ଜୋହାନ୍ସବର୍ଗ :ଦକ୍ଷିଣ ଆଫ୍ରିକାର ଜୁଲୁ ରାଜାଙ୍କ ରାଜାଭିଷେକ ସରିଥିଲେ ହେଁ ସେ ଏବେ ସିଂହାସନ ଅପେକ୍ଷାରେ। ପୂର୍ବପୁରୁଷଙ୍କ ରୀତିନୀତି ଅନୁସାରେ ଜୁଲୁରାଜା ବ୍ୟବହାର କରୁଥିବା ସିଂହାସନ ଭାରତୀୟ ବଂଶୋଦ୍ଭବ ରାଜୀବ ସିଂଙ୍କ ଦ୍ୱାରା ତିଆରି କରାଯାଏ। ସ୍ବତନ୍ତ୍ର ତାମ୍ବୋତି କାଠରେ ରାଜାଙ୍କ ସିଂହାସନ ନିର୍ମାଣ କରାଯାଉଥିବାବେଳେ ପୂର୍ବ ଅର୍ଡରର ପେମେଣ୍ଟ ନ ମିଳିବା କାରଣରୁ ସିଂହାସନ ତିଆରି ହୋଇ ନ ଥିବା କହିଛନ୍ତି ରାଜୀବ ସିଂ। ତମ୍ବୋତି କାଠରେ ଆସବାବପତ୍ର ତିଆରି କରିବାରେ ରାଜୀବଙ୍କ ପରିବାର ଖୁବ୍ ନିପୁଣ। ତାଙ୍କ ପୂର୍ବଜମାନେ ଏହି କାମ କରିଆସୁଥିବାବେଳେ ଜୁଲୁ ରାଜାଙ୍କ ଆବଶ୍ୟକୀୟ କାଠ ସାମଗ୍ରୀ ରାଜୀବଙ୍କ ନିକଟରୁ ଯାଇଥାଏ। ସାଉଥ୍ ଆଫ୍ରିକା ସରକାର ଶନିବାର ୪୮ ବର୍ଷୀୟ ମିସୁଜୁଲୁଙ୍କୁ ଜୁଲୁ ରାଜା ଭାବେ ଘୋଷଣା କରିଥିଲେ। ୧୯୭୧ ମସିହା ପରେ ସରକାର ପ୍ରଥମ ଥର ପାଇଁ ମିସୁଜୁଲୁଙ୍କୁ ସେଠାକାର ମହାରାଜା କରିଛନ୍ତି।
ରାଜୀବଙ୍କ କହିବାନୁସାରେ, ମିସୁଜୁଲୁଙ୍କ ବାପା ଗୁଡଓ୍ବିଲ୍ ଓ୍ବେଲିଥିନି ସାତବର୍ଷ ପୂର୍ବେ ନେଇଥିବା ଫର୍ନିଚର ବାବଦକୁ ୪,୫୩,୭୧୦ ଟଙ୍କା ବାକି ରହିଛି। ବକେୟା ଟଙ୍କା କଥା ରାଜ ପରିବାର ପ୍ରତିନିଧିଙ୍କୁ କହିବା ପରେ ମଧ୍ୟ ସେମାନେ ଏ ନେଇ କୌଣସି ପଦକ୍ଷେପ ନେଇ ନ ଥିଲେ ବୋଲି ରାଜୀବ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି। ଦୁଇଟି ସିଂହାସନ, ରାଜକୀୟ ବାଡ଼ି, ଓ୍ବେଲିଥିନିଙ୍କ ୭ ସ୍ତ୍ରୀଙ୍କ ପାଇଁ ୭ ସିଂହାସନ, ୧୦ଟି ଟେବୁଲ ଓ ୩ଟି ଚା’ ପ୍ଲେଟ୍ ନେଇଥିବାବେଳେ ତା’ ଟଙ୍କା ବାକି ରହିଛି। ଜୁଲୁ ରାଜାଙ୍କଠାରୁ ବକେୟା ଅର୍ଥ ଆଦାୟ ପାଇଁ କୁବେର ଇଡେଭ ସିଂ ଅଭିଯୋଗ କରିଥିବା ରାଜୀବ କହିଛନ୍ତି।
ଜୁଲୁ ରାଜପରିବାର ବ୍ୟତୀତ ବ୍ରିଟେନ୍ର ପୂର୍ବତନ ମହାରାଣୀ ଏଲିଜାବେଥ୍ ଦ୍ୱିତୀୟଙ୍କୁ ସିଂ ପରିବାର ତରଫରୁ ଏକ ଜୁଏଲେରି ବକ୍ସ ଉପହାର ସ୍ବରୂପ ଦିଆଯାଇଥିଲା। ସାଉଥ୍ ଆଫ୍ରିକାର ପୂର୍ବତନ ରାଷ୍ଟ୍ରପତି ନେଲସନ୍ ମାଣ୍ଡେଲାଙ୍କ ସମେତ ଆମେରିକା ରାଷ୍ଟ୍ରପତି ରୋନାଲ୍ଡ ରିଗାନ ଏବଂ ଜର୍ଜ ବୁସ୍ଙ୍କୁ କମଧ୍ୟ ତାମ୍ବୋତି କାଠରେ ତିଆରି ଜିନିଷ ପ୍ରଦାନ କରାଯାଇଛି।
