ବନ୍ତ,୧୧ା୫(ଡି.ଏନ.ଏ.)-ଦୈନିକ ଦୋକାନରୁ ଯାହା ରୋଜଗାର ହେଉଥିଲା, ସେଥିରେ ପରିବାର ଚଳୁଥିଲା। ସେହି ଟଙ୍କାରେ ଦୋକାନ ପାଇଁ ସଉଦା କିଣିବା ସହ ପରିବାର ଚଳିବା ପାଇଁ ଆବଶ୍ୟକ ସାମଗ୍ରୀ, ଔଷଧ ଓ ପିଲାମାନଙ୍କ ପାଠପଢ଼ା ଲାଗି ଖର୍ଚ୍ଚ ହେଉଥିଲା। ହେଲେ କରୋନା ଦାଉ ସାଧିଲା। ଏବେ ଲକ୍ଡାଉନ ସହିତ ପ୍ରତି ଶନିବାର, ରବିବାର ସପ୍ତାହାନ୍ତ ଶଟ୍ଡାଉନ ଜାରି ରହିଛି। ଯେଉଁଥିପାଇଁ ଦୋକାନ ବନ୍ଦ ରଖିବାକୁ ପଡୁଛି। ଏହି ଦୋକାନ ରୋଜଗାରର ଏକମାତ୍ର ପନ୍ଥା ହୋଇଥିବା ବେଳେ କରୋନା ମହାମାରୀ ସେତକ ବି ଛଡ଼ାଇ ନେଇଛି। ଫଳରେ ପରିବାର ଲୋକ ଭୋକ ଉପାସରେ ଦିନ କାଟୁଛନ୍ତି ବୋଲି କୋହଭରା କଣ୍ଠରେ କହିଛନ୍ତି ଭଦ୍ରକ ଜିଲା ବନ୍ତ ବ୍ଲକ ନିଳୋକ ଗ୍ରାମର ନିରଞ୍ଜନ ବିଶ୍ୱାଳ।
ସେ କହନ୍ତି, ସ୍ତ୍ରୀ, ୩ ଝିଅ ଓ ଗୋଟିଏ ପୁଅକୁ ନେଇ ତାଙ୍କର ପରିବାର। ନିଳୋକ ବଜାରରେ ତାଙ୍କର ଏକ ଚା’ ଜଳଖିଆ ଦୋକାନ ରହିଛି। ନିଜର ଜମିବାଡ଼ି ନ ଥିବାବେଳେ ଦୀର୍ଘ ୩୦ ବର୍ଷ ଧରି ଏହି ଦୋକାନ ହିଁ ୬ ପ୍ରାଣୀ କୁଟୁମ୍ବଙ୍କୁ ଦାନା ଯୋଗାଇ ଆସୁଥିଲା। କିନ୍ତୁ କରୋନା ଆସି ତାଙ୍କ ପରିବାର ଲୋକଙ୍କ ମୁହଁରୁ ଖାଦ୍ୟ ଛଡ଼ାଇ ନେଲା। ଗତବର୍ଷ ଦୀର୍ଘଦିନ ଧରି ଦୋକାନ ବନ୍ଦ ରହିଥିଲା। ବହୁ କଷ୍ଟରେ ପରିବାର ଚଳାଇଥିଲେ। ଯାହା ଯେମିତି ହେଉ ଚଳିଯିବା ପରେ କିଛି ମାସ ପରେ ଟିକେ ସୁଧାର ଆସିଥିଲା। ହେଲେ ପୁଣି ଦାଉ ସାଧିଛି ମହାମାରୀ। ଗୋଟିଏ ପଟେ କରୋନା ଭୟକୁ ଅନ୍ୟପଟେ ଲକ୍ଡାଉନ, ଶଟ୍ଡାଉନ ଯୋଗୁ ରୋଜଗାର ବନ୍ଦ। ଏବେ କିପରି ପରିବାର ଚଳାଇବେ ତାହା ତାଙ୍କ ପାଇଁ କଷ୍ଟକର ବ୍ୟାପାର ହୋଇଛି। ଖାଇବା ପାଇଁ ଖାଦ୍ୟ କେଉଁଠୁ ଆସିବ। ଓଳିଏ ଖାଇଲେ ଆଉ ଓଳିଏ ଉପାସ ରହିବାକୁ ପଡୁଛି। ଏଭଳି ଭୋକ ଉପାସରେ ଦିନ ବିତୁଛି। ସେହିପରି ନିଳୋକ ବଜାରରେ ଚା’ ଦୋକାନ କରି ୪ ପ୍ରାଣୀ କୁଟୁମ୍ବଙ୍କୁ ପ୍ରତିପୋଷଣ କରିଆସୁଥିଲେ ଆଉ ଜଣେ ଦୋକାନୀ ଚନ୍ଦ୍ରଶେଖର ସାହୁ। ଏବେ ଦୋକାନ ବନ୍ଦ ଥିବାରୁ ପରିବାର ଚଳାଇବା କଷ୍ଟକର ହୋଇପଡ଼ିଥିବା ସେ କହିଛନ୍ତି। ସେମାନଙ୍କ ଭଳି ବହୁ ଚା’ ଜଳଖିଆ ଦୋକାନୀ ଏବେ ହାତବାନ୍ଧି ଘରେ ବସି ରହିଛନ୍ତି। କରୋନା ମହାମାରୀ ସେମାନଙ୍କ ଜୀବିକା ଉପରେ ପ୍ରହାର କରିଛି ବୋଲି ସେମାନେ କ୍ଷୋଭର ସହ କହିଛନ୍ତି।