀମା ରାଣିଗୋଡ଼ା ପମ୍ପ ହାଉସ ଯାଏ ରହିଛି। ଛୋଟ ବଜାର ସହ ଏଠାରେ ସ୍କୁଲ, ସାଇନ୍ସ କଲେଜ ଆଦି ଶିକ୍ଷାନୁଷ୍ଠାନ ଥିବାରୁ ସ୍ବଚ୍ଛତା ଉପରେ ଅଧିକ ଗୁରୁତ୍ୱ ଦିଆଯିବା କଥା। କିନ୍ତୁ ବର୍ଷ ବର୍ଷ ଧରି ଆବର୍ଜନା ସମସ୍ୟାର ନିରାକରଣ କରାଯାଉ ନାହିଁ। ରାସ୍ତା ପାର୍ଶ୍ୱରେ ଅଳିଆ ଗଦା ହେଉଥିବାବେଳେ ତାହାକୁ ନିୟମିତ ଭାବେ ଉଠାଯାଉ ନାହିଁ। ଫଳରେ ଅନେକ ସମୟରେ ପୂତିଗନ୍ଧମୟ ପରିବେଶ ମଧ୍ୟରେ ଓ୍ବାର୍ଡବାସୀଙ୍କୁ ରହିବାକୁ ପଡ଼ୁଛି। ସେହିପରି ଡ୍ରେନ୍ ସଫା କରାଯାଉ ନ ଥିବାରୁ ଠିକ୍ ଭାବେ ଜଳ ନିଷ୍କାସନ ହୋଇପାରୁ ନାହିଁ। ଅନେକ ସମୟରେ ଆବର୍ଜନା ଜମି ରହିବା ଯୋଗୁ ରାସ୍ତା ଉପରେ ଅପରିଷ୍କାର ପାଣି ପ୍ରବାହିତ ହେଉଛି। ପୂର୍ବ ନିର୍ବାଚିତ କାଉନସିଲରଙ୍କ କାର୍ଯ୍ୟକାଳ ୨୦୧୮ରୁ ଶେଷ ହୋଇଥିବାରୁ ସମସ୍ୟା ବୁଝିବାକୁ ୪ ବର୍ଷ ହେଲା କେହି ନାହାନ୍ତି। ବାରମ୍ବାର ଆପତ୍ତି ଅଭିଯୋଗ ପରେ ପୌର କର୍ତ୍ତୃପକ୍ଷ କିଛି ପଦକ୍ଷେପ ନେଉଥିଲେ ମଧ୍ୟ ତାହା ଯଥେଷ୍ଟ ହେଉନାହିଁ। ତେଣୁ ଚଳିତ ପୌର ନିର୍ବାଚନକୁ ନେଇ ଓ୍ବାର୍ଡବାସୀ ଉତ୍ସାହିତ ଅଛନ୍ତି। ସାଧାରଣ ମହିଳାଙ୍କ ପାଇଁ ସଂରକ୍ଷିତ ଏହି ଓ୍ବାର୍ଡରୁ କାଉନସିଲର ପଦବୀ ପାଇଁ ବିଜେଡିରୁ ପ୍ରାର୍ଥୀ ହୋଇଛନ୍ତି ସୁକାନ୍ତି ଦାସ। ଭାଜପା ଦିବ୍ୟାଂଶୀ ସ୍ବାଇଁଙ୍କୁ ଟିକେଟ୍ ଦେଇଥିବାବେଳେ କଂଗ୍ରେସରୁ ପ୍ରତିମା ବେହେରା ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏ ସମ୍ପର୍କରେ ଓ୍ବାର୍ଡବାସୀ ନଇମ ମହମ୍ମଦ କହିଛନ୍ତି, ପରିମଳ ସମସ୍ୟାର ସମାଧାନ କରାଯିବା ଅତ୍ୟନ୍ତ ଜରୁରୀ ହୋଇପଡ଼ିଛି। ପୂର୍ବାପେକ୍ଷା ପୌର କର୍ତ୍ତୃପକ୍ଷ ଟିକେ ତତ୍ପର ହୋଇଛନ୍ତି। ଓ୍ବାର୍ଡକୁ ନୂଆ କାଉନସିଲର ମିଳିବା ପରେ ଲୋକେ ଆଶ୍ୱସ୍ତି ଅନୁଭବ କରିବେ ବୋଲି ଆଶା କରାଯାଉଥିବା ମହମ୍ମଦ ପ୍ରକାଶ କରିଛନ୍ତି।