ଆବୁଧାବି,୧୮।୧୦: ମହେନ୍ଦ୍ର ସିଂ ଧୋନୀଙ୍କ ବିନା ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ର ଅସ୍ତିତ୍ୱ ନାହିଁ। ଠିକ୍ ସେହିଭଳି ସିଏସ୍କେ ବିନା ଧୋନୀ ମଧ୍ୟ କିଛି ନୁହେଁ। ଧୋନୀ କେବଳ ସିଏସ୍କେର ନୁହେଁ, ବରଂ ଚେନ୍ନାଇ ଓ ତାମିଲନାଡୁର ଅଂଶ। ଏଭଳି କହିଛନ୍ତି ଇଣ୍ଡିଆ ସିମେଣ୍ଟ ଲିମିଟେଡ୍ (ଆଇସିଏଲ) ଭାଇସ ଚେୟାରମ୍ୟାନ ଓ ମ୍ୟାନେଜିଂ ଡିରେକ୍ଟର ଏନ୍ ଶ୍ରୀନିବାସନ।
ସିଏସ୍କେ ଫ୍ରାଞ୍ଚାଇଜ ଓ କିମ୍ବଦନ୍ତୀ କ୍ରିକେଟରଙ୍କ ମଧ୍ୟରେ ଥିବା ସମ୍ପର୍କକୁ ଦର୍ଶାଉଛି ଫ୍ରାଞ୍ଚାଇଜ ମାଲିକ ତଥା ବିସିସିଆଇ ପୂର୍ବତନ ସଭାପତିଙ୍କ ଏଭଳି ମନ୍ତବ୍ୟ। ଧୋନୀଙ୍କ ନେତୃତ୍ୱରେ ଚେନ୍ନାଇ ଚତୁର୍ଥ ଆଇପିଏଲ ଟ୍ରଫି ହାତେଇଥିଲା। ଆଇପିଏଲ ଟ୍ରଫି ସହ ଭଗବାନ ଭେଙ୍କଟଚାଳପଥିଙ୍କ ମନ୍ଦିରରେ ସୋମବାର ପହଞ୍ଚିଥିଲେ ସିଏସ୍କେ ମାଲିକ ଶ୍ରୀନିବାସନ। ୨୦୦୮ରୁ ୧୪ ପର୍ଯ୍ୟନ୍ତ ସିଏସ୍କେର ମାଲିକାନା ଆଇସିଏଲ ପାଖରେ ଥିଲା। ତା’ ପରେ ଏହାର ମାଲିକାନା ଚାଲି ଯାଇଥିଲା ଚେନ୍ନାଇ ସୁପର କିଙ୍ଗ୍ସ କ୍ରିକେଟ ଲିମିଟେଡ୍ ହାତକୁ।
