ଭେଡ଼େନ,୨୯।୧୦(ସୁଦନ ମହାକୁର): ବରଗଡ଼ ଜିଲା ଭେଡ଼େନ ବ୍ଲକର ଚାଷୀ ଓ ଚାଷକୁ ପ୍ରାକୃତିକ ବିପର୍ଯ୍ୟୟ ପିଛା ଛାଡୁନାହିଁ। କେତେବେଳେ ବର୍ଷା ଅଭାବ ତ’ ବିଦ୍ୟୁତ୍ ବିଭ୍ରାଟ ସାଙ୍ଗକୁ ରୋଗପୋକ ଦାଉରୁ ଫସଲ ବଞ୍ଚାଇବା ପାଇଁ ଚାଷୀ ସଂଘର୍ଷ ଜାରି ରଖିଛି । ସମ୍ପ୍ରତି ଧାନଫସଲ ଅମଳ ପାଖେଇ ଆସୁଛି । ଚାଷୀ ଚଳିତ ଖରିଫରେ ଭଳ ଧାନ ଅମଳ ପାଇଁ ଆଶା ରଖିଛି। ହେଲେ ଅମଳ ପୂର୍ବରୁ ରୋଗପୋକ ଯୋଗୁ ଚାଷ ଉଜୁଡ଼ି ଯିବାକୁ ବସିଛି। ଚାଷୀଙ୍କ ଆଖି ଆଗରେ ହେକ୍ଟରହେକ୍ଟର ଫସଲରେ ଚକଡ଼ା ଏବଂ ଗଣ୍ଠି ପୋକ ମାଡ଼ି ଚାଲିଛି। ଫଳରେ ରାତାରାତି ଧାନଗଛ ହଳଦିଆ ପଡ଼ି ପାଳ ହୋଇଯାଉଛି। ଏପରି ସ୍ଥଳେ ରୋଗପୋକ ଦମନ ପାଇଁ କୀଟନାଶକ ପ୍ରୟୋଗ କଲେ ବି ତାହା ଫଳପ୍ରଦ ହେଉ ନ ଥିବା କେତେକ ଚାଷୀ ଅଭିଯୋଗ କରିଛନ୍ତି।
ବ୍ଲକର ପ୍ରାୟ ସବୁ ପଞ୍ଚାୟତରେ ଧାନଚାଷ ପ୍ରଭାବିତ ହେବାରେ ଲାଗିଛି। ବିଶେଷ କରି ବ୍ଲକର ମହୁଲପାଲି, ସିଆଲଖଣ୍ଡହଥା, ମାନପୁର, ଋଷୁଡ଼ା, ଦେଶଭଟଲି, ସୁନାଲରମ୍ଭା, ବକଟି, ରେମଣ୍ଡା, ଚିଚିଣ୍ଡା, ତାଲମେଣ୍ଡା, ଡ଼ାଳବ,ରେଶମ, ଅଁଳାପାଲି ପଞ୍ଚାୟତରେ ଏହାର ପ୍ରାଦୁର୍ଭାବ ଦେଖିବାକୁ ମିଳୁଥିବା ବେଳେ ଅନ୍ୟ ପଞ୍ଚାୟତକୁ ମଧ୍ୟ ସଂକ୍ରମିତ ହେଉଥିବା ଅଭିଯୋଗ ହେଉଛି। ଏନେଇ କୃଷି ବିଭାଗ ପାଖରେ ଖବର ନ ଥିବା ପରିତାପର ବିଷୟ ହୋଇଛି। ଚାଷୀଙ୍କୁ ପରାମର୍ଶ ଦେବାକୁ କୌଣସି କୃଷି କର୍ମଚାରୀଙ୍କ ଦେଖା ମିଳୁ ନ ଥିବା ଚାଷୀ ସଂଗଠନ ଅଭିଯୋଗ କରିଛି। ଗୋଟିଏ ପଟେ ଚାଷୀ ଅଣସ୍ବୀକୃତି ପ୍ରାପ୍ତ ବିକ୍ରେତାଙ୍କ ପାଖରୁ ଚଢା ଦରରେ କୀଟନାଶକ କିଣି ଠକାମିର ଶୀକାର ହେଉଛନ୍ତି। ଅନ୍ୟ ପଟେ ଉକ୍ତ କୀଟନାଶକ ଫସଲରେ ପ୍ରୟୋଗ କରୁଥିଲେ ମଧ୍ୟ ସେଥିରେ ରୋଗପୋକ ଦମନ ହେଉ ନାହିଁ । ଏହି ସମ୍ପର୍କରେ ମତାମତ ପାଇଁ ମୁଖ୍ୟ ଜିଲା କୃଷି ଅଧିକାରୀ ଅମୀୟ କୁମାର ସାହୁଙ୍କୁ ତାଙ୍କ ମୋବାଇଲ ନମ୍ବର ୯୮୬୧୫୪୨୪୭୫ରେ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ନ ଥିଲା।